طبيبة قلبى
بعد خلصتا مشيت إتكلمتا مع أبو سومة كان معاهو عمها لقيتهم تحت وشلتا رقمو ورجعتا البيت مبسوط في قعدتنا المسائية اليومية قلتا لأبوي وأمي أنا عاوز أمشي أخطب بعد دا دايركم تمشو معاي أمي قالت لي وأنا من قبييل أقول الليلة أنور ولدي دا مبسوط كدا اصلو ما براهو إن شاء الله دايما مبسوط قلتا ليها أميين بوجودكم إن شاء الله حبوبة قالت لي أخيرا داير تفرحنا يا ولدي المهم إتناقشنا في الموضوع كدا ومشيت علي غرفتي إتصل علي أيمن قال لي أها يا أنور بقيت علي موضوع القبيل ولااا كلام ساي ، قلتا ليهو معقولة يااخ لالا يا زول أنا جادي ، قال لي هسا إنتا طوالي كدا إتريس حبة وإستخير يا زول وبعدين إنتا رقمها ما عندك وما كلمتها شلتا رقم أبوها طوالي هسا لو مرتبطة!؟؟ ، قلتا ليهوأنا ما عارف إنتا ما تقول كدا أدعي لي بس اموري تظبط وأنا داير أول خطوة أعملها جادة عشان كدا شلتا رقم أبوها داير أمشي ليها بالباب عديل حتى لو رفضتني بعدين أكون حصلتا أبوها ومنو القال ليك ما إستخرتا ياخ أنا غير الإستخارة دي في كل صلاة وسجدة بدعي إنو تكون من نصيبي يا أيمن أنا كل البعرفو إنو الإنسانة دي من شفتها أول مرة نهاائي ما ختيتها زي أي بت دخلت قلبي وإستحوذت عقلي وشغلت تفكيري وبس توافق ياااارب وتاني ما بفرط فيها????❤قال لي ياااا الله تصدق حسيتك ما أنور البعرفو هههه ياخ أنا لو كان عارف كدا كان بقيت زيك وما فتحتا قلبي دا لحب نهاائي لحدي أعمل خطوة جادة شاكوشين أخدتهم يااخ لكن تبتا خلاص????تمام يا زول الفيها الخير ربنا يكتبها إن شاء الله ويوم الجمعة من بعد العصر تلقاني معاك بمشي معاك ولو عندها أخت طوالي يا زول أنا بطلبها وطاخ طاخ عقد بس بلا حب بلا بطيخ ودعواتي معاك ، قلتا ليهو إن شاء الله تسلم يا أيمن يااخ بعد قفلتا منو رقدتا في السرير وأنا حارس بس متيين يوم الجمعة دا يجي……..
كنتي كترياق سرا في دمائي فأصبح جسدي مقاوم لكل أمراض الهوى والعشق❤
الجزء الثامن من رواية طبيبة قلبي
بعد عمتي خرجوها من المستشفى يوم الأربعاء وإتحسنت شديد الحمدلله تاني يوم أبوي بعد وراهم كلهم كلمني إنو في زول إتقدم لي وجاي بكرة ويا بتي هو زول سألنا منو أخلاقو كويسة وإنتي بعدين إستخيري وأيا كان قرارك أنا معاهو وإنو هو دكتور أنور لمن قال لي كدا إتفاجأتا وبقيت مخلوعة ومصدومة ، وفعلا يوم الجمعة بالمغرب جونا وكان معاها أمو وأبوهو وحبوبتو وصحبو الدكتور داك ، وأمل صحبتي وأمها جونا من الصباح ورتبو مع ناس أمي الحاجات ، بعد إستقبلوهم أنا كنتا مصدعة وحاسة نفسي محمومة لبستا فستان وما عملتا حاجة وأمل دي بعد فترة من التحنيس فيني في النهاية قالت لي أصلك زفتة حيوانة سجم خلاص وثقيلة كمان ياخ أنا بس خلي ينضمو فيني ساي بتمكيج عروس بس بعد دا أنا ماشة أضيف مع خالتو وطلعت????ضحكتني ضحك مع إني ما عندي ليهو حاجة بس كنتا متوترة وآخر موقف داك كمان واااي بس ، بعد مسافة كدا أبوي نادني وأمل جات معاي بعد ضيفتهم ودخلنا سوا ابوي قال ليهم دي بتي واحدة وأخوها هيثم دا أصغر منها سلمتا عليهم أمو دي قامت فوق وسلمت علي بفرح كدا كأنها بتعرفني وحبوبتو برضو طيبانة شديد، وأنا متوترة من نظراتهم الكانت علي من دخلتا لحدي قعدتا جمب أبوي وكانوا بتونسوا عادي ورأسي ما رفعتو لأنو لو رفعتو بلقا دكتور أنور بعاين لي يااخ دخل فيني تشتت عديل من التوتر بعد خلصوا قعدتهم دكتور أنور قال لأبوي داير إتكلم معاي أبوي نادني في الحوش عندنا جلسة كدا ودخل جوا قعدنا وهو قعد قصادي في الكرسي وأنا لسا ما قرة أعاين ليهو إلا لمن قال لي سومة! حتى رفعتا رأسي عاينتا ليهو كان جادي ومبتسم بفرح قال لي أنا ما بعرفك كويس واول مرة شفتك في المعمل اليوم داك وكل البعرفو حاليا إني دايرك شريكة لحياتي بس وأنا عملتا كدا خطوة جادة لأني جد متمسك بيك شديد وفي النهاية قبل كل حاجة قرارك أنا بتقبلو????، ، ، وكلامو كان بطلع بإتزان وثقة المهم بعد تمو قعدتهم وطلعو فاتو وحارسين كلامنا او قراري بس
ناس أمل وخالتو هبة أمها باتو معانا تاني يوم الصباح الحمى ما خلتني وكنتا تعبانة عديل أمي قالت لي نمشي العيادة الهنا دي مشينا ومعاي أمل فحصنا وطلعت ملاريا لمن أدوني دربين وعلاجات حتى طلعنا ومن مشيت طوالي نمتا بعد صحيت علي صوت أمي بعد الضهر كدا صحتني وكانت بتتحسس في جبيني وقالت لي يا بتي بقيتي كيف هسا كفاكي نوم قومي أكلي ليك لقمة من الصباح نايمة كدا جابت أكل ختتو قدامي في التربيزة جات قعدت جمبي وحضنتني عليها وقالت لي كرر علي يا بتي مع جري المستشفى الأيام الفاتت دي تعبناكي بالمراسيل ، قلتا ليها لالا يما مافي تعب أنا كويسة هسا الحمدلله ، قالت لي سمح أكلي عشاني عليك الله إن شاء الله حبة بس قلتا ليها سمح وبقت تأكلني في خشمي ، أمل جات داخلة قالت لي أخييرا يا بت صحيتي وجات لمست جبيني برضو ورفعت الصحن مسكتو في يدها وقعدت في التربيزة محلو قالت لأمي أنا زاتي أكليني معاها من قبيل حارساك تصحي عشان أتم باقي فطوري معاك يلا سرييع قولي لي شكرا ، قلتا ليها كان تحرسيني عديل بدل تأكلي حبة مع ناس أمي وتتمي الباقي معاي ، قالت لأمي شوفتي يا خالتو سارة بتك حسنة ما فيها ، أمي قعدت تضحك وقالت ليها هسا خلن كلامكن الكتير الكتير دا وهاكي إنتي زاتك بأكلك ومدت ليها لقمة في خشمها ، خالتو هبة وعمتي مواهب برضو جو داخلين عمتي شايلة صينية فيها حاجات الجبنة وخالتو هبة شايلة الكانون بعد قالوا لي بقيتي كيف قالوا دايرين يسو الجبنة معاي هنا ، أخوي هيثم جاء داخل عاين لينا أنا وامل كدا وهزا رأسو يمين شمال وقعد يضحك قال دلع غايتو سبحان الله قال لأمي وخالتو هبة أنا مش قلتا ليكم البنات ديل ما تدلعوهم كدا ، امل قالت ليهو هي أطلع منها بس بناتهم الوحيدات لااازم????مشكلتك شنو إنتا هسا لو داير يأكلوك تعال أقعد بس????قعدوا يضحكوا فيهم وقلبوها ونسة وجو ظريف كدا



