طبيبة قلبى
وفي الجزء السابع من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .
الجزء السابع من رواية طبيبة قلبي
بعد خلصتا من كل عملياتي قلتا أمر علي المرضى العندي وأنزل أشرب لي قهوة ، وفي أثناء أنا ماري علي المرضى شفتها قاعدة تحت وبعد مريت عليهم وجيت راجع برضو لقيتها قاهدة في محلها وشكلها كان مهمومة كدا نزلتا شلتا كوبين قهوة ومشيت عليها وما شافتني إلا لمن وقفتا قصادها ومديت ليها كوب القهوة قالت لي ما كان ف…قاطعتها وقلتا ليها ما بتشربيها؟؟ قالت لا ما… قلتا ليها خلاص ما تحرجبني وشيليها شالت الكوب وإبتسمت قالت لي شكرا وقفتا وأنا ماسك الكوب بتاعي وإتكلتا علي العربية ، قلتا ليها شايفك من قبيل قاعدة هنا مريت علي كل مرضاي ولسا لقيتك في مكانك خير مالك!؟؟ قالت لي ماف حاجة قلتا ليها لو قلقانة علي عمتك بخير هي الحمدلله ودكتور علي قال بكرة بإذن الله حيكتب ليها خروج من المستشفى ، قالت لي ااي الحمدلله ، كانت ماسكة الكوب بيديها الإتنين شربت منو حبة ونزلتو ولسا هي سرحانة نفسي أعرف مالها!؟ قلتا ليها وأنا عارف كويس بس كنتا عايز اتكلم معاها إنتي دكتورة ولااا كدا لانو يعني مر علي كم موقف منك ومعلوماتك الطبية ماشاء الله ، ضحكت ضحكة قصيرة وباهتة قالت لي لا بس بحب المجال الطبي دا شديييد ونفسي وأمنيتي كان أقرا طب ما عشان زول بس لأنو فعلا دي رغبتي شديد والله بس الحمدلله ربنا يمكن كاتب لي الخير في حاجة تانية نسبتي ما ساعدتني ومشيت مجال تاني لكن لسا شغفي وفضولي عن الطب موجود بقرأ كتب عنو كتيير بسأل من الحاجات الفيهو وكدا بس ، قلتا ليها حلو شديد طيب وحاليا إنتي بتقري أو شغالة؟؟ قالت لي لا إتخرجتا لي تلاتة شهور ونزلتا درستا علوم في مدرسة أبطال المستقبل مع إنو ما مجالي لكن سديت فرقة لأستاذة بس ، (إتذكرتا إنو دي نفس مدرسة عبودي الطفل الكان متابع معاهو وعملتا ليهو عمليتين ، عشان كدا هو كل مرة بجيني بمعلومة طبية جديدة) قلتا ليها طيب دي حاجة كويسة شديد إنك تكوني ملمة بكم جانب ، ولو كنتي طبيبة او يوم بقيتي إن شاء الله حتعملي شنو!؟ ، ، إتنهدت تتنهيدة طويلة وقالت لي أكيد حاقدم إنسانيتي علي كل شيء في المهنة دي
(جات مرأة مارة قدامنا بتتكلم بالتلفون قالت لالا كان تجيبوهو مستشفى الكفاح ولااا مستشفى دكتور أنور الإتنين سمحات )، شفتها إبتسمت بإستنكار وقالت براحة السماحة ما كل حاجة ، جاني فضول أعرف السبب قلتا ليها مستشفى دكتور انور مالها!!؟؟ قالت لي يا ريت لو كل الدكاترة والممرضين والمسعفين وكل الطاقم الطبي بقدموا إنسانيتهم علي عملهم ، يا ريت لو بعاينوا للمريض وحالتو قبل يفكروا في نفسهم او مرتبهم او وظيفتهم ، يا ريت لو كل مريض بقدر يتعالج من غير يعاني بسبب عدم توفر الأدوية او الأجهزة اللازمة والعلاجات ، لو كل الأطباء البدخلو المجال دا برغبة او زي الأغلبية بدون رغبة وإنجبرو عليهو يخلصو علي الأقل في عملهم ويخافو الله في المريض القدامهم دا مش يتعاملوا معاهو وكانو حاجة كدا مفروضة عليهم ومتين يتخلصوا منها وحتى ما يركزو في تسخيصهم ويكتبوا ليهم علاج بدون نفس يمشوهم بس في حين إنو المريض ختا ثقتو كلها في الدكتور علي الأقل لو ما إختفت الأخطاء الطبية تقل ، ، ، كتااار كانوا ضحايا لعمليات غلط او حاجة إتنست جوا أجسادهم ، كتاار حصلت ليهم عاهات مستديمة بس بسبب علاج غلط او جرعات زايدة????
علي قدر ما الطب دا مهنة دايرة صبر ومجهود لأنو إنتا بتتعامل مع أجزاء دقيقة شعيرات وأوردة وشريايبن وأقل خطأ ممكن يسبب كارثة ومشكلة تانية ، وكمان مهنة دايرة قوة قلب علي البتشوفو من أمراض وحالات بتجيك وحوادث وغيرو ، ما بننكر إنو الأطباء مرات بتجيهم إساءات وتعامل ما حلو بجيهم من أهل المريض وهو بكون عمل كل البقدر عليهو لكن في ناس بتنظر للدكتور علي إنو معجزة إنو كيف ما عالجتا مريضنا!؟ كيف ما ممكن!؟ لييه عملية!؟ وناسين إنو هو سبب بس وربنا القادر علي كل شيء❤، ، ، ، ( كلامها دا ما قعد أسمعوا باضاني لااا قعد يدخل جوا قلبي بكل حب وبتحفر جوا عقلي) ، قلتا ليها طيب لو كنتي محل دكتور انور حتعملي شنو!؟؟؟ ، قالت لي المستشفى ما دام حقتو المفترض يشوف نواقصها حتى لو ما فاضي يشوف الإشراف والحالات الما بقبلوها أو الما بدخلوها أصلا بس بسبب التكاليف ، ما بنحكم عليهو ساي المستشفى كاملة ماشاء الله ما ناقصها كتير لكن للأسف ما فيها جناح خاص بالناس المساكين او تبرعات للناس العندهم عمليات وما قادرين يدفعوا الرسوم ، صاح هو لو عمل كدا ما بساعد الناس كلهم ولااا الناس الظايرين مساعدة حينتهوا لكن بكون علي الأقل قدم كتييير وخدم ناس وأنقذ محتاج
(كانت بتتكلم وهي سرحانة وخاتة يدها علي حنكها والكلام دا حاسيهو بطلع من جواها بكل ثبات وثقة وحزن في نفس الوقت)
__بعد خلصتا كلامي إنتبهتا إنو سكت وما قال حاجة تاني او سألني قبلتا راسي عاينتا ليهو لقيتو بعابن لي بإبتسامة وثبات كمان متكل علي عربيتو بعد خلص قهوتو ومربع يدينو شتتا نظري ولقيتو لسا بعاين لي لمن إتوترتا عديل يااخ الحمدلله إنو جاء واحد شكلو دكتور ناداهو ويا ريت لو ما جاء قال ليهو دكتور انور من قبيل بفتش فيك
طبعا أنا إتصمغتا زاتو وتقول كشحو فيني موية قمتا سريع مشيت من جمبهم لمن طلعتا فوق ومشيت شوية من نظرهم لقيت ممرضة سألتها قلتا ليها الدكتور داك إسمو منو وأشرتا ليها عليهو ، قالت لي دا دكتور أنور صاحب المستشفى دي قلتا ليها طيب أكرم دا ياتو!؟ قالت لي ما عندنا دكتور هنا إسمو اكرم تاني ضحكت وقالت لي آااه دا دكتور علي بس بناديهو كدا وفاتت قلتا واااي أنا زاتي هبلة إنفتحتا معاهو في الكلام وبنتقد فيهو وفي مستشفاهو قدامو كمان!!!!؟ تاني قلتا ياخ لكن أنا ما قلتا حاجة غلط دا الحاصل فعلا ومشيت لناس أمي
دكتور أيمن جاني وأنا لسا بعاين علي محل فاتت ومبتسم قعد يعاين لي كداا بعديها قال لي إنتا ما شكلك وقعتا وما سميت يا زول إنتا إنكفيت بوشك عديييل ، المهم هسا سامعني إنتا؟؟ ، ضحكتا وقلتا ليهو معاك معاك أنا يا أيمن قول ، قال لي في مريض هسا جابوهو بحادث وعندو كسور في العظام وضربة في الرأس برضو ومحتاح عملية بتتطلب وجودك معاي لكن شكلي حأشوف دكتور تاني هههه قلتا ليهو الليلة شنو يا أيمن؟ قال لي الأربعاء قلتا ليهو الجمعة الجاية دي إن شاء الله أنا بصل بيتهم ، قال لي الله االله بخليك مع أحلامك دي لمن نتفاهم بعدين وإتحرك من جمبي طوالي إتحركتا معاهو قلتا ليهو حياتي الشخصية ما بدخلها مع حياتي المهنية دي أرواح ناس يا زول ، قال لي يا سلام عليك يااخ عارف دا سبب نجاحك والله والخلاك تصل هنا بالرغم من إنو المجال الطبي دا ما رغبتك وربنا يوفقك زيادة ياارب ويحقق ليك الأحلام الجديدة????ضحكتا وقلتا ليهو أميين ومشينا علي غرفة العمليات


