ترميم شروخ الروح

_ منا اعتمدت علي حماتي انها هتجيب حد ينضفها.. بس شكلها نسيت.. يلا الصبح بدري هقوم اعملها، وهستأذنك بس تيجي علي العصر مع بابا اكون خلصتها..

_ عصر ده ايه؟ من النجمة هكون عندك ومعايا واحدة تنضفها واحنا معاها وعلى الضهر شقتك هتكون فلة.. وابوكي هخليه يجي متأخر شوية ماتقلقيش..

_ ربنا مايحرمني منك يا أمي..

_ ولا منك يابنتي..

_ طيب ممكن خدمة كمان من بابا وهو جاي؟

_ خير يا حبيبتي

_ عايزاه يجبلي كالون جديد لباب الشقة ونجار يركبه

_ ليه هو بابك في مشـ..ــكلة؟

_ لا بس حابة اغيره وبعدين هقولك السبب، المهم بكره يكون كالون شقتي متغير ومفاتيحه معايا.

_ حاضر يابنتي سهلة..بس اما اجيلك لينا كلام تاني مع بعض، صوتك وحالك مش عاجبني.

_ خلاص لما اشوفك هحكيلك يا ماما..

تنهدت بقلق: ربنا يسترها معاكي يابنتي ويبعد عنك المشاكل.. خلاص اقفلي وروحي نامي مع بناتك وبأمر الله الصبح بدري هكون عندك..

_ تنوري ياغالية، في رعاية الله.

________

أشرقت الشمس وأتت والدة رضوي ومعها سيدة قامت بتنظيف شقتها بالكامل.. وحان دور إنقادها أجرتها كما تستحق..

_ تسلم ايدك يا ام سعيد الشقة بقيت زي الفل..

_ تسلمي ياست رضوي، واي حاجة تحتاجيها كلميني هاجيلك اي وقت..

_ ان شاء الله.. طيب عايزة كام؟

_ أبوكي حاسبها يا رضوى..

التفتت لوالدتها باستنكار: نعم؟ ازاي الكلام ده يا ماما، ذنبه ايه بابا يدفع تمن تنضيف شقتي..

تجاهلتها وهي توجه حديثها للسيدة: خلاص روحي انتي يا ام سعيد.. وزي ما اتفقنا عشرين يوم وتعدي عليا عشان تنضفي الشقة قبل شعبان كل سنة وانتي طيبة..

_ وانتي بالصحة والسلامة ياست الكل..من عيني.. فوتكم بالعافية..

…… ..

_ ليه يا ماما تعرفي بابا أصلا وتخليه كمان يحاسب؟

_ وفيها ايه مش ابوكي؟ وبعدين خلي قرشك معاكي لحد ما جوزك يبعتلك الشهرية..عشان بناتك لو احتاجوا حاجة..

رمقتها بتأثر وقد حل عليها كل ما أرقها الساعات الماضية، فاغرورقت عيناها وهي تغمغم: صحيح.. مفيش احن من الأم والأب علي ولادهم.. ثم عصفت حدقتاها بصيق: بس مش اي “أم”.

جذبتها لغرفة النوم وأجلستها علي الفراش وقالت:

في ايه يا رضوي؟ من وقت ما سمعت صوتك وانا قلقانة.. حصل ايه يابنتي؟

_ هقولك يا ماما.. لازم افضفض لحد قبل ما انفجر من القهر..( سردت عليها كل ما حدث وختمت بقولها) ولما اشتكيتله قالي الكلمتين دول..اتصدمت من سلبية يونس يا أمي.. والشيطان لعب بيا وكنت هجيلك بالليل.. بس استعاذت منه وحاولت اهدي..

_ خير ما عملتي.. اسمعيني يا رضوي.. لو قولتلك اللي حماتك عملته ده عادي أو رد جوزك وتهوينه للأمر مايزعلش ابقي بكدب.. ليكي حق تزعلي وتنقهري.. بس هتخربي بيتك عشان كده؟

_ أمال اعمل ايه يا أمي؟

_ ولا حاجة.. انتي خلاص جيتي وقاعدة في شقتك ومحدش يقدر يمد ايده في قشاية وانتي موجودة.. واللي راح يتعوض.. أنا عندي طقم صيني مابستعملوش هجيبهولك.. والباقي هاتيه حاجة في حاجة ومشي المركب يا رضوي وبلاش تنكدي علي نفسك عشان خاطر بناتك..

_ بس انا مش طايقة حماتي يا ماما ومش مسامحاها في اللي اخدته مني.. المصيبة اني لقيتها واخدة كمان صواني التيفال الغالية بتاعتي..وعبايات استقبال كنت سيباها في دولابي.. طب ما جهاز بنتها متكوم صناديق تحت.. ليه مش طلعت من حاجتها واخدت مني أنا؟

ابتسمت بتهكم: أكيد مش هيهون عليها تاخد من جهاز بنتها طبعا.. انما انتي مرات ابنها.. وهتقول في بالها ماهو يونس معاه وهيجيبلها غيره..

_ ده ظلم وطمع.. حتى لو معاه مش من حق حد يطمع فيه، يا ماما جوزي بيشقي ويتعب جدا والجو نار جهنم هناك وانا شوفت بعيني.. حرام والله اللي بيحصل ده..طب عارفة كمان انها أخدت ألف جنية زيادة على حس تنضيف الشقة؟ للأسف زي ما شوفتي.. ولا جابت حد واخدتهم لنفسها.. مع ان يونس بيبعتلها شهرية كويسة والله.

_ هتعملي ايه طيب أميد بتساعد بيهم ابنها وائل ما انتي عارفة ازاي مدلعاه ،وبعدين مادام قبلتهم خليها تشبع بيهم..

_ ما اهو أخوه الصغير ده كمان كل شوية يقوله عايز فلوس ومزنوق.. وأخر مرة بعتله عشر تلاف جنية عشان النقاشة بتاعته.. ده غير اللي انا معرفوش طبعا ويونس بيخاف يعرفهولي عشان المشاكل..

_ أهم اخوات وأحرار في بعض مالكيش دعوة انتي.. واعملي اللي قولت عليه وربنا يهديهولك..هقوم بقي اتصل بابوكي يجي وهفكره يجيب النجار يعملك كالون الباب كمان..

_ ماشي يا ماما.. وشكرا علي الأكل اللي جبتيه انتي مليتي فريزر التلاجة من كله وكلفتي نفسك..

_ بطلي عبط ده خير ابوكي..وزي ما عملتلك بعمل لاخوكي كل شهر.. احنا لينا مين فين الدنيا غيركم..

_ ربنا يبارك فيكم يارب..

خلاص اتصلي ببابا وانا هاخد حمام والبس قبل ما يجي..

…………

أتى والدها وتم تغير كالون باب شقتها، ثم انقضي اليوم مع والديها وبناتها گ أجمل ما يكون.. وهاتفها شقيقها وزوجته مرحبين بها على وعد بزيارة قريبة في منزلها..

___________

مالك ياضنايا شايل الهم كده ليه من وقت ما رجعت

_ مافيش ياما..

_ يوه.. مفيش ازاي وانت طافي النور وقاعد زي اللي ميت ليك ميت بعد الشر..هتخبي علي امك يا وائل؟

اعتدل يحدثها: بصراحة انا في نصيبة يا ماما.. الفلوس اللي اخويا يونس بعتهالي مع الكام ألف اللي أخدتهم منك راحوا في حوار مصلحة كده مع صاحبي..

دبت علي صدرها: يانصبتي! راحت ازاي يا واد انطق

دخلت شركة معاه وقلنا نجيب جينزات وتيشرتات نتاجر فيها ونكبر القرش وهو قال يجلنا مكسب حلو وان القصة مضمونة.. بس اللي معملناش حسابه أن الأوضة اللي فيها البضاعة تتحرق كلها..مافضلش من البضاعة حاجة.. أنا وهو خسرنا فلوسنا ومع كده اتخانقت معاه وكنت هروح فيه السجن ..لولا الناس حاشونا.. واديني اهو مش عارف هوضب شقتي ازاي وأهل خطيبتي بيستعجلوني في التوضيب.. بيقولوا بقالي سنة ماعملتش حاجة في الشقة غير حبة سباكة وكهربة..

اكفهر وجهها بالهم: ليه بس كده يا وائل.. ده اخوك لو عرف مش هيسكت، ده شقاه برضو ..والدنيا معاه هناك مابقبتش زي الأول..

_ ياما يونس بيقول كده عشان يغزي العين.. بقي واحد شغال في السعودية كام سنة مش معاه خميرة محترمة مكمرها؟

ثم لثم ظهر كفها: وغلاوتي عندك ياماما خليه يبعتلي مبلغ تاني.. واوعدك مش هطلب حاجة بعدها، ولا انتي مش عايزة تفرحي بيه السنادي؟

_ معقول مش عايزة افرح بيك؟ بس ده نزل مراته وبناته بسبب الظروف.. ازاي بقي اقوله ابعت مبلغ لاخوك؟ خصوصا انه بيفضل يلقح بالكلام اني دلعتك ومخلياك تعتمد عليه..

_ طب والحل؟ محدش هيساعدني؟

غامت عيناها ثم قالت:

طيب سيبها على الله يا وائل وهشوف هعمل ايه عشان اساعدك في الأزمة دي..

_______

سلطان النوم يكبلها وهي تضم لصدرها ابنتها الصغري حفصة لتجد من يطرق بابها في الصباح الباكر، فنهضت على مضض تتفقد الطارق بعين ناعسة:

_ صح النوم يا مرات ابني كل ده نوم؟