طبيبة قلبى

بعديها طلعنا ورجعنا مع عمي وأمل نزلت في نص المسافة قالت حتمشي بيتهم عمي قال ليها خلاص بعد تصلي أضربي لينا يا بتي ورينا قالت ليهو كويس وفاتت، ، ، حبيت العملوا دكتور أنور شدييد وصاح أنا ما كان عندي ليهو مشاعر بس حاليا شكلها بدتت تتكون جواي جد وكونو يصل لحدي البيت من غير كلام كتير معناها هو جد جادي صليت صلاة إستخارة من رجعتا من المستشفى وتاني بالليل وكنتا مرتاحة للآخر وأبوي وأمي لمن سألوني قلتا ليهم لو إنتو ما عندكم مشكلة أنا كمان ما عندي أمي فرحت وزغردت وعمتي برضو وأبوي قال لي ربنا يتم ليك علي خير يابتي ابشر الجماعة ديل✨

سوومة❤من زمان كنتي وين!!!؟؟

لمن مشينا ليهم في البيت وجات داخلة مع إنها ما عاملة حاجة لكن خلتني أسرح فيها غصب عني ولو ما أيمن صحبي دا لكزني كان كلهم لاحظو لي ، الأدب والإحترام ظاهر عليها ودا من أول مرة شفتها فيها وفي كل مرة ، ، بعترف إنو فتحت عيوني شديد علي حاجة أنا طول ما كنتا في المستشفى دي بعيد كل البعد عن الإشراف وأي حاجة فيها بس بجي الصباح بدخل وأبدأ أستقبل المرضى وشكواهم وبتجيني تقارير الفحوصات وبعمل العمليات وما عارف البحصل فيها وفي باقي أقسامها شنو حتى زمن الفطور كل البعملو بطلع أعقم يديني وأغسلهم وبكتفي بحاجة بسيطة وقهوة وأجي راجع تاني وبستمر الحال كدا لحدي أطلع علي البيت بعد أمر سريع علي مرضاي يعني ما قعد ألف وأشوف الحاصل وكبفية التعامل كيف ولااا خطرت علي بالي حاجة زي دي أبدا ، يا حسرة يا أنور حتى لو شايف عملك دا أداء واجب بس وحاجة إتفرطت عليك علي الأقل المفترض فعلا أخلص فيهو وأجرب أحبو ، عشان كدا أول خطوة عملتها نفذتا فكرة سومة لأنها دخلت وإترسخت جواي وفي عقلي شديد عشان كدا الجناح الكنتا حأعملوا لمرضى الكلى قلبتو لجناح خيري متكامل بإذن الله وبعديهو طوالي حنجهز لواحد تاني لأمراض الكلى فكلمتا دكتور ماهر بالفكرة دي وإنو حنتأخر شوية في الأول زعل وجاط لمن حيرني معاهو لكن تاني وافق قال ما مشكلة طيب

__وأنا في المستشفى خلصتا مرضاي لكن قبل أرجع البيت إتصل علي عم محمد أبو سومة وقال لي إنو هي موافقة ياخ أنا بقيت زي الأهبل عديل وتاني قعاد المستشفى زاتو غلبني مرقتا واول شيء مشيت علي المسجد وما عارف زاتو صليت كم ركعة شكر لله وبعديها طلعتا علي البيت ولقيت ناس أمي أكيد عرفوا الخبر وفرحانين ومباركات بعديها دخلتا علي غرفتي وأنا الفرحة ما سايعاني بعد صليت العشاء إتصلتا علي عم محمد تاني وطلبتا منو يديني اتكلم مع سومة بعد أداني ليها قالت لي آلو ، قلتا ليها كيفك وبقيتي كيف ، قالت لي أحسن كويسة الحمدلله ، قلتا ليها أها قرارك شنو!؟ ، سكتت حبة وقالت لي أبوي وراك ليهو ، قلتا ليها ااي عارف بس حابي أسمعها منك والله ، سكتت مسافة بعديها قالت لي بسرعة موافقة وقبل أقول ليها حاجة أدت التلفون لأبوها إتكلمتا معاهو حبة وبعد قفلتا رقدتا في سرير وأنا بتبسم براي وكلمة موافقة دي بتتردد في مسامعي لحدي نمتا …….

بعاين ليك عشان أفهم شنو البيكي

وأنا الدكتور!!! وأطلع بس أنا المرضان بعينيكي❤????

……………….

في شهر بس كل الترتيبات، ، ، الشيلة والتجهيزات ، لحدي حنة العريس وصورو الإترسلت لي ، حنة العروس وإحساس الفرحة و____
إحساس أهلك جمبك وحواليك وبنات أهلك وصحباتك وأي واحدة بتظبط والبتقول للتانية صلحي للعروس التوب بهنا ، ، أي كدا احلى ، ، لا أفعلي داك ، ، ومشاغلات وفرح وفجأة وسط الجوطة دي كلها تسمعوا طااااخ أول ضربة من السلاح وكأنو الضربة الأولى دي ما إنضربت في الهوا إنضربت جوووا قلبك وتحصل لحظة صنة قصييرة كدا وكأنو الناس دي إتصدمت وبعديها يفكو الزغاريد من كل إتجاه والمباركات والبجي يحضنك ويبارك ليك والبكى البجيك لا شعوريا مع كلمة عقدوا عقدوووا ألللف مبروك يا أم العروس ألف مبروك يا خالتها ، يا عمتها ، ولحظة أمك تجي تحضنك وتبارك ليك وتبكى معاهها وصحباتك في البضحك وفرحانة ليك والدمعة في عيونها وبين كل فترة تطلق زغرودة طويييلة ويجوكي بالصف أقرصيني لااا أنا أول ، ، والمفاجأة التانية تسمعني العريس جاء يبارك يا جماعة زحو ليهو أدخل وإنو أبوك بزات نفسو جاء معاهو لحدي غرفتك وبعد يبارك ليك أبوك يقول ليهو إتفضل يا ولدي إتفضل ، وفجأة الغرفة تبقى فاضية وإنتي مدنقرة رأسك تسمعى صوت خطواتو وعطرو السابقو لحدي يقيف قدامك وإنتي ما قادرة ترفعي رأسك ومن دون سابق إنذار يحضنك بفرحة وإنتصار ويقول ليك مبروك علينا يا حلالي ويسلم ليك في رأسك وبعدين يمسك يدينك الأطرافهم بقت باردة من الخوف والتوتر والخجل ويقول ليك ربنا يقدرني أسعدك وطول ما أنا حي دايما حأكون جمبك ومعاك وما يفرقني منك إلا الموت ويرفع يدينك ويبوسهم ويخت يدو في حنكك ويرفع رأسك وياداب عيونك تلاقى عيونو بعد إبتسامتو الظاهرة من جوا قلبو يقول ليك عمري ما حأتخلى عنك ومع جملتو دي بضغط علي يدك وكانو بأكد ليك كلامو ، ، ويسوقك وهو ماسك يدك ويطلع قدام الكل ووسط مباركات وزغاريد وكلمة أبشر يا عريس وجو جميل ولحظة سعيدة متوجة بالحب والفرح ،

 

تمشو تتصورو وتجو راجعين ويسوقك الكوفير بعد دا
وفي جو الكوفير وريحة الأرياح والبخور والضحكات من شباينك يمكيجوك ويظبطو شعرك لحدي ما يلبسوك الزفاف والتاج والطرحة مع رسمة الحنة الفي يدينك ورجليك تجنن ، ويضيفو اللمسات الأخيرة تشوفي نفيك في المرآيا وتلقائيا تبتسمي وتنبهري في نفسك مع تشغيلات صحباتك الما بتخلص وبنات أهلك والتصوير والبتقول ليك أعملي كدا وعايني جاي وتسمعو صوت العربات برا البوري الما داير يقيف تييت تييت تيت وصفافير وزغاريد والعريس جاء ، ، يلا تكوني مقبلة عكس إتجاهو والتوتر مسيطر عالأخر وفوق كل الأحاسيس وخطواتو جاية عليك ويجي يقيف قدامك للحظات وكأنو بستوعب لسا حتى يقول تبارك الرحمن اللهم صلي علي الحبيب المصطفى صلى الله عليه وسلم ماشاء الله قمر قمر ويقرب منك ويسلم عليك ويبوس رأسك ويديك باقة الورد ، وهو بالبدلة والكرفتة حاجة تحفة والجزمة السوداء اللامعة والحلاقة المهذبة والدقن المظبط وريحة العطر ، والساعة في يدو وزاد جمال وكأنو شخص تاني وقبل ما تتطلعو يحصنك ويقرأ عليك آيات ويمسك يدك بكل تملك وإنتي ماسكة بيها باقة الورد ويدك التانية ماسكة بيها طرف الزفاف وتطلعوا وسط صفافير أصحابو اللابسين طقم وكواريك وتشغيلات بصوت عالي والبوري الضارب وعلي العربية المزخرفة ومزبنة وعليها حرفك وحرفو وطول الطريق يكون ماسك يدك ، لحدي ما حصلنا الصالة وترتيبات الدخول مع المصورين الإستقبلوكم من نزلتو من العربية ودخلت الصالة والأضواء وأغنية الزفة حقت الدخول ، ، عروينا يا ما أحلاها زي القمر في سماه………..
وفي نص الصالة الأضواء تطفي وتنور أضواء ملونة وخافتة وبتشكيلات ودخان وفقاقيع والإسلو

___بعديها مشينا علي الكوشة المزخرفة ولبسنا خواتم لبعض وإتواصلت الحفلة بعد كل الأهل باركوا لينا أمي ، أبوي، أخوي ، أعمامي ، خالاتي ، الجيران ، صحباتي وأولهم أمل الما فارقتني ، رقيص شوية وسط الأهل ، والمصور القاعد بالمرصاد في كل لحظة أنور بتكلم معاي فيها وبضحك
__الجرتق مع التوب الأحمر بالذهبي والجدلة والعريس بالجلابية والحنة البتجنن في يدو والزعف الببشر بيهو وعادات الجرتق كلها مع الصينية حقتو الفيها دخان المبخر المتصاعد ودقة الدلوكة مع أغاني السيرة وذكر إسم العريس والعروس كل مرة بالمدح الفيهو بتعلا الصوت بضحكات وزغاريد ولمة الأهل حولك وفال العروس وقراية سورة يس لحدي تتم كل المراسم وتبدي وداع الأهل وأولهم أسرتك بدموع مخلوطة بفرحة وأبوك وأخوك البقولوا للعريس بتي أمانة وأبقى عشرة عليها واوعى يوم تخلي دموعها تنزل و و و……..
وتتوجه العربية وتبعد منهم كلهم لحدي وصلنا الشقة دكتور أنور عاد لي المباركة من جديد تاني وبعد صلينا قال لي أنا للآن ما مصدق إنك بقيتي لي ما تتصوري أنا مبسوط قدر شنو والفرحة ما سايعاني والله يا سومة وانا عارف إحتمال إنتي لسا ما عندك مشاعر تجاهي وبديك مساحتك الخاصة لحدي تتعودي علي بس أنا حأقولها ليك هسا إنو أنا بحبببك يشهد الله وعهد أمام الله تاني ما بفررط فيك ومع الأيام بثبت ليك حبي دا ….

__بحمد الله إنو إدخرتا مشاعري كلهااا للإنسانة الحبيتها من أول حضن حلال ،وكلمة بحبك ، و…، وبقت حلالي الحمدلله ، وأول رسالة أرسلا ليها في تلفونها بعد شلتا رقمها من أبوها قبل صلاة الجمعة كانت فيديو العقد حقنا وبعديهو كلمات مباركة لينا ، ، إحساس الحلال دا جميل جدااا بكل تفاصيلو البقت موثقة في عقلي وقلبي وذكرياتي ومحفورة جواي ولو طال الزمن اللحظات دي ما بنساها…….

هناك من ينتظرك ، ، من يطلبك من الله في صلاوته

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى