
الفصل الأول
في إحدى أكبر الفنادق بمحافظة الإسكندرية، وبالتحديد في مكتب (آيتن أنور) مديرة التسويق والمبيعات .. وهي جالسة أمام الحاسوب الخاص بها، تعمل بجدية.
(آيتن) في بداية العشرينيَّات من عمرها وبالتحديد في الرابعة والعشرين، قصيرة القامة، وذلك الفستان باللون الاسود ذو الاكمام يتعدى طوله ركبتيها ليظهر رشاقة جسدها الممشوق، وجهها صغير وبشرتها بيضاء نقية بملامح ناعمة بريئة ..وعيناها باللون الاخضر الممزوج بلون العسل، وخديها يحاكي لون التفاح الناضج.
على الرغم من ملامحها البريئة ، إلا أن شفتيها ممتلئتين قليلاً بطريقة جذابة، مما جعل ملامحها رمزًا لأنثى كاملة بين البراءة والأنوثة، شعرها أسود طويل كالليل.
تخرجت في كلية إدارة الأعمال، وتعمل في هذا الفندق منذ ثلاث سنوات، عملت به وهي في سنتها الأخيرة من الجامعة، عن طريق صديقتها (خديجة) المخطوبة للمدير، فيما هي أثبتت نفسها بذكائها وإتقانها في العمل؛ لتصل إلى هذا المنصب.
قاطعها صوت رنين هاتفها لتجيب برسمية:
-أيوة، لمياء إزَيِّك .. آه (خديجة) بلغتني بكِ.. تمام حبيبتي، شوفي فاضية امتى عشان أرتب مواعيدي ونتقابل، أنا عموما فاضية النهارده .. آه تمام، نتقابل في الوقت ده، أنا هاخلص شغلي وأكلمك ..Ok يا حبيبتي .. باي.
أغلقت المكالمة معها، وسجلت في دفترها الصغير الخاص بها موعد لمياء، ومن ثَمَّ أكملت عملها.
*****
في مكان آخر .. في إحدى الشقق الراقية بمدينة الإسكندرية – أيضا.
كانت (مِنَّةُ) تجلس مع خالتها (أماني).
(مِنَّة) في الثانية والعشرين من عمرها، بشرتها بيضاء، ملامحها جميلة وطفولية، عيونها بُنِّيَّةٌ فاتحة، شعرها غجري بنيٌّ طويل يصل إلى خصرها، قصيرة نسبيًّا، تخرجت هذا العام في كلية الألسن، لكنها لم تبحث عن عمل، فأقصى طموحها أن تجد فتى أحلامها المجهول، تحب خالتها (أماني) كثيرًا، وتتواجدُ عندَهَا أكثر من منزلها.
(مِنَّة) بنظرات زائغة يَمْنَةً ويَسْرَةً:
-خالتو، هُوَّ حمزة في أوضته!
تَطَلَّعَتْ إليها خالتها بشكٍّ:
-آه يا منوش، بس هُوَّ نايم، ومش هيصحى دلوقتي
ابتسمت (مِنَّةُ) بجنان:
-طيب يا خالتو، أنا هادخل عنده أجيب حاجة وهاخرج.
زفرت (أماني) وهي تقول بتحذير:
-لا لا يا مِنَّة، بلاش، عشان (حمزة) مِنَبِّه عَلَيَّا ما أصحيهوش قبل الضهر.
أراحت ذقنها بين يديها:
-ما تخافيش يا خالتو، مش هاكمل ساعة.
شهقت (أماني) بفزع:
-إيه ؟!
(مِنَّة) بضحكة خفيفة:
-بهزَّر يا خالتو .. نص ساعة بالكتير.
حَدَّقَتْ بها (أماني) قائلة بجدِّيَّةٍ:
-(مِنَّة)، قومي روَّحِي.
ضحكت (مِنَّة)؛ لتقول بتوسُّلٍ:
-خلاص يا موني، بلاش أهزر معاكِ، بُصِّي، مش هاكمل خمس دقايق.
(أماني) بتردد:
-خمس دقايق فعلًا؟ .. ربنا يستر!
*****
في مكتب (آيتن):
قاطعها رنين الهاتف – وهي منشغلة ببعض الملفات.
ثم رفعت سماعة الهاتف؛ لتجيب على (حسناء) سكرتيرتها:
-أيوة يا حسناء .. مستر (هاني) عايزني ..طيب هاراجع الـ Report (التقرير) اللي في إيدي وأروح له.
*****
نهضت (مِنَّة)؛ لتدخل غرفة (حمزة) ابن خالتها بهدوء، وهو غارقٌ في نومه .. بينما الأخرى كانت تبحث عن هاتفه، وأخيراً وجدته، ولكن خاب أملها، فهي لم تعرف باسورد هاتفه الجديد، حاولت عدة مرات، ولكنها فشلت أن تعرفه؛ فكان –أيضا- ببصمة الإصبع.
زفرت (مِنَّة) بضيقٍ وهي تضع الهاتف على السرير، وقررت أن توقظه من نومه، ثم جلست على السرير؛ لتحادثه بهدوء:
-حمزة .. يا ميزو .. يلا اصحى؛ هتتأخر على شغلك.
تململ في نومه وهو يضع الوسادة فوق رأسه ليجيب بتذمر:
-عايز أنااام يا ماما، ما لحقتش.
ضحكت (مِنَّة) بطفوليَّةٍ؛ لتعيد تصحيح كلماته:
-أنا (مِنَّة) يا حمزة، وبعدين اصحى بقى، عايزاك بجد.
أجابها بعدم تركيز:
-عايزه إيه يا مِنَّة ..نايم، مش فاضي لك، ولا فايق لمواضيعك التافهة.
ابتسمت (مِنَّة):
-عايزاك تفتح لي باسورد الفون بتاعك؛ عشان أتصور بيه، إنتَ عارف الـ Quality (الجودة) عندي في الكاميرا الأمامية مش عالية، وما بحبش أتصور بيه كتير.
زفر (حمزة) هواءً حارًّا من جوفه:
-يا مِنَّة حرام عليكِ بقى، ارحميني شوية ..أنا مالي بالزفت الكواليتي عندك مش عالي، عايز أنام بقى .. اطلعي برة.
(مِنَّة) بعناد:
-مش هاطلع غير لما أتصور من عندك.
صاح بصوت عال:
-يا مااااما.
دلفَتْ والدتُهُ مسرعةً؛ لتتجه نحو (حمزة) و(مِنَّة)؛ لتفهم ما حدث، قائلةً بحنان:
-خير يا حبيبي، صحيت بدري كده ليه؟!
التفتت (أماني) ناحية (مِنَّة)؛ لترمقها بنظرة عتاب:
-كده برضو يا مِنَّة، مش قولتي مش هاتصحيه!
(مِنَّة) بتبرير:
-والله يا خالتو ماكنتش هاصحيه فعلا، بس لقيته عامل باسورد لموبايله، ومش عارفة أفتحه؛ فصحيته يفتحهولي
زفرت (أماني) بعصبية:
-وأنتِ مالك بموبايله أساساً
تجاهلت كلماتها؛ لتقول ببرود:
-يا خالتو، عايزة أتصور عشان أنزلهم Story على الإنستجرام والواتساب.
(أماني) وهي تسحب (مِنَّة) من ذراعها، قائلةً بحزم:
-يلا يا منوش نخرج برة، ونسيب حمزة يكمل نومه.
لم تستسلم (مِنَّة) لرفض (حمزة)؛ فاقتربت مِنْهُ مرة أخرى، قائلة برجاء:
-عشان خاطري يا ميزو بقى، يلا هاتصور صورتين بس وأديهولك، متخافش، مش هاطول زي كل مرة.
ضغط على أسنانه بغيظ وهو يقول بتحذير:
-اطلعي برة يا مِنَّة، مش هاقول تاني!
خالتها بتنهيدة طويلة:
-مِنَّة، وبعدين بقى، اسمعي الكلام، لما يصحى هاخليه يفتحهولك، أنا مش فاضية لكم.
زفرت (مِنَّة) بصوت شبه باكٍ:
-ماشي يا حمزة، بس خليك فاكر، وأنا خلاص هاروح، وهاريحكم مني
(أماني) بحزن:
-لا يا منوش، استني بس، رايحة فين، إنتِي لسه جاية.
اعتدل (حمزة) متجهاً نحو (مِنَّة)، ثم تناول هاتفه، قائلا بجدية وهو يفتح لها الهاتف:
-صورتين بس يا مِنَّة، عارفة لو زادوا عن اتنين!
حملقت فيه مذهولةً، فقد كانت تتوقع مِنْهُ تجاهلها، ثم قالت بسعادة:
-يا ميزو تسلم لي.. أنا مش مصدقة .. بقولك إيه يا حمزة: ما تعرَّفني الباسورد، وتشيل البصمة دي، بدل ما أتعبك كل شوية.
رفع (حمزة) حاجبيه بدهشة؛ ليجيبها بجدية:
-هاتي يا منة، ما تتصوريش، أنا اللي جبته لنفسي والله.
(مِنَّة) بندم:
-خلاص يا ميزو، بهزر معاك..الله.
ابتسمت (أماني) بحنان:
-هاروح أحضر لك فطار بقى يا حبيبي، طالما إنتَ صحيت.
*****
دلفت (آيتن) إلى مكتب سكرتيرة رئيس مجلس إدارة الفندق (هاني النشار)؛ لتجد (رهف) تخرج من مكتبه.
(هاني) في أوائل الثلاثينيات من عمره، ابن صاحب فروع أشهر فنادق بالبلد، يعمل مديرًا لفرع الإسكندرية، ويعتمد على (آيتن) في معظم الأعمال.
(آيتن) بابتسامة واسعة للسكرتيرة:
-صباح الخير يا رهف.. مستر هاني مشغول ؟
(رهف) بعدم اهتمام :
-ماعرفش .. خليكي أدخل أشوفه عايزك ولا لا
نظرت لـ (رهف) قائلة بسخرية:
-مش أنتِ لسه خارجة من عنده؟ وبعدين تدخلي تاني ليه، ما تطلبيه وخلاص!
رَمَقَتْهَا (رهف) بغيظٍ، ومِنْ ثَمَّ رفعت سماعة الهاتف؛ ليجيبها (هاني) بدخول (آيتن) فورا .. أغلقت سماعة الهاتف لتبتسم (آيتن) وهي تقول بثقة:
-تمام، أنا داخلة يا حبيبتي
لم تنتظر إجابتها، ثم دخلت مكتبه سريعا، وبالفعل كان ينتظرها.
(آيتن) بابتسامة رسمية:
-صباح الخير يا مستر هاني .. إزيك ؟
(هاني) بابتسامة:
-تمام.. ها يا آيتن، إيه الأخبار؟
(آيتن) وهي تناوله الملفات:
-أنا عملت خطة لتسكين الغرف كلها في خلال السنة دي، وطبعا حطيت خطة عشان أرفع مستوى كفاءة الخدمات اللي عندنا؛ عشان نقدر نوصل لمستوى يرضي الـgest (الضيف).
(هاني) وهو يتطلع في الأوراق:
-برافو يا آيتن .. هايل بجد، متحمس جدا للـ Plans (الخطط) اللي عاملاها
(آيتن) بابتسامة:
-ميرسي يا فندم، ده شغلي .. بالنسبة بقى للماركتينج والدعايا، أنا فكرت في كام حاجة والإقتراحات موجودة في الملف.
(هاني) بحماس:
-تمام يا آيتن، هايل بجد، مبسوط منك، كل مرة بتبهريني
لتتابع (أيتن) بجدية:
-كنت عايزة برضو أشرح لحضرتك باقي الـ Plans.
(هاني) وهو ينظر إلى ساعته:
-طب خليها بكرة؛ لأن عندي Meeting (اجتماع) بعد عشر دقايق، لو مش هياخدوا وقت قُولِي.
-للأسف لا، هياخدوا وقت.
(هاني) بتنبيه:
-أهم حاجة بس يا آيتن الشغل يكون قوي ويستاهل، ولازم تشتغلي كويس على التنفيذ، وتاخدي بالك إن كل حاجة ماشية مظبوط، والخدمات تكون professional، وتراقبي كل حاجة كويس.
(آيتن) بثقة:
-متقلقش يا فندم، إن شاء الله كله هينجح .. بعد إذن حضرتك، مش هاعطلك أكتر من كده.
أجابها بحزم:
-تمام، اتفضلي يا آيتن، وبكرة نكمل، ويا ريت بعد كده تدخلي على طول، مش لازم أفضل مستنيكي كتير.
أومأت رأسها بالنفي:
-لا يا فندم .. حضرتك أنا وقفت برة كتير على ما الآنسة (رهف) قالت لي تسأل حضرتك الأول وتدخلني.
زفر (هاني) بغيظ:
-ماشي يا (رهف)، أنا هاتصرف معاها…هي كويسة بس أنتِ عارفة بتحب تعمل شغلها رسمي شوية.
*****
جلست (مِنَّة) تتصفح الهاتف، وتنظر إلى صور شاب معجبة به، هذا الذى أطلق عليه مؤخرا: (الكراش)..
-بتعملي إيه ؟
التفتت (مِنَّة) لمصدر الصوت؛ لترى خالتها واقفة مبتسمة، وقد كانت (مِنَّة) منهمكة بمشاهدة صور الشاب، وكالعادة تخبر خالتها كما تعودت.
(مِنَّة) بهيام:
-باتفرج على صور الكراش الجديد بتاعي يا موني .. بصي، قمر، فيه قمر كده!
ضحكت (أماني) لتسألها بفضول:
-ده الكراش رقم كام بقى يا منوش
(مِنَّة) بتنهيدة عميقة:
-مابعدش يا موني .. بس تقريبا حاجة وسبعين دلوقتي
خالتها بسخرية:
-طب كويس، فكرتك قفلتيهم مِيَّة.
(مِنَّة) بإقناع:
-لا عيب عليكي يا خالتو، من غير ما أقولك، إزاي بس!
(أماني) بلهفة:
– طب إيه يا منوش، احكيلي، شوفتيه فين؟
(مِنَّة) بحزن:
-ده جار صاحبتي، شوفته في عيد ميلادها، بس طبعا كالعادة، بكراش في صمت، ومِن بعيد بس، وماعرفتش أتكلم معاه.
-طب يلا تعالي حضري العصير.
-شوف غدر الخالات!
*****
في إحدى الكافيهات الهادئة
بحثت (آيتن) بعينيها إلى أن وجدتها جالسة وحدها، شعرت أنها هي، بالرغم من أنهم لم يتقابلوا من قبل، فكانت جميلة، وعمرها في اوائل الثلاثينات، ولكن تبدو كأنها مترددة أو خائفة من شيء.
تقدمت (آيتن) إليها ..لتقول بتردد:
-لمياء!
رفعت رأسها إلى (آيتن) مجاوبةً:
-نعم !؟ .. حضرتك آنسة آيتن، مش كده؟
ابتسمت (آيتن) بإيجاب، وهي تمد يدها؛ لتسلم عليها :
-بالظبط كده
ابتسمت (لمياء) بحزن :
-طيب اتفضلي، تشربي إيه الأول ؟
-قهوة مظبوطة
-تمام
ثم نادت النادل، وأخذ طلباتهم.
(آيتن) بابتسامة وهي تُخْرِجُ دفترها وقلمها؛ لتدون بعض الملاحظات:
-طب نبدأ بقى الشغل.. ها، احكي لي يا حبيبتي، بس تحكي لي كل حاجة؛ عشان بتفرق.
(لمياء) بابتسامة باهتة:
-آه .. تمام، أنا اسمي (لمياء)، عندي 31 سنة، عشت مع جوزي أحلى قصة حب في فترة خطوبتنا وبعد الجواز، وخلفنا ولدين ..كانت حياتنا كويسة جدا، وباحاول على قَدِّ ما أقدر ما انشغلش عنه؛ حتى رفضت أشتغل، رغم إن جاتلي فرصة كويسة جدا، بس قُلْت: لأ، أكيد الشغل ممكن ياخدني منه، وكفاية تربية الولاد .. وأنا ماقصرتش معاه في حاجة، برضو اهتمامي بيه وقربي منه زي ما هُوَّ، مفيش حاجة اتغيرت، بحاول على قد ما أقدر أنظم وقتي بينه وبين ولادي وبين اهتمامي بنفسي، بالعكس ده أنا حتى صحابي وقرايبي بيقولولي: احلويتي أكتر بعد الجواز .. اللبس بالبس أشيك حاجة، وبحط اغلى وانضف بيرفيوم وميكب، ووقتي زي ما قولت لك، هو عندي أهم، وباعرف كويس قوي أنظم وقتي معاه، لحد ما في يوم سمعته بيكلم زميلته في الشغل، وبيقولها كلام رومانسي عمره ما قالهولي.. طبعاً اتصدمت صدمة عمري، وانهارت، واتعصبت، وسيبت البيت، وخدت الولاد، لقيته خاف وجالي، وفضل يعتذرلي، وقال لي: ما أقدرش أبعد عنك ولا عن الولاد، ودي واحدة بتحكيله عن جوزها، وإن جوزها بيعاملها ببرود، ومش رومانسي خالص زيه، وساعات بيضربها .. إن شاء الله يضربها بالنار وأخلص منها العقربة دي.
ضحكت (آيتن) على آخر كلماتها؛ لتسألها:
-طب ماحستيش في الفترة دي إنه متغير؟
-انا فعلًا في الفترة الأخيرة لاحظت إنه متغير معايا، ودايما يقول لي: أنا تعبان وعايز أنام، بس أنا كنت باحاول دايما أكون قريبة منه؛ عشان ماحسسوش إن أنا ما صدقت ولا حاجة لحد ما اكتشفت أن هي اللي بتحاول تبعده عني عشان ميقربش مني عشان توافق تفضل معاه .. هو كان حكى لي مرة عن زميلته دي، واللي كنت أعرفه عنها إنها متجوزة، ومعاها بنت .. صدمتي الأكبر بقى أنهم متصاحبين بقالهم سنة.
قاطعتها (آيتن):
-وعرفتي إزاي؟
أجابتها بغيظ:
-مِنْهَا، ما أنا كلمتها، جبت رقمها وكلمتها، قالت لي البجحة: أنا بحب جوزك، ومرتبطين بقالنا سنة .. طب وجوزك ياختي؟ قالتلي لسه هاطَّلَّق مِنُّه.
فكرت (آيتن) قليلًا، ثم ردت:
– شوفي انا ضد انك لما تعرفي تروحي للبنت تهزقيها.. ليه؟ لأنها ملهاش اصلا قيمة و لما تعملي كده بتديها قيمة و هي أقل و أحقر من كده.. صحيح ماحاولتيش توصلي لجوزها وتعرفيه كل حاجة
(لمياء) بندم:
-حاولت، وعملت كده، بس جه على دماغي للأسف .. هايتطلقوا، واللي اكتشفته بقى إن جوزي فضل على علاقة بيها لحد دلوقتي، وسمعته آخر مرة بيقول: إنه هيتجوزها ..واجهته طبعا، وقولتله: قَصَّرْت معاك في إيه .. أنا كنت معاك دايما ..قال لي: إن هو بيحبها، ولو عايزة أفضل معاه ماشي، مش عايزة خلاص.. طبعا العقربة هي اللي فهمته يتصرف كده؛ عشان أنا زي أي ست هارضى إن جوزي يكون موجود معايا وخلاص؛ عشان خاطر الأولاد .. كانت صدمتي فيه كبيرة، معقولة حبيبي وجوزي حد هيشاركني فيه، هيتجوز غيري .. حاولت أَدَخَّل أهلنا قالوا لي: دي نزوة، وماتخربيش علي بيتك، والست الشاطرة تفضل مع جوزها وتستحمل عشان ولادهم، وتحل مشاكها معاه .. ما هو أنا كمان تعبت محدش بيحس بوجعي.
ثم تابعت بصوت باكٍ :
-هافضل أستحمل لحد ما ألاقيه هيتجوز بجد، خلاص .. هو دلوقتي مستنيها تطلق عشان يتجوزها .. أنا عارفة إن قانوناً مفيش حاجة في صفي، حاولت أشوف محامي شاطر .. قال لي: الشرع محلل له يتجوز، ولو حضرتك عايزة ترفعي قضية خلع أو طلاق نشوف الأسباب .. لما حكيت له قال لي: مفيش أسباب مقنعة..
ثم ابتسمت بسخرية:
– هو أصلا ممكن يطلقني من غير قضايا، مش بعيد ده كمان يحصل..
لتغمض عيناها بوجع :
-آااه، هو خلاص باعني.. ده حتى سمعته بيكلمها وبيقولها أنه هيجيبها تعيش في بيتي وانا اقعد عند مامته أو في شقة إيجار
(آيتن) وهي تناولها منديلا؛ لتجفف دموعها:
-اهدي بس يا لمياء، والله أنتِ قمر أصلا .. بس ماعتقدش هيطلقك، هو كان بيهددك بس؛ عشان توافقي.. ولا أنتِ اللي عايزة تتطلقي.
قاطعتها (لمياء) بنفي:
-لا لا، مش عايزة أتطلق طبعا وخلاص .. بُصِّي، هو أنا فعلا عايزة أسيبه، وفعلا مش طايقاه، بس طلاق كده وخلاص وأسيبلها جوزي، لا .. أنا عايزة أنتقم منهم، وفي نفس الوقت يبعد عنها ومايتجوزهاش، أُمَّال أنا جيت لحضرتك ليه.
(آيتن) بأسف:
-بصي يا لمياء، أنا مش هقدر أوقف جوازهم؛ ولكن هعمل حاجات كده تخليه يندم
صاحت (لمياء) بخوف:
-ياريت أرجوكي، دي (خديجة) حكت لي عنك إنك قدرتي تساعدي بنات كتير وانك جبتي حق ستات وبنات كتير أوي.. صحيح انا اقنعتها بصعوبة لأن عرفت أن حضرتك مش اي حد بتشتغلي معاه، وعرفت أنك جبتي حق ستات كتير، اللي القانون في مصر بيكون أحياناً مش في صف الست زي حالتي كدا، وبتنتقمي من الراجل عشان يتعلم الأدب.
أومأت (آيتن) بإيجاب:
-فعلًا، أنا باعمل كده، وهيبقى قدامي حل، واتمنى ينفع، أنا هاراقبه وأراقبها، ولو وصَلْت لأي دليل ضدهم طبعا هنستخدمه في صفك.
-دليل زي إيه؟
(آيتن) بتفكير:
-المهم بس اللي في دماغي يطلع صح، وبعدين أعرفك.
-يعني فيه أمل ؟
(آيتن) بابتسامة تفاؤل:
-إن شاء الله، خليكي متفائلة بس إن حقك هيرجع لك، وهنقدر نمنع الجوازة دي
– كل كلامه وكلامها أن ده شيء عادي وان الشرع محلله أربعة وان كده كده في مشاكل مع جوزها من البداية وهي ناوية على طلاق
-الشرع حلل 4 لظروف و حالات معينة و شرط أساسي العدل و كده كده نادر لما يعدلوا و هو بان نيته من البداية أنه يبعد عنك ولا يقرب منك عشان يهز ثقتك في نفسك عشان واحدة زي دي وعايز يخليكي تسيبي شقتك !! اومال لما يتجوزها هيعمل ايه ؟
– طول ما القانون بيسمح بالتعدد هتفضل الخيانة مشروعة
– القانون أساسه شرع ربنا ..واحنا ماشيين بشرع ربنا وحتى شغلي مش ضد القانون أساساً…الفكرة كلها اني بجيب حق الستات بثغرات معينة لو القانون وقتها مش واقف في صفها…زي ما اوقات القانون مش بيقف في صف الراجل في حالات برضو معينة…وانا شغال تحت ايدي محامية كمان…يعني اوقات بلجأ لحلول قانونية مع النظام بتاعي اللي بتبعه…
لتضيف بتبرير :
-بالنسبة للتعدد انا مش ضده, لأن ده شرع ربنا و محدش يقدر ينكره…الدين هو اللي بيسمح بكده مش بس القانون، بس هما مش بياخدوا من الدين غير مثنى وثلاث ورباع باين ! او لو في أسباب تانية عامة…يعني الست اللي معاه مخلفتش وهو عايز يخلف وهي راضية وهو راضي خلاص براحتهم…مرتاحوش مع بعض ولكن مش عايزين طلاق عشان أولادهم, يعني اسباب تكون مقنعة…لكن في حالتك مفيش اسباب خالص…وهو راجل عينه زايغة..خلاص خليك راجل ناضج عاقل بقى وده مع الأسف بقي قليل أوي في مصر لو خلاص مش طايق العيشة مع المدام أو لقي حب حياته اللي كانت تايهة منه وقتها يتطلقوا بالمعروف و يرتب حياته ويعيد حسباته وميظلمش الست اللي معاه بعدين يتجوز.. لكن خيانة !! تخون الست اللي صايناك وشايلة اسمك وعايشة عشانك انت وولادك وبكل بساطة تجري تسيبها عشان واحدة تانية !
سألتها بتوتر:
– هو حضرتك بتنتقمي ازاي من الرجالة اللي زي كده؟
اجابتها ايتن بنبرة قوية :
– شوفي انا نقطة ضعفي الراجل اللي يجرح ست أو يظلمها… محبش ابداً اشوف ست مظلومة أو مجروحة من واحد
انا بشتغل على تعذيب الشخص الظالم ده نفسيا ومعنويا مش جسدياً خالص…يعني بعمل حاجة تخلي الشخص يتألم ويبكي ويكتئب ويندم على الست اللي معاه
لتضيف بهدوء:
– و بالنسبة لنقطة انك تكملي معاه أو لا دي مش شغلي…دي حاجة تخصك أنتِ…انا شغلي اني اجيبلك حقك لحد عندك..ازاي دي بقى حاجة برتبها انا
وكمان انا مجبرش أبداً راجل يكمل مع ست ده برضو مش شغلي…لأن العيشة مش اجباري
أومأت (لمياء)؛ لتسألها بفضول:
-طيب وبالنسبة لطلبات حضرتك هتكون كام!
هزت (آيتن) رأسها بنفي :
-أنا ماباخدش أي فلوس غير بعد ما أوصل لـ نص خطتي؛ لأن ماضمنش إن دي هتنجح، فطبعا لحد ما أوصل للفكرة اللي هتنجح وأكون متأكدة جدا منها، وقتها هنتفق.. وأنا أغلب العملاء اللي زيك باخد منهم نص المبلغ قبل والباقي بعد ما حقها يرجع لها وطبعا انا طلباتي بتكون أقل من اسعار المحاميين بكتير متنسيش اني مش محامية كمان.. المهم دلوقتي عايزاكي تملي الاستمارة دي، فيها شوية أسئلة ومعلومات كده عن جوزك لازم أكون عارفاها؛ عشان أعرف أشتغل صح..
ثم ناولتها الورقة؛ لتملأها.
يتبع….
*******
الفصل الثاني
في ڨيلا صغيرة مكونة من دور واحد بحديقة رائعة تسكن فيه “خديجة” صديقة آيتن
كانت تخبرها بمشكلة اليوم مع “لمياء” فهي الوحيدة التي تعرف معظم أسرار آيتن الخاصة وشغلها السري هذا، تأخذ رأيها في معظم مشاكل عملائها وأفكارها لمساعدتها
“خديجة” في منتصف العشرينات من عمرها لديها أتيليه فساتين تأجر به فساتينها، وليست مصممة أزياء.. هي فقط تعمل بتأجير الفساتين الجديدة.. خمرية البشرة بملامح هادئة جميلة.. ذات شعر بني ناعم لمنتصف ظهرها، عيون بنية جميلة، متوسطة الطول، تمتلك جسد رشيق
أخرجت آيتن من حقيبتها دفترها، قائلة بتساؤل لخديجة:
-اومال بسام فين ؟
تناولت خديجة الهاتف لتتصل على مدير أعمالها وبنفس الوقت يعمل مع آيتن، وفي خلال دقائق كان أمامهم
-أيوة يا آنسة آيتن
آيتن وهى تصور الورقة على هاتفها :
-بسام هبعتلك دلوقتي بيانات و صورة حد كده على الواتساب تشوفلي حد يراقبه كويس جداً ولو وصلت لحاجة مهمة تبلغني
أومأ بإيجاب:
-تمام
__________________________________
في صباح اليوم التالي
في إحدى الشقق الراقية بالتحديد شقة والد منة..
ابتسم والد منة وهو يعطي “عمر” ابنه مصروفه.. عمر هو الأخ الأصغر والوحيد لمنة ذو الست سنوات، في الصف الاولى الابتدائي
والده بنفاذ صبر :
-متعملش مشاكل بالله عليك يا عمر .. انا زهقت من كتر ما بروحلك المدرسة كل يوم .. اعقل كده ها
ابتسم عمر بمكر وهو يستمع إلى تحذيرات والده ليهمس بهدوء مزيّف:
-حاضر يا بابا
قبّلته والدته من وجنته وهى تهندم شعره البني الناعم الذى يصل إلى أسفل كتفيه، قائلةً بنبرةٍ حانيةٍ:
-يلا يا “مارو” أنزل مع بابا عشان الباص بتاعك زمانه جاي
-حاضر يا ماما
ودعتهم ودخلت غرفة ابنتها ” منة” لتيقظها وقامت بالمسح على خدها ببطء.. قائلةً بصوت عالٍ:
-منوش ..فوقي من غيبوبتك دي.. عشان تيجي معايا مشوار
فركت “منة” عينيها بيديها في محاولة الاستيقاظ لتسأل والدتها بفضول:
-مشوار ايه؟ في عريس!
هتفت أمها بحدة وسخرية :
-دايماً همك علي الجواز كده
زفرت منة بتذمّر:
-اومال أفضل قاعدة معاكي أقرف فيكي ؟
زفرت بضيق:
-لا بصراحة تتجوزي ارحم
قهقهت منة ضاحكة بمزاح :
-شوفتي بقى أنا عندي حق أهو
تجاهلت أمها ردها قائلة بهدوء:
-طب يلا يا خفة.. فوقي كده وخدي شاور وغيري هدومك وافطري عشان هنروح لطنط علا لأنّها عاملة عملية
منة بمرح:
-عندها مُزز طيب ؟
قطبت أمها حاجبيها بانزعاج، وهي تغادر الغرفة قائلة:
-مش هرد عليكي
________________________________
في شقة آيتن
كعادتها ارتدت بنطال أسود وفوقه كنزة أنيقة سوداء .. ملابسها دائما أنيقة ولكن باللون الأسود فهي تعشق هذا اللون مثل لون شعرها الذي لم تفكر لحظة أنْ تغيره، هي منذ فترة لم تستطع إلا حب عملها وشعرها الأسود الطويل و والدتها .. رغم خلافات أمها التي لا تكف عن محاولة إخضاعها لعدم ارتداء الألوان السوداء حتى الفساتين ومعظم الأحذية والحقائب باللون الأسود
صاحت أمها قائلة بضيق:
-نفسي في مرة ألاقيكي لابسة حاجة ألوان كده بدل العزا اللي في دولابك ده ..أو حتى تدخلي عليا كده مرة مغيرة لون شعرك للون فاتح كده زي البنات
آيتن بزهق :
-ماما أنا بحب اللون ده جدا ومعتقدش إن أنا ممكن أغيّره.. وبعدين أنا بشتري أشيك حاجة يعني مش مجرد ألوان غامقة وخلاص ..أما لون شعري ده برضو أنا بحبه جداً ومستحيل أرجعه عسلي تاني
أمها بعتاب:
-ده حتي لما بتحضري فرح ولا حفلة برضو لازم تلبسي فستان أسود وجزمة سودة .. دايماً كده يا آيتن كلامي مبيتسمعش خالص ولا هيتسمع طبعاً
اقتربت آيتن منها وهى تقبلها من وجنتيها بحب لتنقذ ذلك الموقف قبل بدء شجارهم المعتاد:
-لا طبعاً يا ست الكل .. أنتي بس تؤمريني وأنا تحت أمرك
تبدّلت ملامحها للفرح قائلةً بابتسامة:
-بجد يا “ايتونة” يعني خلاص هتسمعي كلامي وتغيري الأسود ده
آيتن بتردد:
-ها .. ااه يا ماما هفكر إن شاء الله وأغيره بس أنتِ ادعيلي
زفرت والدتها بضيق:
-والله؟ ماشي يا ايتن اضحكي عليا بكلمتين
آيتن بابتسامة:
-لا يا ماما أنا أقدر برضو .. يلا باي بقى يدوب ألحق أنزل عشان كده هتأخر
__________________________________
في شقة صديقة والدة منة
هتفت علا صديقة والدتها موجهة حديثها لمنة :
-ازيك يا منة.. كبرتي ما شاء الله ربنا يباركلك فيها وعقبال ما تفرحي بيها كده
اومأت “ناريمان” والدة منى بابتسامة:
-ربنا يخليكي يا حبيبتي وتفرحى بولادك
أشارت “علا” على ابنها الجالس بجانبها :
-ده إيهاب ابني مشوفتيهوش أنتي يا ناريمان
إيهاب بابتسامة:
-ازيك يا طنط ؟
-الحمد لله تمام .. ازيك أنت؟
همست منة بخفوت في أذن والدتها:
-ماما
أمها بتذمّر:
-نعم
منة بهيام:
-مش ملاحظة إنّ إيهاب ابن طنط علا أحلو عن الأول بقى حاجة كده قمر
زفرت ناريمان بضيق :
-يخربيت سنينك اتهدي بقى
قطبت منة حاجبيها بتعجب:
-الله مش بقولك ملحوظة !
هتفت والدتها بتحذير:
-اخرسي مش عايزة اسمع زفت..
إيهاب بصوت عالٍ موجهاً حديثه للجميع:
-هستأذن أنا.. نهاركم سعيد
تمتمت منة لوالدتها بسخرية:
-هو طالع من فيلم قديم ولا ايه !
__________________________________
كانت آيتن تتحدث مع بسّام عبر الهاتف لتستفسر منه عن أحدث الأخبار لزوج لمياء
همست آيتن بدهشة :
-يعني ايه يا بسام بقالك كام يوم بتراقبه معقولة مفيش جديد خالص !
بسّام بتأكيد:
-أنتِ عارفة باخد بالي كويس اوي وبعدين هو بيقابلها في أماكن عامة وطبعا مكنش ينفع أصور حاجة
زفرت بضيق :
-طيب يا بسّام عموماً خلاص هحاول أشوف حل تاني .. باي
ثم أغلقت معه الهاتف وشردت قليلاً لمحاولة الوصول إلى حل لمشكلة لمياء
__________________________________
بعد انتهاء فترة عملها، ذهبت إلى خديجة لتتناقش معها بخصوص مشكلة لمياء
اقتربت خديجة و بـيدها فنجان قهوة لآيتن قدمته لها ثم تناولته الأخرى منها
زفرت ايتن بضيق عندما لم تجد حل لهذه المشكلة:
-انا مش عارفة الاقى حل .. وجوزها مش عارفة أمسك عليه غلطة، وفي نفس الوقت مش عارفة أرد على لمياء بإيه
اقتربت منها خديجة مرتبة على شعرها، وهمست بوقار :
-بس أنا واثقة إنّك هتعرفي تلاقي حل دي مش أول مرة يا حبي .. يلا أنا هسيبك تقعدي شوية مع نفسك علي ما أشوف هاكل ايه عشان جعانة أوي .. اعمل حسابك معايا ؟
زفرت بهدوء عندما لم تجد إجابة منها ويبدو أن ايتن شردت لتفكر في حل مشكلة لمياء فقررت أن تتركها ودخلت المطبخ لتعد طعام سريع
مرت ربع ساعة.. دلفت ايتن المطبخ خلفها، هاتفة بصراخ وسعادة:
-أنا لقيت الحل يا ديچا خلاص
تحوّل هدوء خديجة إلى غضبٍ لتهتف بحدة :
– خضتيني والله
همست آيتن بابتسامة:
– سوري يا روحي بس أنا أول ما جت في بالى الفكرة .. قولت
قاطعتها خديجة بسخرية:
-قولتي ادخل اخض خديجة مرة واحدة مش كده؟
ضحكت آيتن بسعادة لتجيبها بهدوء:
-ابدا يا ديچا .. المهم مش عايزة تعرفى ايه بقى الخطة؟
-ياريت
قصت عليها الخطة التي تساعدها للانتقام من زوج لمياء وانبهرت خديجة وشجعتها على تنفيذها فوراً
آيتن بتردد:
-بس فيه حاجة لازم أتأكد منها الأول بعد كده اكلم لمياء وهقولها على الخطة دي
__________________________________
في شقة والد منة
كانت واقفة في البلكونة تشاهد خطوبة في العمارة المقابلة لها..اندمجت معهم وخاصةً مع أغانيها المفضلة التي تسمى بالمهرجانات الشعبية كانت تود أن تخرج وتشاركهم ولكن والدها رفض لأنّها لا تعرفهم جيداً وخصيصاً أنّ والدتها لم تحضر
توجهت منة إلى الصالة، وقفت أمام والدها و والدتها، قائلة بشقاوة وعناد طفولي :
-ينفع أنزل أرقص معاهم؟
هتف والدها بانزعاج:
-منة وبعدين .. عيب كده
صاحت منة بتذمر:
-بيرقصوا علي أغاني “حمو بيكا” اللي أنا بحبه
أجابها بسخرية :
-وهى اللي زي دي تتسمي أغاني اصلاً ! بوظتو الفن والله
ردت والدتها بإيجاب:
-مش عارفة بيحبوا الأغاني دي على ايه
هزت رأسها بيأس فهي تعلم جيداً أن الكلام معهم بخصوص اختلافهم عنها لا طائل له، فحدثت نفسها بغيظ:
-حقيقي لولا غضب ربنا كنت قومت فجرتهم
_________________________________
في شقة ايتن
كانت تتحدث مع لمياء في الهاتف لتخبرها ما تنوي فعله
-بصي يا لمياء .. أنا فكرت كده ولقيته حل مناسب جداً وإن شاء الله يطلع اللي في دماغي صح وده اللي أنا هشتغل على أساسه
لمياء بفضول :
-تمام ايه هو ؟
-المفروض تخرجي أنتِ وجوزك والولاد مع بعض وتروحوا مكان عام .. وحاولي تخلي حد من الولاد يزن علي باباه يخرجوا .. وبعد كده وانتوا قاعدين جوزك مثلا هيسيب موبايله أو حد من ولادك يلعب بيه او حتى ياخده معاه .. أو يسيبوا معاكي والكلام ده يحصل سواء في الشارع أو جوه المكان اللي انتوا هتروحوه المهم إنّك تقفلي الفون بسرعة وتخبيه في هدومك و ميبانش خالص إن أنتي اللي أخدتيه.. فاهمة
لمياء بتفكير:
-اه فاهمة .. هو عموماً فيه عيد ميلاد بنت أخت جوزي وعاملينه في كافيه
لمعت عيناها بسعادة:
-حلو أوي وأنا عموما هبعتلك حد لو عرفتي تديله الفون من غير ما جوزك ياخد باله يعني في الزحمة كده
لمياء بتردد فهي حتى الآن لا تعلم ما تنويه ايتن بالضبط:
-وبعد كده حضرتك هتعملي ايه؟ هو كده كده اصلا عامل باسورد لفونه ومن فترة كده كان سايبه مفتوح بالغلط وجيت اشوف عليه ايه معرفتش للأسف لأنّه عامل باسورد لكل التطبيقات عنده من جوه
قاطعتها آيتن قائلة بحذر :
-هقولك بعدين ..بس أهم حاجة يا لمياء إن جوزك مياخدش باله أبداً إنّك أنتي اللى ضيعتي الفون أو خدتيه .. مينفعش خالص يشك فيكي، وأنا برضو هخلي بسّام عينه عليكم
أومأت بإيجاب:
-حاضر متقلقيش
تابعت آيتن بغموض :
-بصى قبل أي حاجة هتنفذيها..هتأكد بس فيه حاجة مش عارفة هتنفع ولا لا
-تمام..هستنى حضرتك تقوليلي أعمل اللي قولتي عليه
-استني مني مكالمة بكرة أقولك إنّه تمام ونفذي .. هو العيد ميلاد امتى؟
-بعد بكرة
آيتن بتساؤل:
-طيب .. آه صحيح هو نوع موبايل جوزك ايه؟
-معاه Oppo Reno 3
__________________________________
في صباح اليوم التالي
دلفت آيتن إلى الفندق..
لاحظت نظرات الإعجاب بعيون زملائها والنزلاء ولكن كالعادة تتجاهل تلك النظرات فهي لم تسلم قلبها إلى رجل ولن تفعل..
كانت تنظر إلى أي رجل في الفندق بشكل متساوي ولم تجد الشخص الذي تسمر نظرها عليه أكثر من ثانيتين لتفكر به بنية الإعجاب !
لتدخل إلى مكتب “امين” مهندس البرمجيات الذي يعمل بالفندق وهي السبب بعمله هنا، في الأساس كان زميلها بالجامعة وساعدها من قبل كثيرا…ويعرف بجزء من عملها السري
نظرت له آيتن قائلة بابتسامة :
-ازيك يا باشمهندس.. ممكن اخد من وقتك خمس دقايق لو فاضي؟
اومأ رأسه بإيجاب.. فتقدمت وجلست مقابله، قائلا بابتسامة:
– ايتن .. اه طبعا اتفضلي ولو مش فاضي يعني افضالك..
آيتن بامتنان:
-شكراً يا امين ..أنا كنت عايزة أسألك علي حاجة كده، هو ينفع أفتح باسورد موبايل من غير ما أعمله سوفت وير
امين بإيجاب:
-اه ينفع بس قوليلي نوع الموبايل وأنا هقولك الباسورد يتفتح ازاي لأن كل موبايل وليه طريقة ده لو أنتي ناسية يعني
-Oppo Reno 3 نوعه
-ممكن تفتحيه بچيميل وممكن بطريقة تانية بس هو ايه الغرض ملفات يعني ولا عايزة ايه من الفون.. يعني ايه الغرض من الفتح ؟
تنهدت قائلة بتبرير:
– عميلة جديدة عايزين نشوف حاجة مهمة على تليفون جوزها..وهو عنده باسورد لموبايله وهي مش عارفة تفتحه وناسية والموبايل محتاجة توصل لحاجات عليه وخصوصاً على الواتساب وصور وملفات محتاجاها
رفع حاجبه بتعجب :
– اها فكرت تليفونها كنت هقولك ما ترجعهم باكونت Gmail والصور من Google Drive
ايتن بضيق:
– لا للأسف
امين بتفكير:
-الموبايل لو هو مقفول وهيتفتح الباسورد من غير ما يتعلمه سوفت وير ويتمسح كل اللي عليه ده بتروحي لحد متخصص سوفت بتوديله الفون وبجهاز اسمه Box بيبدأ يعمل فتح للباسورد..
فكرت قليلاً قبل أن تسأله:
-طيب لو الفون عليه تطبيق قافل كل التطبيقات بـ باسورد!
هزَّ رأسه متفهماً:
-لو فيه تطبيق اللي هو بيقفل كل التطبيقات والواتس مقفول التطبيق ده ممكن نمسحه في حالة واحدة .. إن التطبيق ده ميبقاش قافل الاعدادت يعني يبقى قافل الواتساب اه .. وقافل الصور وقافل الرسايل بس مش قافل الاعدادات..بدخل عليها من مدير التطبيقات وأمسح الابليكشن وممكن من جهاز Box برضو نمسح التطبيق بكل سهولة
سألته بمكر:
-هو الجهاز ده بيفتح اي حاجة في الفون؟
اومأ بإيجاب:
-البوكس ده عبارة عن جهاز صغير كدا بنوصل فيه التليفون وهو بيتحكم في كل حاجة فيه .. معمول لكده يعني ..بيتحكم في الملفات في التطبيقات في كل حاجة يعني بيكون لحالات الطوارئ بس ..اللي هو حد نسي باسورد حد فيه ملفات على تليفونه مهمة .. حد تليفونه باظ ومش بيفتح
سألته بفضول:
-طيب الحوار ده بينفع مع أي نوع موبايل ؟
-اه أي نوع موبايل أندرويد ينفع عادي..لكن iPhone لا
آيتن بتساؤل :
-طيب.. أنت معاك الجهاز ده ؟
هزَّ رأسه بنفي:
-لا مش معايا بس أعرف واحد صاحبي هو متخصص سوفت أصلاً هتصلك بيه وقت ما تحبي و يفتحهولك.. لأن طبعا مش أي حد المتخصص بيفتحله الجهاز وخصوصا أنه هيسألك عن تفاصيل كده.. بس ممكن اضبطها وأخليه يفتحهولك عادي طالما الحوار تبع شغلك
اتسعت ابتسامتها قائلة:
-تمام ياريت
__________________________________
بعد مرور يومين
كانت لمياء تجلس على طاولة في إحدى المطاعم مع زوجها وأولادها لحضور حفلة عيد ميلاد ابنة أخت زوجها، بينما هي مركزة نظرها أمامها بانتباه تحاول ألا تضيع منها فرصة أخذ الهاتف منه، كانت تحاول ترتيب أفكارها وحديث آيتن يتردد في أذنيها، والخوف يتردد داخلها ..
ماذا لو انكشفت وعلم أنّها أخذت الهاتف ! ماذا ستقول له؟
ستضيع آخر امل لديها لأخذ حقها منه .. وأخيرا قررت ألا تضيع تلك الفرصة منها وألقت نظرة على ابنها الصغير الذى قاطع شرودها بسؤاله:
-ماما .. عايز موبايلك اتصور
قبل أن تخطئ وتعطيه هاتفها .. تذكرت جملة آيتن لها بحجة إنّ هاتفها فصل شحنه وتعمدت أن تفصل البطارية لكي لا يفتح هاتفها .. ثم ناولته الهاتف وهي تحاول تشغيله
قائلة بضيق مزيّف:
-يا قلب ماما .. موبايلي فصل شحن
ابنها بتذمّر طفولي:
-أنا عايز أتصور يا ماما بقى
لمياء بخبث :
-طب قول لبابا يا حبيبي
-مش هيوافق
-لا قوله مش هاخد وقت بسرعة و زن عليه جامد هيديهولك
ذهب الطفل إلى والده وبعد محاولات عديدة وخصيصاً أنه لم يتركه حتي أعطاه الهاتف بشرط أن يسترجعه له بعد مرور عشر دقائق..اقتربت منه والدته بعد دقائق لإطفاء الشمع ووقفت بجانب ابنها الذي حاولت أن تشغله بالتورتة والشموع وسحبت الهاتف بهدوء من أمامه دون أن يشعر به فهو تركه على الطاولة وانشغل مع الأطفال .. كان المطعم مظلم الأنوار من الناحية التي يوجد بها عيد الميلاد، لحين انتهاء الطفلة من إطفاء الشمع فهذه كانت رغبتها .. تحركت سريعا بهدوء من جانب الطاولة وأغلقت الهاتف وذهبت عند الطاولة التي وصفتها آيتن و رأت الشاب الذي يرتدي قميص أخضر كما وصفته لها ووضعت الهاتف أمامه ليهز رأسه بتأكيد وذهبت إلى الجانب الثاني سريعاً.. كانوا على وشك إشعال الأضواء .. رفعت يدها تضعها على قلبها وهي تغمض عينيها تحاول تهدئة ثورة قلبها.. فحاولت التماسك كي لا يظهر عليها شيء
بعد دقيقتين اقترب زوجها من ابنه ليأخذ الهاتف منه
أجابه ببراءة:
-كنت حاطه على الترابيزة
حملق به بصدمة، قائلا بغضب :
-نعم ؟ أنت هتستعبط ولا ايه.. فين الزفت !
الطفل بخوف:
-حطيته علي الترابيزة يا بابا وملقيتهوش لما النور جه
أردف بنبرة ساخطة:
-وراح فين يعني اتسرق؟
-معرفش
جذبه من يديه بعنف..كان على وشك ضربه فاقتربت منهم لمياء لتنقذ طفلها المظلوم قائلة بضيق:
-في ايه صوتك عالي؟
جاد بعصبية:
-ابنك المتخلف ده ضيع تليفوني
-ضاع ازاي؟ ده كان لسة ماسكه
هتف بعتاب:
-ما انتي السبب يا هانم لو كنتي شحنتي تليفونك كويس مكنش ده حصل
سحبت طفلها بقوة من يده وسارع ابنها بالارتماء في أحضانها بخوف.. بينما لاحظت أخته و زوجها صوته العالي فاقتربت منهم لتعرف ما حدث
أخته بتساؤل:
-في ايه يا لمياء..حصل حاجة ؟
-موبايل جاد ضاع ومش عارفين راح فين
أخته بتفكير:
-طب ثواني هرن عليه
طلبت رقمه وحاولت الاتصال فسمعت الرسالة المسجلة “الهاتف المطلوب مغلق أو غير متاح”
-مقفول
جاد بسخرية:
-طبعا لازم يتقفل اومال عايزين الحرامي يسيبهولكم .. حد يشوفلي مدير الزفت الكافيه، ويفتحولي الكاميرات اشوف الحرامى او يفتشولي كل الناس اللي هنا عشان أعرف مين اللي سرق التليفون!
شعرت لمياء بتسارع ضربات قلبها و زاد ارتجاف جسدها، فحدث ما لم تكن تحسبه فهو يريد إعادة مشاهدة الكاميرات ليرى ما فعلته به وينكشف كل شيء
يتبع….
*******
مستنية رأيكم وتوقعاتكم وتفاعلكم لايك وكومنت بقى شجعوني ❤️❤️الفصل الثالث
اندهشت أخته من تصرفه .. وفي تلك اللحظة اقترب زوجها منهم وسمع آخر كلماته لينظر لها ولأخيها بعتاب وغضب .. فهو يشك في أقاربه وأصدقائه !
صاح الرجل بغضب شديد:
-ايه اللي أنت بتقوله ده يا جاد .. أنت اتجننت ولا ايه عايزني افتش صحابي وقرايبي عشان تليفونك واتفضح .. عايزني اهزق الناس! لو على التليفون أنا مستعد أجيبلك غيره ومعملش كده أبداً
جاد بسخرية:
-لا شكراً خليك مع صحابك وقرايبك اللي مبيسرقوش.. بس أنا من حقي يفرغولي الكاميرات وأشوف مين إللى أخد الموبايل
زفر بضيق مبررا له :
-الكافيه مفيهوش كاميرات اليومين دول أصلاً بيقولوا فيه عطل .. وأنا مستحيل افتش الناس اللي هنا
شعرت لمياء بالراحة عندما قال زوج أخته تلك الجملة وكأن جبلاً انزاح عن قلبها
وفهمت أن ايتن ذكية وعملت حساب كل شيء
رمق جاد ابنه بنظرة غاضبة قائلاً بصرامة:
-وأنت بقى حسابك معايا لما نروح البيت .. يلا شوفي الواد التاني عشان نمشي
الطفل ببكاء:
-يا ماما انا مش عايز اروح
لمياء بحنان وهي تربت على ظهره، قائلة برقة:
-متخافش يا حبيبي أنا معاك
__________________________________
تقدم بسام نحو الحديقة التي يجلسا بها بخطوات هادئة، أخرج الهاتف من جيبه ثم أعطاه لآيتن لتسأله:
-ها يا بسام… امين فتحلك الموبايل ؟
اومأ بإيجاب:
-اه فتحهولي اتفضلي
-تمام .. اقعد
جلس على الكرسي المقابل لها ليستمع إلى حديثهم
زفرت خديجة بدهشة:
-هتعملي ايه بس فهميني عشان أنا لحد دلوقتي مش فاهمة أنتي عايزة تعملي ايه بالظبط !
آيتن بتفكير:
-استني بس أشوف ايه اللي على الموبايل ده !
أخرجت سماعة الاذن لتسمع التسجيلات وشاهدت المحادثات بينهم والصور
بعد انتهائها من البحث في هاتفه صاحت بصوت عال:
-أخيراً .. كده حلو أوي بجد
خديجة بفضول:
-لقيتي ايه هاه؟
آيتن بمكر:
-لقيت شوية صور للباشا جوزها والست هانم اللي مصاحبها تجنن وطبعاً صور مش عادية ومش بس كده لقيت في المحادثات اللي بينهم تسجيلات وكمان الشات فيه برضو حاجات تنفع
خديجة بتذمّر:
-آيتن أنتي هتستفادي ايه معلش بكل ده ؟؟ما كده كده مراته عارفة علاقته بيها وأهلهم عرفوا خلاص ده حتى جوزها عارف وهيطلقها كمان..وجوز لمياء كده كده هيتجوزها يعني تهديدك له لو بتفكري تعملي كده هيقولك دي هتبقي مراتي وخلاص مالوش لازمة
آيتن بخبث وهى تهز رأسها بنفي:
-لا طبعاً أنا مبفكرش أعمل كل اللي قولتي عليه ده خالص.. أنا لما سألت عليه عرفت أنّه شغّال في شركة كبيرة وماسك منصب حلو أوي ومرتب عالي .. عرفت بقي حاجة مهمة جداً وقتها..و ده اللي خلاني أدور وراه .. أن عندهم في الشركة اللي شغّال فيها أهم حاجة سمعة الموظف لو حصل حاجة هزت سمعته بيتفصل ومش بس كده لما هيروح يشتغل في شركة تانية بنفس مستواهم بيسألوهم ايه سبب الفصل هيقولوا حتى لو كان مستواه في الشركة القديمة كويس جداً ومفيش أي غلطة غير دي هينسوا كل حاجة ويمسكوا في غلطته دي وخصوصاً أنّ الحاجات اللي معايا مش عادية
رفعت خديجة حاجبيها وهي تدعي الفهم أخيراً :
-لا بجد برافو عليكي
-ها عجبتك ؟
-طبعا
تنهدت آيتن بعمق وهي توجه حديثها لبسّام:
-المهم دلوقتي بقى نبدأ الشغل.. ركز .معايا يا بسّام كده !
بسّام بانتباه:
-معاكي اتفضلي
-بص .. من بكرة هتشغل الخط بتاع الموبايل ده و بعدين ترد علي المكالمة بتاعة جوز لمياء وتقوله إنّك فتحت الفون وعرفت كل حاجة عنه وتهدده، هتقوله حظك أنّه وقع في إيد مهندس برمجيات وفتحت الباسورد وشوفت كل حاجة
__________________________________
فى صباح يوم جديد
صوت جرس الهاتف يرن.. ليجيب بسّام بهدوء وهو يعلم أنّه جاد:
-ألو
رد جاد قائلاً بلهفة:
-أيوة .. لو سمحت متقفلش الخط أنا محتاج الموبايل ضروري واللي أنت عايزه هديهولك
قاطعه بسّام بمكر:
-لا أنا مكنتش عايز فلوس .. أنا كنت هرجعلك الفون كده من غير حاجة .. بس من حظك الحلو أنّ الموبايل وقع في إيد مهندس برمجيات وطبعا فتحت الباسورد وشوفت كل البلاوي اللي عليه
تعجب جاد وقال متسائلاً:
-ازاي ده أنا عامل باسورد لكل Application من جوة كمان ولا أنت فتحته بالصدفة
ضحك بسّام ثمّ تنهّد بعمق ليجيبه:
-لا صدفة ايه .. واضح إنّ حضرتك مش متابع .. فيه أجهزة بتفتح التليفونات في حالات خاصة وأنا طبعا فتحتهولك .. بصراحة في الأول كنت هرجعه عادي بس بعد اللي شوفته قولت لا بلاش أرجعه كده علي طول .. مفيش مانع أكسب من وراك حاجة
جاد بغضب:
-ما أنا قولتلك اللي عايزه هديهولك.. في ايه تاني ؟
هتف بسّام بتوجس وهو متحمساً للأمر:
-هتديني كام يعني؟ أنا عايز مبلغ تقيل وحلو .. و إلا الصور والتسجيلات والمحادثات اللي معايا تتعمل منها نسخ وتتبعت للشركة بتاعتك ولمراتك وأهلك
زفر بضيق قائلاً بسرعة:
-لا لا شركة ايه وأهلي ايه ..اهدى بس وخلينا نتفق عايز كام وترجع الفون وتمسح اللي شوفته
ابتسم بخبث وهو يقول باستفزاز:
– 50 ألف كويس ؟
جاد بصدمة أخرجته عن شعوره وتماسكه:
-نعم ؟؟ عايز ضعف التليفون كذا مرة, أنت أكيد مجنون!
بسّام بحدة:
-بقولك ايه ؟ أنا عرضت عليك المبلغ موافق تمام مش موافق هبعتهم للي قولت لك عليهم
سأله بقلق ونبرة صوته مرتجفة:
-وايه يضمنلي أصلاً إنّك هتمسحهم من عندك ومش هتهددني تاني!
تنهد بسّام بنفاذ صبر:
-معنديش ضمانات ..أنا قولت لك اللي عندي وهسيبك تفكر بس ياريت متطولش عليا.. سلام
ثم أغلق الهاتف في وجهه ولم يعطه فرصة للرد كما أخبرته آيتن
__________________________________
بعد مرور عدة أيام
للمرة الثلاثون جرس هاتفه يرن وهو كالعادة يتجاهله، فقرر الرد أخيراً ليحسم الموقف
صاح جاد برسمية :
-نعم .. خير !
ردت الفتاة بدلال:
-ايه يا حبيبي مالك ! لسة خايف؟
زفر بعين دامعة فحياته مهددة بسببها .. فهو يعلم إنّه لم يخسر وظيفته فقط بل سمعته أيضاً:
-أنا مش طايق نفسي .. ولا طايق حد كفاية المصيبة اللي وقعت فيها بسببك
لترد بصدمة غير مصدقة حديثه:
-نعم يا حبيبي بسببي أنا ! ليه كنت لوحدي مثلا ولا أنا اللي هموت عليك ؟
ارتفعت نبرته وتشابهت بالصراخ والحسرة:
-اه انتي اللي كنتي هتموتي عليا .. فضلتي تجريني ليكي لحد ما اتعلقت بيكي وبيتي كان هيتخرب وعلاقتي بمراتي اتدمرت وكسرتها ودلوقتي شغلي خلاص هيتدمر هو كمان وهخسره.. وكله بسببك..بسبب إنّي عرفت واحدة فاجرة زيك
ضحكت بسخرية وندم:
-دلوقت بقيت فاجرة و وقعتك ودمرت حياتك ؟ طب ما أنا كمان حياتي اتدمرت وخسرت جوزي وبنتي عشانك .. وبعدين أنا ماليش ذنب، لأن لو أنت راجل وبتحب مراتك بجد مكنتش مشيت ورا كلامي وبقيت معايا بس عشان أنت شبهي اتلميت عليا
– اه فاجرة .. عشان مفيش واحدة محترمة تكلم واحد متجوز وهي كمان متجوزة، ومين اللي فضلت تتمايص عليا وتحطني في دماغها وفضلت ورايا لحد ما اقنعتني اسيب مراتي وابعد عنها… يا شيخة ده من جبروتك مراتي حلالي منعتيني اقرب منها عشان متبعديش عني
– لا يا حبيبي مش انا السبب ولا طريقتي السبب.. دلوقتي بقيت انا اللي كنت بتمايص؟ وانت ايه ؟ نسيت لما كنت بتزن و تطاردني بالشهور؟ وتتحجج انك تسمع مشاكلي انا وجوزي..
صاح بنفاذ صبر وهو يتنهد بحزن:
-يووووه سيبيني في حالي بقي وشوفي انتي كمان حالك و كفاية لحد كده وياريت في الشغل متتكلميش ولا تتعاملي معايا خالص عشان محدش ياخد باله أو يشك والإثبات يكون بجد
ثم أغلق الهاتف دون أن يسمع أي رد آخر وقام بوضعها في قائمة الحظر حتى لا تحاول محادثته مرة أخرى
لتدمع عيناه بحزن وندم شديد على حاله.. شعر وكأنه فتاة مهددة !
__________________________________
توجهت إلى المطبخ لتساعد خالتها بتحضير العشاء ونقل الأطباق إلى مائدة الطعام..ثم جلست بالقرب من خالتها ونظرت إلى شاشة التلفاز لتشاهد الفيلم
منة بشقاوة:
-البطل من أول الفيلم وهو عمال يبوس إيد البطلة
خالتها باستغراب:
-انتي مالك مستغربة ليه؟ ما هو ده طبيعي مش فيلم رومانسي وبيحبها !
أجابتها منة بمرح:
-عشان تعرفي بس إنّ ماما ضحكت عليا .. قالتلي إن الايدين للمواعين بس وطلعت بتتباس اهو
قاطعها صوت حمزة المفاجئ وهو يرد بتهكم:
-طلعت لإيه يا منة؟
ابتلعت ريقها الذي جف فجأة، قائلة بتبرير:
-ها..ده أنا بقول الايد للمواعين طبعاً ..أنت لازم تكشف علي ودنك يا ميزو بتسمع غلط أوقات
-اه اخدت بالي
خالتها بفضول:
-المهم كمليلي بقي عملتى ايه تاني عند علا
منة بصوت منخفض:
-خالتو حمزة قاعد
حمزة بصوت عال قائلا بسخرية:
-لا قشطة كملى كلام عادي مانا كده كده مبسمعش كويس ولا ايه؟
تجاهلت كلامه ووجهت حديثها لخالتها قائلة بإحراج:
-ها.. ااه لا محصلش حاجة تانية كنت بكراش عليه في صمت وخلاص ..المهم يا خالتو فيه بقى حتة مز سورى بيشتغل فى المطعم اللي قصادنا بكراش عليه وطلعت مش أنا لوحدى إللي بكراش عليه..ده نص بنات الجيران كمان فبحاول أفكر هلفت نظره ازاي قبل ما واحدة من الجيران تأخده مني .. عايزة أوقعه !
ثم نظرت إلى حمزة قائلة بتساؤل:
-صحيح أوقعه ازاي يا حمزة بما أنّك راجل فأكيد عارف؟
حمزة بنبرة ساخطة:
-كعبليه
منة بإصرار:
-هاهاها ايه الخفة دي ! أنا بتكلم جد علي فكرة
تحولت نبرته إلى غضب قائلا بحدة:
-اتلمى ها ! واعقلي شوية عشان لو عرفت أنّك عملتي حاجة هيكون يومك أسود
ضحكت منة :
-ايه الحمشنة دي يا ميزو ما تيجي تديني قلمين بالمرة
هتف بنفس النبرة:
-منة أنا مبهزرش اتلمي شوية ها
منة ببراءة:
-أنا بكراش في صمت بس انت عارف مبعملش حاجة
-ماشي ياختي
منة بابتسامة رقيقة وهى تنظر إلى شاشة التلفاز مرة أخرى:
-الممثل ده انا بعشقه بجد وبكراش عليه ده أنا اتفرجت على نص الأفلام بتاعته ولسة هكمل الباقي حقيقي خد قلبي فعلا
رفعت خالتها حاجبها بدهشة:
-يخربيت سنينك..أنتي مفيش حد مبتكراشيش عليه؟
قهقه حمزة، قائلاً بسخرية:
-لا بلاش منة في موضوع الكراشات ده، عشان هي بتكراش على أي حاجة فيها الروح والله
ضحكت منة بمرح :
-سكر يا ميزو سكر..
لتضيف بغيظ :
– والله لو مكنتش اخويا في الرضاعة كنت هكراش عليك
– فلت منك الحمدلله
– ده انا قمر يابني
__________________________________
كانت تجلس مع لمياء بمقهى نسائي لتعرف آخر الأخبار منها لتحدد متى تنهى هذا الموضوع
سألتها آيتن باطمئنان:
-ها ايه الأخبار يا لمياء ؟ اخدتي بالك من جوزك وتصرفاته كويس اوي الفترة دي زي ما فهمتك
اخذت لمياء نفسا عميقا ثم أخرجته ببطء وهي تجيبها:
-ااه .. جاد أتغير أوي وبقى قريب من ربنا كمان ومبيخرجش بعد الشغل خالص و من يومين كده سمعته بيكلم صاحبته دي واتخانق معاها وتقريبا فركش معاها .. بس فيه حاجة..هو طول الوقت كده متلخبط وحاسة نفسيته مش كويسة ودايما متوتر ومبياكلش كتير اللي هو حاجة بسيطة ويقوم
آيتن بتساؤل:
-طيب وعلاقته بيكي ايه ؟
-بيقرب مني و زي ما يكون عايز يقول حاجة بس مش قادر .. هو انتي هتنهي الحوار ده امتى؟
اخذت نفساً عميقاً ثم قالت هامسة:
– بصي يا لمياء..هفهمك حاجة..أنا شغلي ده…بلعب علي النقطة النفسية للراجل..بعلمه الأدب بطريقة تخليه يلف حوالين نفسه..مش انتقام مادي وخلاص..فاهماني؟
و وقت ما تحسي أنّه خلاص أتعلم الأدب هنهي كل حاجة.. هسيبه كمان كام يوم بس
اومأت برأسها مستسلمة :
-طيب
سألتها آيتن بشك فهي تعلم ان مشاعر الست ضعيفة:
-صعبان عليكي ؟
تنهدت بوجع وهزت رأسها متحسرة:
-لا مقهورة منه .. وفي نفس الوقت صعبان عليا حساه مكسور كده ومتوتر وخايف طول الوقت مش جاد اللى أنا عارفاه..بس كل ما أفتكر اللي عمله فيا بحس إن أنا كده عملت الصح .. أنا مش ندمانة ابداً وحقيقي من غيرك مش عارفة كنت هعمل ايه .. أنا كنت بغبائي فاتحة الطريق لجوزي وليها عشان يتجوزوا وأهلي كانوا معاه وأهله كمان ومحدش كان هيقدر يساعدني .. لولاكي حقيقي كان زماني عايشة عمري كله مقهورة ومكسورة من جوايا بس الكسر إللي جوايا ده بيخف ..كل ما أشوفه مقهور علي نفسه..اه بيصعب عليا بس زي ما أنا مصعبتش عليه هو كمان مصعبش عليا
دمعت عيناها لتكمل:
-أنا عيط كتير اوي و استحملت اني ارجع عن فكرة الطلاق عشان ميروحش مني وماكنش حاسس بقيمتي..أنا ثقتي بنفسي وبيه اتهزت.. بقيت حاسة انه ممكن يرجع تاني
قاطعتها بابتسامة ثقة:
-بس أنتي شايفة دلوقتي بيدوق الوجع اللى هو سببهولك ..ده واحد حياته مهددة .. مش عارف يمارس حياته الطبيعة وطول الوقت خايف ومتوتر وأكيد مش عارف يركز في شغله.. وخلاص فاضل آخر خطوة وهتلاقيه هو اللي راجعلك ندمان.. هو حاليا ضميره بيأنبه من ناحيتك وحاسس إنّ ربنا بيفوقه واتردله اللي عمله فيكي عشان كده بيحاول يقرب منك
– نفسي اعرف ازاي هيقبل على نفسه يتجوز واحدة خانته وهي متجوزة !!
ازاي قابل على نفسه واحدة مش محترمة زيها
-الراجل لما بيحط فى دماغه واحدة بيفضل وراها، محترمة ولا مش محترمة بقى مش فارقة معاه وقتها .. كده كده في اللحظة دي بيكون عينه زايغه بطبعه.
_________________________________
كم يوماً مرَّ عليه ولم يذهب إلى العمل..! هاتفه على وضع الصامت ..لم يعد يتفقد هاتفه خوفاً من الرسائل التي يرسلها له بسام بتهديده، تذكر زوجته هي جميلة بل ملكة جمال ولم ينقصه منها شيئا .. واجباتها تجاهه كانت تقوم بها علي أكمل وجه، حتي لم يتذكر أنها أهملته في يوم .. ورغم ذلك تعرف علي زميلته في العمل وبإغرائها وصراحتها بحبها له بدأ يبادلها نفس الشعور أو توهم أنّه يبادلها وبدأ يقص عليها قصص كاذبة عن نفسه وأنّه تعيس في حياته مع زوجته وهي أيضاً وتطورت علاقتهم أكثر وأكثر حتى وصلت إلى علاقة حب وتخطيط للزواج.. الشعور بالندم يحاصره فزوجته لا تستحق منه كل ذلك !
قطع شروده صوت زوجته لتنبهه برنين الهاتف
ردَّ جاد بملامح حزن مختلطة بالقلق :
-لا ده حد مش مهم
-طيب.. أنت مالك في ايه؟!
أجابها بصوت ضعيف منكسر:
-مالي ازاي يعني! مفيش حاجة
-أنت مش اخد بالك انك متغير ولا ايه !..مبتاكلش خالص ولو كلت بتاكل ربع ساندويتش وبقالك كام يوم مبتروحش الشغل وعلى طول في اوضتك ومبتردش علي الفون وعامله سايلنت وكل ما أسألك مالك تقولي مفيش مفيش.. لا أكيد فيه حاجة أنت مخبي عليا ايه يا جاد؟
زفر بتعب:
-مفيش قلتلك يا لميا أنا بس تعبان شوية
-بجد ؟ مفيش حاجة فعلاً!
أجابها بتردد:
-هو إحنا ممكن نتكلم؟
-طب رد علي الفون بس اللي مبطلش رن ده..وانا هسيبك ترد ولما تخلص اندهلي
قاطعها بنفى:
-لا خليكي .. أنا هرد قدامك عادي عشان اريح ضميري وأعرفك كل حاجة
ثم رد على الهاتف:
-الو..
آيتن بدهشة:
-أيوة.. أخيراً رديت !
جاد باستغراب فهذه المرة كان صوت فتاة وليس صوت الشاب الذي يحادثه كل مرة:
-انتي مين ؟
-انا اللي بتتهرب منها كتير ومش عايز ترد.. مش كفاية هروب من كل حاجة كده حتى شغلك .. ده أنت كده هتخسره من غير ما ابعتلهم الحاجة اللي معايا
-هو انتي تبع الشخص اللي خد الفون
-اه .. اسمع الكلمتين اللي هقولهم لك دول عشان أخلص من الحوار بتاعك ده .. اعتقد أنّك اتربيت صح؟ اتعلمت الأدب وخوفت مستقبلك كله يروح وتتفضح..عموما أنا مش هبعت حاجة لشركتك ولا هفضحك ..بس الست اللي أنت متجوزها دي انضف منك مليون مرة ومتستاهلش واحد زيك.. أنا هكتفي بأنك اتعلمت الأدب وحسيت أنّك اتكسرت.. واتدمرت.. مع إنّ ده ميجيش نقطة في الجرح اللي سببته لمراتك..خصوصاً إنّي شوفت كل المحادثات وفهمت أنها كانت عارفة وأنت كنت هتسيبها عشان خاطر التانية..
اتسعت حدقتيه برعب وندم
لتردف آيتن بصرامة:
-نهايته.. انا مش هعرف مراتك حاجة بالبلاوي اللي لقيتها عندك..
أردفت آيتن ساخرة:
-اعتقد أنّك ندمت او يمكن تمثيل، فلو قررت ترجع زي الأول هعرف وقتها إنّ ديل الكلب متعدلش، ساعتها بقى أنا هخليك تندم طول عمرك بجد، فقدامك حل من الاتنين يا توعدني إنّك ناوي تتغير ومتخونهاش مع حد تاني يا أما تسيبها خالص لو ناوي ترجع للي أنت عايزها وتتجوز؟
يتبع….
ايه رأيكم ❤️ لو وصلتوا البارت لـ 350 لايك وكومنت هنزل اللي بعده على طولالفصل الرابع
قاطعها جاد بحدة ممزوجة بندم:
-لا لا أنا عايز أكمل مع مراتي، مش خوف منك بس أنا فعلا ندمت وعايز مراتي بس مش حاجة تاني
هددته آيتن بتحذير:
-تمام أتمنى تفضل على كدا عشان معايا نسخة لكل حاجة عندي وموبايلك هرجعهولك مع زميلي اللي لاقاه بس برضو هتديله فلوس..وأنا رأفة منّي هنزلك المبلغ، اصل حطيت نفسي مكان مراتك…اللي أنا عملته ده يعتبر قرصة ودن بس
رفعت حاجبيها باستهجان وهي تضيف:
– الصح بقى ان الراجل يكون محترم من نفسه ولنفسه مش خوف من مراته ولا من حد، وانه لو محترم وربنا قلب القلوب وبص لبره وحب واحدة غيرها يبقى ربنا يسهله لو اختار غيرها
ثم أغلقت الخط
بعد صمت دقائق.. تنحنح ليقول بأسف:
-لميا أنا عايز نقطع كل اللي فات ده ونبدأ صفحة جديدة..أنا فعلا ندمت وربنا هو اللي يعلم أنا ضميري مأنبني اد ايه..
قاطعته بغضب :
-اسأل كده نفسك لو كنت أنا الخاينة كنت هتسامحني؟
حقاً لو تبدلت الأدوار لو هي من قامت بالخيانة فهل كان سيسامحها ؟ ولو سامحها هل كان سيعود كما كان بسهولة ؟! لا يوجد شيء أصعب من الخيانة فالمرأة مثل الزجاج كما قال الرسول “رفقا بالقوارير” فخيانتك لها كأنّك أحدثت شرخ في قلبها وهي كأي إنسان يتأثر وخصوصاً بالخيانة..
أمّا هي فالظاهر إنّه بدلاله الزائد لامرأة أخرى وخيانته لها أصبحت ترى أنّه لا قيمة لها
أجابها الإجابة المعتادة والمبرر لأي رجل خائن:
-متقارنيش دي بـدي الراجل حاجة والست حاجة
أجابته بنبرة ساخرة:
-بس الجرح واحد يا جاد..أنت كسرتني
اهتز زوجها بارتباك:
– أنتِ متعرفيش انا حصلي إيه.. انا اتكسرت و اترعبت اليومين اللي فاتوا يا لمياء.. كنت خايف، مكنتش بعرف انام..انا مش هخبي عليكي حاجة وهقولك اللي حصل
ليقص عليها سريعاً ما حدث معه وانهاء علاقته بزميلته
– انت وصلتني لدرجة اني فرحت لما شوفتك مكسور زيي عشان تحس بيا.. أنا كنت فاكرة لما هيجي يوم و تسيبها وترجعلي هسامحك وخلاص هعدي كل اللي فات..بس اكتشفت إنّي مش قادرة انسى..عشان كده أنسب حاجة لينا إنّنا ننفصل بهدوء وخلاص
قاطعها بتوسل وندم:
-لا لا انتي بتقولي ايه ..أنا مقدرش أسيبك أنا فعلاً حسيت بقيمتك متأخر بس فكرة الطلاق دي مستحيل أوافقك عليها
-لو كنت عايز تمشي، قولي وربنا يسهّل لك! الموضوع كان بسيط.. لكن انت مكنتش حاسبها صح
أطرق لحظات:
– هي اللي حاولت معايا..
هزت رأسها مذهولة:
-لا اوعى تقول هي، ده انا هنت عليك أنت… على جوزي وأبو عيالي، هي مالها اصلا !
هي اللي غريبة…هي لو ملقتش منك ريق حلو مكنتش كملت وعشمت نفسها…
هز رأسه بشحوب شديد:
– بس برضو الست عليها عامل..
بصوت ساخر جدا أجابته:
– ليه وانا متجوزة راجل فاقد الاهلية مالوش رأى ولا دماغ!!
ايه اللي يخليها تعملي حساب ومتكلمش جوزي اذا كان هو شخصيا مش عاملي حساب
أطرق لحظة ثم رفع رأسه يحدق بعينين لامعة بالندم والدموع يترجاها:
-اديني حتى فرصة ..وأنّا والله ما هعمل حاجة غلط تاني حتي موبايلي هسيبهولك مفتوح قدامك أي حاجة انتي عايزاها أنا هعملهالك بس فكرة إنّك تسيبيني دي لا
في مجتمعاتنا يمكن أن تغفر خيانة الزوج، لكن خيانة الزوجة لا تغتفر، وهذا ليس من الإنصاف؛ فالخيانة لا تغتفر
هذا قانون البشر
يغفر لهذا ويدين ذاك
أما حكم “رب العباد” الجميع سواء بالعقوبة ذكر كان أم أنثى كما ذكر بالقرآن الكريم
ربنا عز وجل عادل لم يفرق بين رجل أو امرأه بالعقوبة وانما المساواة بين هذا وذاك
_________________________________
كانت منة تجلس في الشرفة مع والدتها تتصفح إحدى مواقع التواصل الاجتماعي قائلة بدهشة وهيام:
-ايه القمر ده اللي بيظهرلى الاكونت بتاعه كتير علي الفيسبوك ..عقبال ما يظهرلى في بيتنا يا رب
-وريني كده
نظرت الأم نحو هاتف منة..قائلة بسخرية:
-ايه الإشكال دي ذوقك يقرف والله
منة بنفي:
-ده قمر على فكرة
صاحت الأم بزهق:
-أنا قولت هفتح الصور ألاقي حاجة عدلة بس بجد ذوقك زفت ..ده سرسجي تقريباً؟
منة بتصحيح:
-سرسجي بس قمر
__________________________________
في اليوم التالي
في الكافيه الذي تقابل به معظم عملائها، كانت تجلس مع لمياء فهذه آخر مقابلة بينهم
لمياء بابتسامة واسعة قائلة بامتنان:
-أنا عايزة اقولك شكراً.. على أنّك غيرتيني.. اللي عملتيه ليا ده خلاني أقوى أنا كنت جبانة وبخاف من المواجهة بس أنا لما عاتبته واتكلمت معاه ارتاحت أوي حسيت أنّي قولت كل اللي نفسي فيه
آيتن بفضول:
-بس أنا مستغربة انتي دلوقتي ناوية تعملي ايه مع جوزك؟
-بصي هو فضل يحاول معايا بكذا طريقة أنّه يراضيني وأنا يمكن حسيت بصدق ندمه بس مقدرتش أسامحه حاسة أنّي لسة شايفاه بيخوني وبشوف الست دي كل ما أبص في وشه عشان كده قولتله يديني وقت أحاول أنسى وأعدي الفترة دي واحنا مع بعض، ولو لاحظت أنّه اتغير فعلاً هسامحه
-وهو وافق؟
اومأت بإيجاب :
-أيوة ما صدق أصلاً ..لأن انا كنت هسيب البيت وهو قالي أنا هسيبك على راحتك خالص لحد ما تاخدي وقت ولما تلاحظي إنكي بجد اتغيرت تديني فرصة نرجع زي الأول
-طيب تمام .. مبروك يا حبيبتي
-حقيقي لولاكي مكنتش هعرف أرجع جوزي ليا وكان هيروح منّي خالص ..فعلاً مندمتش إنّي سمعت كلام صاحبتي اللي جربتك وقالتلي عنك
ثم أخرجت من حقيبتها مبلغ من المال:
-طيب اتفضلي ده باقي الفلوس اللي اتفقنا عليها .. وانتي خلاص نفذتي المطلوب وكدا تمام جداً
آيتن بابتسامة:
-لا طبعاً أنا مش هاخد حاجة منك..حسابي وصلني من جوزك مع بسام..أنا عملت كده عشان يتقرص..وعموما خدي باقي الفلوس بتاعته لأنّ ده كان أكتر من المطلوب بكتير، بس خديهم ليكي انتي، خليهم معاكي
ابتسمت لمياء بسعادة:
-انتي بجد جميلة أوي وذكية كمان..حقيقي مبسوطة أن أتعرفت عليكي
__________________________________
كانت تتحدث مع خديجة على الهاتف في سيارتها
آيتن بسعادة:
-وأخيراً خلصت من مشكلة لمياء
-اه الحمد لله أخيراً بقى، بس انا مستغربة يعني ازاي يخون مراته مع واحدة متجوزة !
ردت بنبرة ساخرة:
-يعني هو الراجل وقت ما يخون هيفرق معاه اذا كان الست متجوزة و لا لا؟!
ما هي لما تكون متجوزة ليه منقولش ان الرجالة بتأذي بعض!!
أردفت آيتن بضيق:
-الست اللي الراجل بيعرفها على مراته مش هي السبب في الخيانة؛ هي مجرد وسيلة عشان تظهر اخلاقه و اخلاصه لمراته
تجهمت ملامح خديجة بحزن:
– بيصعبو عليّ الستات اللي بيلومو الست قبل ما يلوموا اجوازهم..
بتنهيدة طويلة:
-البني ادمين ممكن يغلطوا، بس خيانة الثقة دي اصعب من أي حاجة،وتقليل لكيان الست نفسها..
-عندك حق، المهم يا بنتي قابلي بقى البنوتة اللي خللت دي
– حاضر انا بس مكنتش فاضية
-طيب هبعتلك رقمها حددي معاها ميعاد وقابليها ده صاحبتها جاتلي الاتيليه كذا مرة، وزعلت فكرتني مطنشة أقولك
أومات بوعد:
-حاضر هكلمها وأقابلها
__________________________________
في الكافيه
تجلس أمامها فتاة في منتصف العشرينات، بيضاء، عيناها بني، شعرها بني قصير بالكاد يغطي عنقها، ملامحها حادة وجميلة، تبدو حزينة أو منكسرة قليلا
قاطعهم صوت النادل وهو يعطيهم المشروبات التي طلبوها
آيتن بابتسامة :
-تمام يا شذى احكيلي بقى مشــ..ـكلتك وعرفيني بنفسك الأول
شذى بتنهيدة:
-أنا اسمي شذى عندي 27 سنة وبشتغل في وظيفة كويسة جدا وعايشة مع والدي لأن والدتي متوفية.. من 7 سنين ارتبطت بابن خالة صاحبتي، هو أكبر مني بسنتين..ارتبطنا فترة وكان المفروض أنّه هيخطبني ويكلم بابا وبعدها بكام يوم قالي إنّه بيجهز لمشروع شغل جديد خاص به وكان فيه بنت كانت زميلته في الكلية من دفعته وبيخرجوا مع بعض وبيتكلموا بخصوص شغله الجديد سوا وأنا كنت واثقة فيه..وجيت في يوم لقيت واحدة صاحبتي بتقولي إنّه بيخوني ومقضيها معاها..مسكت موبايله بالصدفة لقيت بينهم رسايل كأنهم مرتبطين وصور خروجات دايما ومقضيها معاها.. واجهته قالي أنا محبتكيش أصلاً.. وانتي كنتي بتصعبي عليا عشان كدا كنت ببعد عنك كتير وأسيبك..وكويس أنّك عرفتي من نفسك..قولتله بس أنا حبيتك مصعبش عليك إنّك كنت بتضحك عليا.. ولما كنت بتقولي بحبك وانتي ليا وغيرتك عليا كل ده ايه ؟؟ قالي بكرة هتنسيني وعادي..كنت كل شوية أضعف وأكلمه تاني وبتوجع منه ويستقوى عليا .. أنا معرفتش أسيطر على نفسي من جوايا وأنسي وأعيش حياتي هو لو كان قالي من الأول أنّه مبيحبنيش مكنتش أتعلقت بيه وفضلت أحبه طول السنين دي.. ده حتي مش حاسس بالذنب خالص وشايف أنّه عادي وايه يعني يكسرني
-مقدرتيش تنسيه كل ده ؟
بدأت الدموع تتلألأ في عينيها:
-صدقيني مقدرتش ..الجرح بيعلم وبيكبر أكتر وأكتر أنا مقدرتش أسيطر على نفسي الفترة دي بقالي سنين مش عارفة أتحرك ولا أعدي كل ده سنين حرفيا بموت كل يوم من الوجع .. الموضوع أيوة خلص بس لسة بحبه وفي نفس الوقت نفسي ارتبط وأحب بس معرفتش ..هو أثر عليا وعلى كل حياتي .. آخر مرة كلمته فيها عشان أخليه يرجعلي قالي جملة كسرتني أوي ..
لقيته بكل قسوة وبرود بيقولي خليكي انتي متدمرة كده أنا عايش حياتي ومبسوط..وقفل معايا
آيتن بمحاولة إقناعها:
-بصي يا شذى طول ما انتي بتحاولي هتفضلي مكانك كده..لازم تاخدي موقف من جواكي قرار مترجعيش فيه ولازم تركزي في شغلك وحياتك واتعلمي حاجات جديدة ومتقعديش لوحدك كتير..حاولي تبعدي عن أي حاجة بتفكرك بيه..فكري كده لما ترجعيله تاني..هل في حاجة هتتغير فعلا؟ وهتكوني سعيدة ولا هيوجعك تاني ؟!
قاطعتها شذى بحدة وهي تهز رأسها يميناً وشمالاً:
-أنا عارفة كل الكلام ده ..صدقيني أنا مش جاية أسمع كل ده ..أنا جايالك عشان تساعديني وأنا تحت أمرك في أي حاجة تطلبيها
آيتن بتساؤل:
-عايزة ايه ؟
شذي بغضب:
-عايزة ادوق “حمزة” كل وجع دوقته في الست سنين دول ..عايزة انتقم منه وأكسره زي ما دمرني
-ازاي؟
-حمزة لحد دلوقتي مرتبطش من يومها.. أنا عايزاه يرتبط وبعد كدا يتجرح وقتها بس هقدر أعيش حياتي طبيعية
آيتن بحدة:
-اهدي كده يا شذي اللي انتي بتطلبيه ده مش صح .. وبعدين اللي انتي طالباه مني ده هيطول أوي وأنا مبشتغلش في النوع ده
عادت تتوسلها من خلال دموعها المتزايدة:
-انتي لازم تنقذيني وتساعديني..أرجوكي انتي الوحيدة اللي تقدري تنقذيني ..خديجة قالتلي عنك كتير أوي وإنّ مشكلتي دي أكيد صغيرة بالنسبة لمشاكل تانية بتجيلك..أنا حياتي واقفة بسببه..أرجوكي ساعديني أنا كنت .. هنتحر بسببه مرتين ..بصي ايدي
شمرت أكمام قميصها لتريها اثار محاولتها للانتحار علي يديها
شهقت لتجيبها بصدمة :
-معقولة انتي حاولتي تنتحري عشانه؟
-مكنش قدامي حل غير كده وكل مرة كانوا بيلحقوني ..أنا تعبت وهو ولا حاسس بيا.. أرجوكي انتي الوحيدة اللي تقدري تساعديني وأنا مستعدة أدفعلك اللي تطلبيه وأكتر
__________________________________
كان والد منة جالساً في صالة المنزل يشاهد التلفاز..فقال بصوت عالٍ لابنه:
-عمر تعالى يا حبيبي عايزك
خرج عمر من غرفته ليعرف ماذا يريد والده منه:
-نعم يا بابا
والده بهدوء:
-أنزل جيب الطلبات دي من السوبر ماركت
-مش فاضي قول لمنة تروح هي
زفر بضيق:
-منة مش هنا ..عند خالتك وبعدين مش فاضي بتعمل ايه يعني الباشا وراه ايه
-ورايا مهمات بجهزلها
رد بسخرية:
-تقصد مصايب يعني.. ده بدل ما تشوف مذاكرتك ودروسك
-أنا مخلص الهوم ورك ومراجع مع ماما
والده بحيرة:
-ما هو ده اللي هيجنني..إنّك رغم كل ده شاطر في دراستك وبتقفل امتحانات وفي نفس الوقت شقي جدا
-دي قدرات يا بابا.. يلا عن أذنك انا داخل أكمل اللي ورايا
هتف بحدة:
-خد يا عمر هنا مش بكلمك .. انزل جيبلي الطلبات دي ومسمعش كلمة تانية يلا
عمر باستسلام:
-طيب ..هات الورقة والفلوس
بعد دقيقتين من خروجه سمع صوت صراخه، زمجر بقوة عندما سمع صوت تأوهه وفتح الباب ليتفاجأ به…
__________________________________
في آتيليه خديجة
آيتن بحيرة:
-ديچا أنا مش عارفة صدقيني ..أنا أول مرة أشتغل في حاجة زي كده
-بس البنت صعبت عليا أوي
آيتن بحزن:
-أيوة ده السبب اللي ممكن يخليني أوافق .. بس الفكرة دي هتطول أوي وهتاخد وقت ده غير ان أنا هظهر في الصورة تقريبا كاملة
خديجة بتفكير:
-طيب ما تجربي يا آيتن..لو معرفتيش خلاص
زفرت بتشتت:
-صدقيني مش عارفة أنا قولتلها هفكر بس مش عارفة أتصرف ازاي، وخايفة تعمل حاجة في نفسها تاني
خديجة وقد انتبهت لشيء في الورقة التي تملؤها كل عميلة لآيتن عن تفاصيل لحياة الشخص، وصورته على الهاتف
شهقت خديجة بدهشة :
-ايه ده! آيتن بصي كده.. عارفة حمزة ده يبقى مين!
يتبع….
********
تفتكره آيتن هتوافق على المهمة دي ولا لا؟
مستنية رأيكم وتوقعاتكم ???? لايك وكومنت وتفاعلكم اللي بيشجعنيالفصل الخامس
هتف بقوة عندما سمع صوت تأوهه وفتح الباب ليتفاجأ به ملقي على السلم فسارع بحمله ودخوله إلى الشقة، قائلا :
-مالك يا عمر.. يا بني مش عارف تنزل بالراحة
والدته بعتاب:
-يعني كان لازم تبعته يا عثمان.. حبيبي أنت كويس ؟
عثمان بقلق وهو يربت علي رجله:
-رجلك لسه بتوجعك ؟
عمر بألم:
-اااه
والدته بتساؤل:
-طب نوديه للدكتور؟
عمر بخوف وصوت شبه باكي:
– لا لا دكتور لا أنا خايف وهبقى كويس
التفت عثمان موجهاً حديثه إلى زوجته:
-طب خلينا شوية جنبه لو محتاج نوديه للدكتور
اومأت ناريمان رأسها بإيجاب:
-حاضر سلامتك يا حبيبي
__________________________________
آيتن بفضول وهى تقرأ الذي لفت نظر خديجة على الورقة:
-ايه ده! بيشتغل في شركة سياحة كبيرة.. وكمان ماسك منصب حلو هناك … دي نفس شركة السياحة اللي رفضت تشتغل معانا قبل كده كمان !
أومأت خديجة بحماس:
-طيب ده كويس جداً ..وقريب من مجال شغلك ..يعني لو قولتي لهاني أصلاً على الشركة دي هيفضل يزن عليكي تشتغلوا معاهم..أنا عارفة دماغ خطيبي
آيتن بقلق:
-أيوة بس دول مبيشتغلوش مع اي فندق..الشركة دي بالذات بتتعاقد مع فنادق مفيهاش أخطاء كتير والـ Reviews عندهم عالية جداً
-طيب أنتوا مش قليلين برضو..هو بس الفترة الأخيرة كان فيه شوية لخبطة بس انتي ضبطى حاجات كتير في الفندق
قطبت آيتن حاجبيها بتفكير:
-مش عارفة أنا هشوف مستر هاني كده ونجرب
_______________________________
دلفت منة إلى غرفة عمر سريعاً لترى ما حدث له وتطمئن عليه
منة بحزن:
-سلامتك يا مارو
نظرت بطرف عينيها إلى عمر وكأنها تكتشف كدبه فهو مازال واقفاً على قدميه يمارس اللعب وكأن لم يحدث له شيء..!
زفرت بعمق قائلة بسخرية:
-ايه ده! ما أنت قرد اهو..لا بس كان حوار حلو وأبوك صدقه صح؟
ابتلع ريقه بصعوبة :
-هششش اسكتي بابا وماما هيسمعوكي
رددت منة بذهول:
-ضحكت عليهم وفهمتهم أنّك اتخبطت ورجلك كانت هتتكسر عشان ايه يعني ! مش عيب كدا؟
عمر بتبرير محاولاً إقناعها:
-أنا ماكنتش عايز أنزل وبابا زعقلي فعملت كده
منة بعتاب:
-بس ده غلط أنت كدبت عليهم وخوفتهم عليك وبابا مأنب نفسه أنه خلاك تنزل وانت ماكنتش عايز.. أنا هروح أقولهم
عمر بتوسل:
– لا لا يا منة بلاش
منة بغضب:
-واللى أنت عملته ده ايه ! لازم أقولهم عشان متكررش الغلطة دي تاني…بتكدب يا عمر !
قاطعها بتسرع مدركاً خطأه:
-مش هعمل كده تاني خلاص أنا آسف
أجابته بشك:
-يا سلام !
-بجد مش هعمل كده تاني
__________________________________
دخلت آيتن مكتب مديرها، فهي منذ يومين أخبرته بالعمل مع هذه الشركة وقد قلق من هذا القرار وتوقع رفضهم ولكن آيتن أقنعته فحددت معهم ميعاد
هاني بابتسامة واسعة:
-أهلاً يا آيتن
آيتن بجدية:
-أنا خلاص حددت الميتنج مع شركة السياحة اللى هنشتغل معاهم.. يوم الأربع
هاني بتنبيه:
-المقابلة دي في منتهي الأهمية.. دي مش مجرد شركة هنشتغل معاها وخلاص دي شركة عالمية ومديرها عنده علاقات مالهاش عدد، لو قدرتى تخليهم يوافقوا وعملنا Deal معاهم دي هتبقي فرصة حلوة أوي للفنادق بتاعتنا
هتفت آيتن بغرور:
-اعتبرهم وافقوا يا مستر هاني
زفر هاني بحذر:
-الموضوع مش سهل كده يا آيتن ..الشركة دي مبتتعاملش مع أي فنادق وخلاص !
همست بثقة:
-و الفندق بتاع حضرتك مش قليل برضو ..وأنا عارفة هقدر أقنعهم إزاي
-أتمنى والله
__________________________________
في الشركة التي يعمل بها حمزة..
كانت آيتن ترتدى جيب سوداء قصيرة تصل إلى ركبتيها، يعلوها قميص أسود أنيق
ذهبت باتجاه مكتب السكرتارية لتستقبلها الفتاة ثم أدخلتها إلى مكتب الاجتماعات وانتظرت قليلا حتى فتح الباب لترى شاب في الثلاثون من عمره، ذو وسامة قاتلة، وطول فارع، وجسداً رياضياً ينبض بالرجولة، بشرته بيضاء، بملامح رجولية جذابة، يمتلك غمازتين عندما يبتسم تزيد من وسامته، عيون زيتونية، وشعره بني كثيف، تخرج من كلية الإعلام، يعمل مدير العلاقات العامة في شركة سياحة كبيرة…
عرفها بنفسه لتكتشف أنّه حمزة ومن ثم جلسا ودخل بعده شاب في نفس عمره عرفت أنّه “يزيد” مدير الشركة وقرر حضور الاجتماع بنفسه معهم، بدأت آيتن الشرح، لفتت آيتن أثناء الاجتماع أنظارهم بأفكارها المتميزة، وتصرفاتها اللبقة.
بعد وقت…
همست آيتن بابتسامة واسعة:
-أتمنى أنّ العروض تكون عجبتكم
يزيد “رئيس مجلس إدارة الشركة” وهو يرمقها بإعجاب بالغ:
-عجبني جداً جداً
رمقه حمزة بضيق فهو يكره تفريق يزيد في العمل وإعجابه لبعض الفتيات..تعب من كثرة محاولة إقناعه إنّ مصلحة العمل دائمًا أهم، ليلتفت إلى آيتن ويجيبها بجدية:
-لكن إحنا محتاجين ندرسه شوية .. حضرتك عارفة إنّ عملائنا مش قليلين و دي أول مرة هنتعامل مع الأوتيل بتاعكم ..عشان كده لازم ندرس القرار ده كويس
آيتن باستغراب، كانت تتوقع إنّ طريقته ليست رسمية هكذا وخصوصاً مع الفتيات، لتجيبه بابتسامة رقيقة:
-تمام مفيش مشكلة
ومن ثم أخرجت الكارت الخاص بها لتعطيه لحمزة :
-و ده البيزنس كارد بتاعي.. ياريت لما حضرتك تفكر وتاخد قرار تبلغني
هتف يزيد متدخلاً:
– تمام و أنا كمان
آيتن بحرج وهي تناوله كارت آخر من حقيبتها:
-ها.. اه اتفضل يا فندم
يزيد بابتسامته المعتادة:
-ميرسي أوي أوي يعني
عقدت آيتن حاجبيها باستغراب:
-على ايه ؟
أردف يزيد مبرراً:
-عشان نورتي الشركة
ابتسمت برسمية وهي تودعهم:
-هستنى رد حضرتكم..عن إذنكم
بعد خروجها تنهد يزيد بابتسامة وهو ينظر اتجاه الباب التي خرجت منه:
-أنا لو أعرف أنّ الجميلة دي موجودة في فندق هاني النشار .. كنت اشتغلت معاهم من زمان و ما كنا رفضناهم قبل كده
زفر حمزة بعصبية:
-مستر يزيد ..حضرتك لازم نفكر كويس عشان ده في وشنا احنا.. لو حصل حاجة هنخسر كتير
صاح يزيد بزهق:
-في ايه يا حمزة مالك! ما أنا مطمن عادي
نظر له حمزة قائلا بسخرية:
-هو حضرتك ركزت في كلامها أصلاً !
تجاهل سخريته قائلا بجدية:
-حمزة حبيبي ركز في الشغل كده وقولي أنت وصلت لإيه واللي شايفه أعمله..بس ياريت توافق عشان الشركة فعلا نورت النهاردة
حمزة بنفاذ صبر:
-هقول لحضرتك نصيحة ..البنات موجودة في أي وقت..لكن الشغل لأ
يزيد بعدم اقتناع:
-امممم لا النصيحة حلوة ..وعجبتني كمان.. بس نسيت تقول بقى إن مش كل البنات موجودة دايما
رفع حمزة حاجبيه في دهشة :
-مش فاهم تفرق ايه دي عنهم؟
تنفس بعمق ليجيبه:
-لا تفرق طبعا ذكية، جميلة، عندها أفكار مختلفة جدا..عشان كده عجبتني وبقوللك وافق…عندها حضور قوي كده غريب يشدك غيرهم
رد حمز بوقار :
-طيب أنا هسأل كويس أوي وهراجع اللي هي قالته.. لو تمام هوافق
__________________________________
في المساء..
في قاعة زفاف
كانت منة تجلس مع حمزة وخالتها لحضور حفل زفاف إحدى أقاربه، امسكت هاتفها وفتحت الكاميرا وهي توجه كلامها لخالتها و حمزة:
-خالتو تعالي نتصور..صورنا أنت يا حمزة
حمزة بنبرة ساخطة:
-ياريت بدل ما انتي مركزة مع نص اللي في الفرح
قاطعته لتقول بمرح:
-ثواني تقريباً فيه كراش
حمزة بسخرية:
-كراش واحد بس؟
ضحكت منة:
-لا كتير .. أنا هروح أتصور مع العروسة بقى حد هيجي معايا ؟
-لا
توجهت بالقرب من العروسان، بينما هي شردت في المصور لثوان، وقفت مكانها لم تتحرك..اقترب منها المصور ببطء قائلا بابتسامة واسعة:
-حضرتك اتصورتي مع العروسة؟
منة بذهول لم تتوقع أن يسألها بنفسه :
-لا ولا لوحدي حتى
ابتسم وهو يقف أمامها ليلتقط صورة :
– طيب هصورك معاها ولوحدك
-بجد؟
المصور بإعجاب:
-أيوه معقولة الفستان التحفة ده ومتصورتيش لسة !
منة بخجل:
-الله يخليك
ضحكت وهو يلتقط لها صورتان
منة بامتنان:
-ميرسي أوي
-هبقى أبعت الصور للعريس والعروسة لما أخلصهم
-تمام ميرسي بجد
-العفو يا قمر
قاطعهم صوت فتاة في أواخر العشرينات من عمرها وهي ممسكة بيد طفلين:
-حبيبي ..محمد ومكة عايزين يتصوروا زهقوني
منة بفضول:
-ايه القمر دول ولاد أختك؟
المصور بابتسامة:
-لا دي مكة بنتي، و ده محمد ابني
اتسعت عيني منة بصدمة :
-وحضرتك المدام طبعا ؟
-اه يا قمر
تركتهم لترجع إلى الطاولة التي يجلس عليها خالتها وحمزة وجلست بجانب حمزة وهي تزفر بغضب قائلة:
-هات صبارة وادفني بسرعة يا حمزة
حمزة بقلق:
– في ايه يا منوش؟
منة بمشاكسة:
-الفوتوجرافر بتاع الفرح أول ما شوفته خد قلبي في ثواني
عقد حمزة حاجباه باستغراب:
– بسرعة كده !
لتجيبه منة بملل:
-وبعدها رجعهولي تاني لما شوفت مراته وعياله بيلعبوا..طلع متجوز الواطي..!
ضحك ليرد عليها بنبرة ساخطة:
-سيئة الاختيار
أومأت منة بغيظ:
-جدا يعني .. يلا راح نسناس..يجي ابن الناس بقى
حمزة بدهشة:
-هو مش كان راح قرد يجي غزال تقريباً..!
-لا ما أنا حطيت التاتش بتاعي
_________________________________
انتظرت آيتن بعض الأيام حتى حادثها حمزة بطلبه مقابلتها ليسألها عن بعض التفاصيل الخاصة بالفندق..
كانت تجلس أمامه في مطعم ويحتسيان قهوة وهي تشرح وتجاوب على كل أسئلته
حمزة بسخرية:
-ده انتي عاملة فيها مدير تنفيذي في الفندق بقى
زفرت آيتن بضيق :
-أنت بتتريق حضرتك ؟
ضحك حمزة، فهو لم يتوقع ذكائها بعملها:
-لا بالعكس ..أنا مستغرب إنّ تخصصك الماركتينج ورغم كده اخدة بالك من كل حاجة في شغلك وتخصصات مش تبعك أصلاً
ضحكت آيتن قائلة:
-طيب ايه ؟ هتوافق على الشغل معانا ولا لأ !
ابتسم ليسألها بغموض:
-مش قبل ما أعرف اشمعنى الشركة دي اللي فكرتي تتعاقدي معانا فيها؟
تنهدت آيتن بثبات..عكس ما بداخلها، فهي لم تتوقع سؤاله :
-لا أبداً.. احنا بس حبينا نغير ونتعامل معاكم
سألها حمزة باستغراب :
-من غير لف ولا دوران..فيه أسباب تانية أنا لسة معرفهاش واظن ده من حقي
آيتن بثبات قوي:
– عاوز تفهم ايه معلش؟؟ عادي شركة زي أي شركة
أجابها بغرور وثقة:
-لا معلش..شركتنا مش زي أي شركة..وانتي عارفة كويس إن إحنا مبنتعاملش مع أي حد.. ومستغرب يعني أن انتوا تطلبوا الشغل معانا من تاني بعد الرفض اللي قبل كده.. مش غريب ده شوية ؟
صاحت آيتن بغضب:
-والفنادق برضو بتاعة مستر هاني مش قليلة..
لتردف بنبرة ماكرة ذكية:
-وبعدين أنت مالك عمال تحقق معايا ليه؟؟ المفروض الموافقة دي في إيد المدير بتاعك أساساً ! ولا حضرتك بقيت مدير الشركة وانا مش اخدة بالي
وضع قدمه على الأخرى.. قائلا ببرود:
– ما كان رد عليكي هو وخلاص..أنا المسؤول عن التعاقدات دي يا انسة آيتن..و ياريت بلاش تتحديني عشان مش هتقدري
زفرت بنفاذ صبر:
-انتهينا خلاص عشان مايضيعش وقتي…حضرتك هتوافق ولا لا ؟؟
يتبع….
*******
ايه رأيكم وتوقعاتكم ????
تفتكره حمزة هيوافق على الشغل معاهم ولا لا ؟
___
لو وصلتوا البارت ده لـ 350 لايك وكومنت هنزلكم البارت السادس قبل يوم السبت ????الفصل السادس
بعد مرور عدة أيام.. فمنذ مقابلتهم الأخيرة وأسلوبه السخيف معها.. لم يخبرها بموافقته للعمل معهم أم لا..فتركها حائرة..تود أن تعرف ما سيحدث؛ لتهاتفها سكرتيرته بموافقتها على بدء الشراكة بينهم، حتى هو لم يتصل بها بنفسه ولا يخبرها بشيء !
فقررت مهاتفته بنفسها
-حمزة ازيك
أجابها بنبرة رسمية:
-تمام.. أخبارك ايه ؟
تنهدت بعمق قائلة:
-كله تمام.. حبيت أكلمك عشان أقولك إنّ مستر هاني عامل حفلة صغيرة كده مع أعضاء شركتك بمناسبة ال Deal اللى هيتم بينا
أومأ ببرود:
-تمام.. هقول ليزيد وباقي الأعضاء
لم يستفسر منها عن الميعاد ولا حتى يسألها عن التفاصيل لتزفر بضيق قائلة :
-الحفلة هتكون في الأوتيل عندنا .. بكرة الساعة 9 PM
حمزة بنبرة ساخرة :
-أنا مسألتكيش أصلاً
ردت بابتسامة صفراء:
– Actually ..انا كنت بأكد الميعاد عشان تبلغ زمايلك ومديرك بس
لتردف بنبرة متجاهلة إياه:
-يلا أشوفك بكرة بقى..
ثم أغلقت الهاتف دون أن تسمع منه رد
_________________________________
كانت أماني تتحدث مع منة على الهاتف لتخبرها بموعد الحفلة
-صحيح يا منة عايزة أقولك علي حاجة.. بس المهم أوعي حمزة يعرف إن أنا قلت لك
منة بثقة:
-عيب يا خالتو ده أنا منة حبيبتك
هتفت بتوجس:
-ما هو ده اللى مخوفني.. بس عموما في أوتيل جديد هيتعاقدوا معاهم وعاملين حفلة صغيرة بمناسبة بداية الشغل بينهم يعني.. فـإيه رأيك تروحي معاه ؟!
منة بهيام:
-الله حفلة.. يعني طبعاً فيها ناس مزز وحاجة حلوة كده
خالتها بتحذير:
-آه طبعا.. يمكن يعجب بيكي عريس حلو كده.. وياريت تكوني على طبيعتك، ولا أقولك بلاش طبيعتك عشان هتفضحينا كده ..بصي خليكي عاقلة يا منوش وهادية واتعاملي بلباقة وأدب ..ومتتكلميش مع حد ولا تسمحي لحد يكلمك.. ولا تفتحتي مواضيع تافهة
أومأت بأدب:
-حاضر يا خالتو متقلقيش
أردفت أماني بتأكيد:
-المهم جهزي فستان شيك كده و ميكب خفيف وتعالي بدرى على 8 مثلا
-حاضر يا خالتو ..يلا باي ..يدوب ألحق أحط ماسكات واجهز نفسي
__________________________________
في المساء
في شقة حمزة
كانت منة ترتدى فستان رقيق باللون البرتقالي فهي تعشق تلك الألوان الفاتحة المبهجة، كان تصميمه يضيق من الخصر و واسع من الأكمام ومن أسفل وطويل يصل إلى قدميها..
لتفرد حرير شعرها البنى الطويل الذي تعدي خصرها بقليل .. وقد ازداد من جمالها وفتنتها .. لم تضع من مستحضرات التجميل الا القليل فهي بطبيعتها جميلة لا تحتاج لأشياء كثيرة، خرجت من غرفة خالتها عندما سمعت صوت حمزة في الصالة
هتف حمزة بصوت عال:
-ماما أنا نازل ..عايزة حاجة من برة ؟
ثم التفت ليجد منة أمامه، قائلا بتعجب:
-ازيك يا منة أنتِ عندنا من أمتى؟
تجاهلت سؤاله قائلة :
-ازيك يا ميزو
سألها بشك:
-أومال إيه الشياكة دي رايحة فين كده ؟
أجابته بشقاوة وطفولية :
-رايحة معاك
حمزة بصدمة :
-مع مين ! أنا ؟
منة بمحاولة إقناعه :
-أيوة يا ميزو ..هو فيه غيرك.. أصل خالتو قالتلي إنّك رايح حفلة
رد بنبرة ساخرة:
-وأنتِ بقي لابسة فستان وحاطة ميكب وعرفتي بالصدفة يا عيني إن أنا رايح حفلة وعايزة تيجي معايا !
-شوفت القدر !
تجاهل كلامها، موجهاً حديثه لوالدته:
-أنا نازل يا ماما ..عايزة حاجة ؟
منة بإصرار:
-حمزة أنا جاية معاك أصلاً
-ايه ده غصب عني !
صاحت بصوت شبه باكي:
-أنت مش فاهم ..أنا من الضهر بحط ماسكات زبادي و قهوة وحاجات تانية عشان الخروجة دي، وفي الآخر مش عايز تاخدني معاك
حمزة باستغراب:
-القهوة اللي بشربها..! حطيتيها ماسك على إيه ؟
أجابته بغرور :
-على وشي.. مش شايفني منورة ازاي..
لتضيف بنبرة مرحة:
-بجد الماسك ده تحفة لا حقيقي فاتك كتير أنّك مجربتوش
زفر الهواء بضيق:
-فاتني ايه يا هبلة أنتِ.. ماسك زبادي وقهوة ايه اللي أحطه؟
ما في جاهز احسن
همست والدته بتوسل:
-خلاص يا حمزة خدها معاك بقى
هز حمزة رأسه بنفي:
-مستحيل يا ماما .. أنتِ عارفة منة وتصرفاتها
والدته بثقة:
-لا يا حبيبي دي قالتلي أنها هتكون عاقلة النهاردة.. أنا نبهت عليها متقلقش
رفع حاجبيه ليقول بتوجس :
-يعني أنتِ اللي معرفاها بقى !
صاحت منة بتبرير:
-ما أنا مبخرجش يا ميزو وصعبت على خالتو فقالتلي ..و دي خروجة جايالي من السما معاك ومش هتحصل تاني غير كمان فترة، خليني اتبسط بقى
لم تعطه فرصة للموافقة أو الرفض فهي في خلال ثوان اخطفت من يديه مفاتيح سيارته قائلة بمرح :
-يلا أنا هستناك تحت في العربية متتأخرش عليا ..عشان محدش يعاكسني وأنا لوحدي كده و زي القمر
ونزلت السلالم بخفة كأنّها فراشة تتطاير.. حتى أنها لم تستخدم المصعد الكهربائي
هذه هي طبيعتها تنظر إلى الأشياء بمنظورها الخاص، كل شيء في عالمها وردي لا يوجد ألم أو وجع دائماً سعيدة
لم يستوعب ما حدث ! فهي وضعته أمام الأمر الواقع ولم يكن أمامه خياراً غير حضورها معه الحفلة، زفر هواءاً حاراً كثور هائج وهو يقول لوالدته بعتاب:
-ماما .. شايفة بنت أختك؟
والدته بحنان:
-معلش يا حبيبي خدها معاك وخلاص يوم وهيعدي خليها تنبسط
صاح حمزة بحدة:
-ماشي يا ماما .. ماااشي
__________________________________
في الفندق
على طاولة واسعة وطويلة، يجتمع عليها أعضاء الفندق والشركة بمناسبة احتفال إمضاء العقد بينهم
كانت منة مندمجة مع شخص يجلس أمامها تبحلق به بإعجاب؛ فرمقها حمزة بغضب وهو يقول لها بصوت منخفض حاد:
-ما تتلمي بقى وبطلي تركزي مع حد
همست بهيام:
-شعره يلهوي على تسريحة شعره يا حمزة .. إيه القمر ده!
هتف بصوت عال موجهاً حديثه لهذا الشخص المعجبة به منة :
-مايكل..هو “يزيد” راح فين ؟
رد مايكل بتركيز:
-مش عارف كان لسة هنا
شهقت منة بصدمة وقالت بهمس لحمزة:
-مايكل! ياربي اسمه مايكل بجد؟
حمزة بسخرية:
-تخيلي
ردت منة بحسرة:
-أنا في حد عامل “بي بي” في حظي على فكرة
زفر بضيق قائلاً بتحذير:
-اتهدي بقي واحترمي نفسك شوية
منة بعتاب:
-اخص عليك يا حمزة ده بدل ما تواسيني !
حمزة بسخرية :
-اواسيكي ايه .. ما أنتِ بتضحكي وعادي أهو
همست ببراءة:
-العين تضحك والقلب حزين يا أخويا
-معلش
التفتت لآيتن الجالسة بجانبها التي كانت ترتدي فستان اسود انيق ويصل إلى ركبتيها، وتضع لمسات رقيقة من المكياج
سألتها منة بفضول:
-لو سمحتي هو درجة ونوع الروچ بتاعك ده ايه؟
زغر لها حمزة بضيق :
-منة اتهدي بقى
منة بتبرير:
-الله! مش بسألها علي نوع الروچ !؟
ضحكت آيتن :
-لا أبداً اسألي براحتك حبيبتي..ده من NARS درجة Red Lizard
ردت منة بطريقة مازحة:
-ميرسي يا قمر ..ده أنا دوخت عليه في محلات اخر العنقود و اتنين ونص
حمزة متأففاً وهو يرمق منة بغيظ:
-يخرب عقلك..كنت متأكد أنّك هتفضحيني محلات “آخر العنقود واتنين ونص” إيه دول!
آيتن باستغراب:
-لا هو مش موجود فيهم طبعا او هتلاقيه كوبي..هتلاقيه في مزايا و المولات الكبيرة أو أي بيدج مضمونة من على الانستجرام
– بس شكله غالي صح
آيتن بتبرير:
-أيوة بس أنتِ ممكن تجيبى روچ من Brand تكون Drug store مش شرط High End يعني وهتلاقيه حلو أوي برضو
تدخل حمزة مبرراً:
– منة بس بتحب بتهزر .. هي بتجيب اصلا اوقات ميكب High End بس هي بتحب تجيب كل الانواع وتستكشف
قهقت منة بضحكة:
– أنا بحب ادعم كل المنتجات
لتردف موجهة حديثها إلى ايتن :
– فين الاماكن اللي فيها الروج بتاعك بقى عشان ده لسه مجبتوش
– في مكان حلو وساعات بيعملوا sale تحفة هتلاقي خصومات هتعجبك اوي، لو تحبي تيجي معايا معنديش مشكلة
هتفت بحماس:
– ياريت.. طب هاتي رقمك بقى
__________________________________
اخذها معه إلى الشركة في اليوم التالي فهذا كان طلب آيتن لتأتى معه، فاليوم هناك اجتماع بين شركتهم والفندق
بعد انتهاء الاجتماع دلف هو و ايتن مكتبه ليجد منة مندمجة بقراءة رواية جديدة رومانسية
صاحت بتذمر وهي تغلق الكتاب:
-مش فاهمة..مش هبطل أحب البطل قبل ما البطلة تحبه ولا إيه !
آيتن بتساؤل:
-هو مين ده ؟
منة بابتسامة:
-أبطال الروايات
آيتن بحيرة ودهشة:
-أنتِ بتكراشي على ابطال الروايات ولا الواقع ولا إيه بالضبط.
رد حمزة بتبرير :
– لا هي بتكراش على نفسها
قهقت ايتن بضحكة لتسألها:
-صحيح يا منة أنتِ إيه مواصفات فتى أحلامك ؟
ردت منة بهيام:
-بصي يا ستي .. أنا عايزاه عصبي، عينيه حادة كالسيف، ملامحه قاسية لكن وسيم، لا يهاب الريح، يخشاه الجميع، ليظهر لي طفلي أنا
حمزة بسخرية وهو يلقي كلمات تهكمية:
-الله يخربيت الروايات اللى طيرت دماغك..مش عايزاه مقرمش من الجوانب وطري من النص بالمرة ؟
منة بشقاوة:
-ياريت هيبقى تحفة
حمزة بنبرة ساخطة :
-ابقي اتغطي كويس وأنتِ نايمة يا منة
لاحظت “آيتن” أن “منة”
أقصى طموحاتها أن تجد شريك حياتها استغربت قليلاً اختلافهم فشخصية “منة” جميلة طفولية ولكن تربط سعادتها بالمستقبل، وكأنها تجلس على محطة تنتظر قطـار الحب يـأتـي لترحـل مـعـه إلـى مُدن بعيدة لم يراها ولم يسمع عنها، فمشكلة “منة” أنها تعرف تمـامـاً ما تنتظر لكنها لا تعرف من الذي تنتظره ؟!
هي تنتظر البطل المجهول الذي قرأت عنه في الروايات و تمنت ان تلتقي بشخص مثله في الواقع او الأبطال في الأفلام الرومانسية..
ولكن ! هـل يجـب علـينا أن نربـط سعادتنا بالمستقبل ؟
وننتـظر قـدوم الشـخص المناسـب حتى نشعر بالحياة ونحبها ؟
الروايات والاغاني الرومانسية التـي تتـغزل لـنا بالحـب فهي تصور لنا عالماً سـاحراً، خيالياً نحقق فيه كل ما نريـد داخلها !
“منة” لديها عالمها الوردي الذي تنتظر فيه حبيبها المستقبلي أو الخيالي..
سألتها منة بفضول :
-وأنتِ بقى يا آيتن معندكيش كراش ولا حبيب؟
-لا أنا سنجل
في هذه اللحظة دخل يزيد “مدير الشركة” إلى مكتب حمزة، ثم تدخل في حوارهم قائلاً باستغراب لآيتن:
-معقولة! ازاي القمر ده لسه سنجل ؟
ضحكت آيتن لتجيبه بثقة:
-عشان أفضل قمر
ضحكت منة:
-ياربي ! طيرتلك جبهتك خلاص .. انا رأيي تدور عليها
يزيد بضحكة صفراء:
-لا هروح أشتري واحدة جديدة
زغر لها حمزة بغضب شديد بعد خروج يزيد من المكتب وهي يطلب من حمزة تقرير ما:
-يخربيت سنينك ده المدير بتاعي
لتجيبه برقة:
-قمر أوي يخربيته ..
لتردف وهي تسأل آيتن مرة أخرى:
-آيتن أنتِ ليه مرتبطتيش؟
ردت بلا مبالاة:
-أنا شايفاهم كلهم بشكل متساوي وملقتش فيهم الراجل اللي يستحق أركز عليه نظري أكتر من ثانيتين وأحس إن هو ده اللي خطفني عنهم كلهم
-بمعنى؟
أجابتها بتفكير :
-يعني لسة ملقتش الراجل اللي يخليني أحس أنه مختلف عنهم
-زي ايه ؟
فكرت قليلا ثم ردت بثقة:
-مش عايزة راجل أكون في ايديه أنا وفي قلبه واحدة تانية وفي عينيه كذا واحدة.. يا أما أكون محتلة كل قلبه وحياته أو يروح يشوف حياته اللي كلها بنات
منة بابتسامة :
-هتحبي لما تحسي بيه .. لما تلاقي اللي يفهم آيتن من جوة مش اللي ظاهر قدام الناس.. اللي يخطفك ويغيرلك إحساسك بالوقت معاه ومن غيره، ويعوضك عن حاجات كتير
-يمكن .. بس الحب مش أولى اهتماماتي.. يعني مش مستنياه ولا حياتي واقفة من غيره..في نفس الوقت مش متعقدة من الحي ولا حاجة بس الفكرة إننا نختار صح
فشخصية “آيتن” كأنها رجل حتى وإن كانت تلبس ثياب امرأة فاتنة وتملك جسدا مغريا إلا أن ذكاءها المشاعري وتحكم عقلها وتفكيرها العاطفي يتفرع عن أصل عقل الرجل فهي تريد أن تستمتع وتعيش حياتها بعيدا عن المسؤولية أو الارتباط.
ترى الحب لا يحقق السعادة التي تصورها لنا الأغاني والروايات الرومانسية !
خطر ببالها فكرة لترى منة من خلالها باستمرار فهي الرابط بينها وبين حمزة، فقررت أن تنتهز الفرصة وتعرف عن طريقها معلومات عنه
يتبع….
مستنية آراءكم وتعليقاتكم إللي بتشجعني????❤️
تفتكره آيتن هتطلب من منة ايه ؟
إيه رأيكم في الفرق بين شخصية آيتن و منة ومين يعجبكم أكتر ؟
كرهتوا حمزة عشان اللي عملوا مع شذى ولا عادي ؟ ????
لو وصلتوا البارت ده لـ 300 لايك وكومنت هنزل البارت الجديد بكرة بدل يوم الاثنينالفصل السابع
– “منة” مابتفكريش تشتغلي؟
ردت منة بلامبالاة:
-لا أنا ماليش في الشغل خالص، أنا مش بتاعة شغل لا
آيتن بمحاولة إقناعها:
-ما هو حمزة قالي كده برضو، المهم يا منوش احنا عندنا في الأوتيل فيه Sponsors مقدمين Italian and French courses للخريجين اللي لسه احتياطي عندنا عشان طبعا اللغة مطلوبة في مجالنا أساسي لأن اوقات كتير بيجيلنا Gguests “نزلاء” أجانب .. فـمنها يدرسوا اللغات المطلوبة دي و في نفس الوقت بنعمل discount “خصم” ليهم وطبعا ده عائد لينا لأن ده بيعمل دعايا للأوتيل و دى كأنت فكرة بتاعتي قررت أنفذها واتفقت مع الاسبونسر اللي مقدمين يشتغلوا معانا ولما اقترحتها لحمزة وافق وحتى دفعلك أول شهر للكورس
أومأ حمزة بتبرير:
-يعني عشان تبطلي التفاهات بتاعتك دي وتتعلمي حاجة مفيدة و أهم حاجة يا منة متعجبيش باللي هيشرحلك ولا حد من زمايلك في الكورس
تمتمت منة بضيق:
-مكنتش هعمل كده علي فكرة ..و اصلاً يعني كان المفروض تاخد رأيي
حمزة بدهشة :
-ليه أنتي مش موافقة ؟
قهقهت منة بمزاح:
-أيوة الفلوس إللي دفعتها في الكورس دي، كان فستان فرحي أولى بيها
زفر بضيق ليجيبها بنفاذ صبر:
-الفستان على العريس يا منة اللي هو لسه مجاش اصلاً
__________________________________
في صباح اليوم التالي
في الفندق وبالتحديد مكتب آيتن، فهذا أول يوم لمنة لبداية الكورس، كانت تتجول بنظرات عينيها إلى جميع من في الفندق
لتسأل آيتن :
-تونا مش ملاحظة حاجة !
آيتن بابتسامة:
-ايه يا منوش؟
ردت منة بإعجاب:
-كل اللي في الفندق رجالة يفتحوا النفس كده، واضح أنّ الكورس ده بداية فتحة خير ليّ
حمزة بنبرة حادة:
-أنتِ جاية تتجوزي ولا تتعلمي حاجة مفيدة ؟
تنفست بعمق لتجيبه بتبرير:
-فيها ايه لما أتجوز يعني، أهو اترحم منك و أربي العيال
حمزة بانزعاج:
-تصدقي أنا غلطان إن اشتركتلك في الكورس
منة بحسرة وندم:
-كنت وفرتهم في حاجة في جهازي أحسن قولتلك هتندم مسمعتش الكلام
صمتت قليلا لتسأل آيتن قائلة :
-آيتن هو أنتِ عندك حد متوفي؟
آيتن باستغراب:
-لا اشمعنا !!
قطبت حاجبيها بحيرة:
-أصل أنتِ يعني على طول لابسة أسود
حمزة بسخرية:
-أنتِ مشوفتيهاش غير تلات مرات لحقتي تكتشفي بتلبس أسود على طول
آيتن بوقار:
-لا يا منة أنا بحب اللون الأسود
منة بدهشة:
-معقولة ! ده لبسك كله كده والشنط والشوزات و موبايلك والجراب حتي الهاند فري بتاعك أسود ..مع أن بصراحة ذوقك تحفة في اللبس بس برضو مش لدرجة ان كل لبسك أسود
حمزة بإستغراب:
-بتحبي اللون الأسود للدرجة دي !
أجابته مبتسمة:
-لأن الأسود ببساطة لون بيحبني، متستغربش الأسود فعلا بيحبني وأنا مش في إيدي حاجة غير أن أنا أحبه ..الأسود سيد الألوان فعلا زي ما بيقولوا
فالأسود في غرفتها, ستائرها لونها أسود ،كمبيوترها أسود، طاولتها، هاتفها, احذيتها، حقائبها، وحتى فنجان قهوتها..فهي تفرح لرؤياه, وتحب دوما ملامسته حولها..حتى على كل شيء..تشعر أنه نقيا في كل مكان
قهقهت منة ضاحكة:
-أنتِ مجنونة بالأسود …لا صدقيني أنتي مجنونة بيه
لتردف بتذكر:
-أنا هطلع اشوف زميلتك المحامية دي اللي عرفتيني عليها
خرجت منة من المكتب، بينما صمتت آيتن لدقائق فقاطعها حمزة ممازحاً:
-خلاص أنا الأسود علمتك بيه
تعجب كثيراً حينما عرف أن لونها المفضل هو الأسود ..حاولت تبرير عشقها له ..وأنّ هناك ألوان أحياناً تحبها كلما تراها كالوردي والبنفسج، لكن الأسود عندما ترآه يأسرها
الأسود لون تحب أن ترى به.. تشعر بأنه الوحيد الذي يرضي غرور عيونها حينما لا يعجبها حيرة الأشياء المختلطة على تدرجات لونية بين آلاف الألوان..
لا تتعب نفسها كثيراً بالبحث؛ فالأسود يحتويها، تحتضنه عند كل حزن، تغلف به ذكرياتها.
ليتابع حمزة حديثه بمحاولة إقناعها:
-بس الأسود مش لون يا آيتن ..أنا عارف أنّك بتحبيه بس هو مش لون.. الأسود ده غياب كل الألوان .. فيه ناس بتفضله لكن عندها ألوان تانية مفضلة مش لدرجة حبك ليه ده كله !
آيتن بدهشة فلأول مرة يعاند معها أحد ويطول الحوار بخصوص عشقها لهذا اللون غير والدتها، فأجابته بنفي:
-ازاي مش لون! هو بيخطفني عن كل الألوان التانية بيخليني مشوفش غيره ..جربت أحب ألوان تانية معرفتش ..لقيت الأسود ملكني فعلاً
سألها بتوجس:
-عشان كده شعرك كمان لونه أسود ؟
أومأت بإيجاب:
-شعري اصلاً كان لونه بني فاتح شوية وانا صغيرة بعدين قلب فجأة للاسود وانا مفكرتش اغيره ارجعه تاني
قهقه حمزة قائلاً:
-برضو! مجنونة بيه على رأي منة
__________________________________
وقفت “منة” مع “وئام” في بداية العشرينات من عمرها، بشرتها بيضاء بملامح جميلة وشعر بني داكن وعيونها باللون العسلي الفاتح، فهي محامية خاصة بالفندق التي تعرفت منة عليها بعدما عرفت أنها ستشاركها كورس الفرنساوي في وقت الفراغ
منة بإعجاب:
-ده فيه شوية مزز هنا في الأوتيل عندكم
ضحكت وئام:
-شكلنا مش هنكمل يومين في الكورس يا منة
ثم تابعت بجدية :
-يلا طيب عشان منتأخرش
__________________________________
بعد انتهاء الكورس، ذهب حمزة ليطمئن عليها ويعرف ما فعلته في أول يوم لها
سألها حمزة بشك:
-ايه معجبكيش حد من الكورس؟
أجابته منة بثقة:
-لا
قطب حاجباه بدهشة :
-ازاي! طيب أنتِ كويسة؟
ضحكت منة ومطت شفتيها قائلة ببراءة:
-شوف بتجرني للرزيلة !
وجه حديثه لوئام:
-بجد يا وئام ..منة معجبهاش حد في الكورس ؟
وئام بصدق :
-لا بصراحة وأنا استغربت حتى
منة بضحكة:
-شوفت بقى!
حمزة بتصحيح:
-لا سمعت ياختي
_________________________________
بعد مرور عدة أيام
في شركة السياحة
كان هناك اجتماع مع أعضاء الفندق، طلبت آيتن قبل بدأ الاجتماع من السكرتيرة، قائلة:
-اطلبيلي قهوة Please معاكي
ابتسمت رهف “سكرتيرة هاني” بمكر ودلفت إلى الكافيه الخاص بالشركة، قائلة للعامل بأمر:
– عايزة شاي كمان ممكن
أومأ الرجل بإيجاب :
-طيب هروح القهوة للآنسة آيتن على ما ارجع لحضرتك عشان هتبرد
زفرت رهف بعصبية :
-أنت مسمعتش قولت ايه؟؟ بقولك اعملي وعادي أعملها تاني
الرجل باستسلام:
-تمام يا فندم
لتقول فجأة قبل أن يصب القهوة:
-غالبا في حد عايزك شوف كده مين وأنا هاخد بالي من القهوة
ثم خرج الرجل، بينما هي وضعت في القهوة “حبوب منوم”
__________________________________
لاحظ حمزة أثناء الاجتماع أنّ آيتن تضع رأسها كثيرا علي المنضدة، وعلى ملامحها النعاس؛ فتأكد أنها تريد النوم
ضرب قبضته علي المكتب أمامها بقوة فأنتفضت آيتن؛ ليقول بصوت عال :
-صباح الخير يا آيتن
نظرت إليه بعيونها الخضراء الواسعة، وهي تحاول أن تفيق، قائلة بتلعثم:
-صـ..صباح الخير يا مستر حمزة
حمزة بنبرة ساخطة:
-لما تصحصحي كده أبقي تعالي مكتبي عايزك
ابتسمت رهف بمكر، قائلة :
-باين عليكي منمتيش كويس؟ المفروض Meeting مهم زي ده حضرتك كنتي تنامي بدري يا مِس آيتن
رمقتها “وئام” بغيظ، قائلة بحدة:
– على فكرة ميخصكيش تتكلمي أصلاً..الكلام مش موجه لكِ
رهف بإحراج:
– هو حضرتك المحامية بتاعتها !
ضربت رهف على جبينها بضحكة مملة وهي تضيف:
– آه سوري … نسيت أنتِ فعلا المحامية بتاعتها مش تبع الاوتيل بس !
قاطعها حمزة بتجاهل:
-خلاص انا فعلا موجهتلكيش كلام..
__________________________________
طرقت آيتن باب مكتبه عدة مرات، ليسمح لها بالدخول
فقالت برسمية:
-أيوة حضرتك طلبتني ليه
حمزة وهو يتفحص بعض الأوراق ويتابع من خلال الحاسوب الخاص به دون أن يلتفت إلى آيتن.. قائلاً بنبرة ساخرة :
-فوقتي؟؟؟
تحسست جانب عنقها بتهمهم وهي تجلس أمامه:
– نعم ؟
نهض من مقعده، وتوجه أمام مقعدها ثم ضرب المكتب بيده بقوة، وهو يميل عليها قائلا بنبرة حادة:
– فوقتي بقول؟
كانت أنفاسه قريبة بشدة تلفح رقبتها المكشوفة من البلوزة خاصتها، طالعها لحظات وكأنه يستكشف أنها حقا استيقظت..ثم جلس على المقعد المقابل لها
أجابته بثبات :
-آه الحمدلله
حمزة بجدية :
-أنا طلبتك علشان أوضحلك حاجات مهمة..
أومأت رأسها بإيجاب، ليستكمل قائلا بسخرية:
-أنا هنا مدير العلاقات العامة “حمزة العقاد” يعني الشغل معايا مظبوط وفيه نشاط … مش علشان ضمنتي الشغل معانا يبقى خلاص تتدلعي
ردت باندفاع قوي:
-أنا عارفة كل ده مقولتش معلومات جديدة يعني، واللي حصل من شوية ده أول مرة يحصل ومعرفش ازاي كنت هنام، واكيد مش هيتكرر حضرتك
قطب حاجبه قائلا :
-اللي هيخلينا نستمر مع بعض في الشراكة والشغل هو نشاطك وشغلك غير كده هنفصل العقد … واجتهادك هيبين الانطباع اللي هيخلينا نصدق إذا كنتوا تستحقوا نكمل ولا لا .. لأن مينفعش مسؤولة الماركيتنج تبقى فاشلة و كسولة
همت بالهجوم مجدداً، قائلة بغضب لذلك المغرور:
-لا معلش حضرتك..أنا مش فاشلة و ده بشهادة كل اللي اتعاملوا معايا حتى اسأل…
قاطعها قائلا ببرود:
-أنا ماليش دعوة بحد ولا اسأل حد أنا ليّ الفعل..أشوف شغل كويس أتأكد ان الفنادق فعلا ناجحة، غير كدا ميخصنيش اللي عملتيه في الـ C.V بتاعك .. ولو أنّي مش واثق اوي يعني إنّك عملتي كل ده
رمشت عدة مرات قبل تهتف بثقة، عكس ما بداخلها من براكين وغضب:
-إن شاء الله مش هخيب أمل مستر يزيد مدير الشركة، وهثبتله أن الشراكة دي ناجحة بينا بسرعة و أوي كمان
التفت إلى الأوراق التي أمامه، قائلا ببرود:
-أتمنى كده .. انا كده خلصت كلامي معاكي.. اتفضلي أنتِ دلوقتي لأن معايا شغل ولو حابة تسألي عن حاجة خاصة بالشركة في بره السكرتيرة بتاعتي ممكن تعرفك أي حاجة
طالعته بصدمة لتردف بذهول:
-أنت ايه الثقة اللي بتتكلم بيها دي كلها..حضرتك الأوتيل بتاعنا برضو مش قليل
حمزة بغرور:
-بس علاقاتنا أوسع ومتنسيش أن جت عليكم فترة الشغل وقع أوي
آيتن وقد فاض بها الكيل:
-عادي جداً.. ما يقع إلا الشاطر ولا إيه؟؟
ضحك حمزة قائلا :
-لا عجبتيني
ردت بعملية ورسمية :
-طبيعي وهو أنا أي حد برضو
ابتسم ثم عاد لمتابعة عمله، وتجاهلها.. بينما هي زفرت بضيق ثم خرجت من مكتبه وهي تشعر بالدهشة
هناك تناقض كبير في شخصيته.. والشخصية التي وصفتها لها شذى !
كيف لهذا الشخص أن يفعل بتلك الفتاة كل هذا !
انه حتى لا يرفع عينيه بوجهها
لا ترى به تلك النظرة الخبيثة التي تراها في عينيّ معظم الرجال الذين عملت معهم
هل هو لديه انفصام بالشخصية ؟
ام هناك شيء ما لا تعرفه ؟
_________________________________
في الفندق
بعد انتهاء الكورس كانت جالسة في مكتب آيتن تستمع إلى مهرجان شعبي فهذا النوع من الاغاني المفضل لمنة، وهي تردد مع المقطع :
“غدر وجرح وقلة فرح ودنيا شمال ذل وقهر ولعب الزهر مع الأندال.. سكة مخيفة ودنيا عنيفة و قالبة الحال نفسي ألاقي أنا واحد باقي يكون سندال”
قاطعتها آيتن بتساؤل:
-ايه ده مالك؟ مين جرحك ؟
تنهدت منة بحزن :
-الكراش بتاعي طلع مرتبط وأصغر مني كمان
ضحكت آيتن لتسألها بفضول:
-أنهي واحد فيهم ؟
أزالت منة نظارتها الطبية الأنيقة عن وجهها لتجيبها بعتاب:
-محسساني ان أنا بكراش على 500 واحد
ردت بتصحيح:
-لا سمح الله 100 بس
صاحت بعتاب مزيف:
– لا معلش طلعيلي واحد فيهم متكرر !
لتضيف بغيظ:
-شوف غدر الصحاب !
آيتن بدهشة:
-هو أنتي كل كراش ليكي لازم يكون فيه حاجز يمنعكم !
منة بحزن:
-حظي بقى
آيتن بثقة:
-يا حبيبتي أنتِ قمر اصلاً يعني هما اللي يكراشوا عليكي مش أنتِ
منة بحسرة:
-قمر بس نحس
أجابتها بابتسامة :
-لا مش نحس ولا حاجة، ربنا لسة مبعتلكيش نصيبك الحلو
__________________________________
في منزل خديجة
زفرت آيتن بضيق وهي تتحدث عن حمزة:
-سبحان مَن صبرني عليه بجد..أنا كل شوية أفكر أغير رأيي وأقول لشذى مش هكمل المهمة دي بس برجع في قراري معرفش ليه.. يمكن هي صعبانة عليا وخايفة تعمل حاجة في نفسها تاني
ضحكت خديجة :
-تصدقي عندي فضول أشوف حمزة ده في الحقيقة
زغرت لها آيتن بغضب:
-أنتِ بتضحكي على ايه يا خديجة .. أنتِ لو عرفتيه هتكرهي نفسك
خديجة باستغراب:
-ليه يعنى..بس عاجبني أوي حوار القط والفار اللي أنتم فيه
رمقتها بغيظ:
-ده بني آدم سخيف ومغرور وبجح وقليل الذوق وكل الصفات الرخمة فيه
-معلش يا تونا أنتِ خلصي مهمتك و وقعيه و بعدين أبقي أديله بالجزمة على دماغه واكسريه
صاحت آيتن بزهق:
-ما هو ده اللي هيحصل بس المشكلة أنه تقيل أوي ومش هيقع بسهولة
_________________________________
بعد عدة أيام
كانت تقف مع رجل أعمال نزيل في الفندق، وهو يطلب منها عقد صفقة خاصة بالفندق.. فشرحت له آيتن كل شيء
قالت برسمية بعد انتهاء حديثها:
-حضرتك عندك أي ملاحظات على اللي قولته يا افندم؟
أجابها الرجل بمكر:
-هو اكيد اللي يتكلم معاكي ميقدرش يعترض على أي حاجة
زفرت بضيق متجاهلة تلميحاته، قائلة بعملية:
– حضرتك لما تتفق .. قدامك مكتب المدير التنفيذي تطلب منه ميعاد وهو هيوضحلك الباقي ؟؟
رد بتسرع :
-خلاص انا آسف ..عموماً أنا متحمس جدا بالشغل معاكم ومتنسيش إن أنا هحط مبلغ عندكم مش قليل برضو
– برضو حضرتك تقدر تتفق مع حد من اللي قولتلك عليهم..انا مجرد وسيط بينك وبينهم بشرحلك الصفقة طبيعتها ازاي والتنفيذ معاهم
__________________________________
بينما علي الجهة الأخرى
كان حمزة يقف مع مجموعة من الوفد الجديد من الشركة التي يعمل بها، يرحب بهم لأن هذه اول إقامة لهم بالفندق
كان حمزة يتابع الموقف بالصدفة، أو من الفضول، لكنه لم يرَ وجه آيتن لأنها تجلس بظهرها، فرأى تعابير وجه الرجل ونظراته الخبيثة.. ابتسم بغموض ثم عاد ليستكمل حديثه مع الوفد
__________________________________
على طاولة آيتن
زفر الرجل بزهق قبل أن تتركه آيتن، ليهمهم بدون تفكير وهو يعطيها كارت ما خاص به:
– إيه رأيك نتقابل النهاردة نتعشا سوا..
طرفت بعينيها وهي تحدق به بنفاذ صبر وهي تهم بالانصراف :
-لا حضرتك أنا مبخرجش مع الـ Clients بره شغلي..
– بسيطة نعتبره عشاء عمل.. والمكان اللي تختاريه أنتِ تستاهلي اغلى حاجة
– أنت عارف أنه مش عشاء عمل يا فندم ولو عشاء عمل اكيد مش مع حضرتك..ولولا أنّك نزيل عندنا لكنت عرفت حضرتك ازاي تتعامل كده معايا بس مش هضيع من وقتي مع حد زيك
ومن ثم تركته وعلى ملامحه الغضب الشديد
لم يرَ حمزة إلا الرجل وهو يعطيها الكارت بنظراته الغريبة، لكن لم يرَ رد فعل آيتن فهي غادرت قبل أن ينظر مرة أخرى بينما هو لم يلتفت كثيراً، كان ذلك من ناحية الفضول..فشعر أنها وافقت على طلب ما !
_________________________________
في صباح اليوم التالي
في شقة منة
كانت تستمع إلى هذا المقطع من أغنية ام كلثوم بالصدفة فـ والدتها تحب سماع أغانيها، دندنت منة معها
“ياما عيون شاغلوني لكن ولا شغلوني
إلا عيونك أنت دول بس اللي خدوني وبحبك أمروني”
صاحت منة بنفاذ صبر:
– آه والله الواحد فعلا نفسه يتحب كده
قاطعها صوت والدتها بغضب بكلمات تهكمية:
-يا رب ارحمني منك، نفسي تكوني زي البنات العاقلة اللي بتفكر تعمل لنفسها كارير كده وبتشتغل وعندها طموحات
منة مغيرة الحوار:
-ماما أنتِ كنتي عايزة حاجة؟
هتفت والدتها بحنق :
-كنت عايزاكي تروحي كارفور بعد ما تخلصي الكورس بتاعك وتجيبيلي طلبات
– حاضر
_________________________________
قبل أن تخرج آيتن من مكتبها لبدأ الاجتماع، لفت نظرها على مكتب سكرتيرتها …
يتبع…………..
لايك وكومنت بقى عشان انزلكم البارت اللي بعده بسرعة ????❤️ وصلوه لـ 300 لايك وكومنت
ومستنية رأيكم في البارت ????الفصل الثامن
قبل أن تخرج آيتن من مكتبها لبدأ الاجتماع، لفت نظرها على مكتب سكرتيرتها “حسناء” باقة ورد أنيقة وبجانبها باقة من الشوكولاتة الغالية الثمن
سألت آيتن بفضول:
-إيه إللي على مكتبي ده! مين جايبه؟
حسناء بابتسامة:
-ده Gift “هدية” من نزيل كان هنا باعته..بيقول باعته لحضرتك تقريباً شكر على بداية الشغل بينكم
تدخلت رهف “سكرتيرة هاني مدير الفندق” في الحوار:
-بس ايه النظام الحلو ده؟
أجابتها آيتن بملل:
-نظام ايه اللي حلو؟
رهف بنبرة تهكمية:
-ورد وشوكولاتة لحد مكتبك من نزيل، من امتى واحنا بيحصل عندنا كدا !
هو مش حضرتك برضو بتقولي أن المعاملة بينا وبين أي guest هنا تكون رسمية جدا وممنوع كلام جانبي…
ردت وئام بتبرير لأنها مسؤولة عن تجهيز اوراق امضاء عقود بداية اي عمل في الفندق :
-ده نزيل هنا اه بس هيبقى فيه بينه وبين مستر هاني شغل وهو اتفق مع ايتن في الاول، بيشكرها يعني على الشغل
رهف بمكر :
-اممممم .. عموما أنا كنت جاية عشان أجمعكم لأن الميتنج هيبدأ
كان حمزة يتابع الموقف من بعيد، لكنه لم يتدخل في الحديث
__________________________________
بعد أنتهاء الاجتماع
وقفت “رهف” مع زملائها تتحدث باتهامات عن آيتن
لتقول رهف بسخرية:
-انتوا متأكدين أنه بذكائها ومجهودها؟
امين “زميل آيتن” بثقة:
-أيوة طبعا .. آيتن شاطرة جدا في شغلها ومتنسيش أنها انقذت الأوتيل كذا مرة
لتتابع رهف بخبث :
-وأنتوا بقى واثقين فيها اوى كده! كنتوا معاها في أي أنترفيو هي بتروحه؟ بتشوفوها بتعمل ايه! يعني مش بتعمل شغل متداري مع أصحاب الشركات علشان تمشي شغلها وتاخد حوافز و مكافآت زيادة
تدخلت “وئام” في ذلك الوقت بغضب وثقة:
-عيب أوي اللي بتقوليه عليها ده يا رهف.. ده أنتِ بتتكلمي عن آيتن.. اللي مبتفكرش في أي ارتباط ولا كلام من الهبل ده..ويوم ما تفكر ترتبط هيبقى رسمي قدام كل الناس
رهف بنبرة ساخطة:
-مش شرط تفكر في ارتباط.. ممكن جداً شغل غير اللي ظاهر قدامنا، واللي ظاهر قدامكم ده صورة وهمية بس.. اشمعنا لما بتروح أي شركة العقد بيتمضي بسرعة ومبياخدش وقت؟
تدخلت آيتن في تلك اللحظة لتاقطعها بغضب :
-احترمى نفسك واعرفي أنتِ بتتكلمى عن مين.. أنا مش هبررلك حاجة بس كفاية أن معظم اللى بيشتغلوا هنا عارفين مين “آيتن أنور” وبتفكر ازاي وبرضو مش هضيع من وقتي مع واحدة زيك أقل حاجة تعملها أنها تتكلم و بس لأن ده أخرك .. وحسابك معايا بعدين مش دلوقتي
تدخلت منة موجهة حديثها لرهف، قائلة بغيظ:
-البت دي تقل دمها لو اتوزع على قارة هيكفيها ويفيض للقارات التانية
رهف ببرود:
-سيبتلك أنتِ خفة الدم
منة باستفزاز:
-ميرسي يا حبيبتي
ثم تركتهم آيتن ودخلت مكتبها بثقة ممزوجة بالغضب
فهي لم ترهق نفسها أبداً بما يقال عنها فالله يعلم ما في قلبها وهذا يكفيها..
لا تضيع من وقتها لحظة لشرح الحقيقة لأحد، ولا يهمها أن يراها الناس ناجحة أو فاشلة، هي لديها اقتناع تام إنّ الشخص الذي يتحدث خلفها يعلم الحقيقة لكنه يريد خدش الصورة الجميلة
______________________________________
صاح حمزة بانفعال لمنة:
-منة متدخليش في حاجة متخصكيش
زفرت منة بضيق :
-أنت مش سامع كانت بتقول أيه على آيتن؟
حمزة بحدة:
-وأنت مالك أصلاً هما شغالين مع بعض
منة بتبرير:
-لا مالي لما أسمع حد بيغلط في حد وهو كويس يبقى من حقي أدافع عنه او احرج اللي بيتكلم كدب
حمزة بنفاذ صبر:
-وأنتِ لحقتى تعرفي آيتن؟ مش أي حد تصدقيه .. ممكن أقرب ما ليكي يغدر بكِ وأنتِ تكوني واثقة انه عمره ما هيعمل كده..
منة باستغراب:
-هو في أيه يا حمزة مش فاهمة..في حاجة حصلت يعني؟
همس حمزة بغموض:
-هحكيلك بعدين
ليتصل على يزيد لكي يخبره باخر تطورات العمل فوجده مشغول بالهاتف
صاح حمزة بزهق :
– مش وقته يا يزيد بقى…ياريتك ما ارتبطت يا اخي..
ردت منة بدهشة:
– ايه ده هو يزيد ارتبط !
__________________________________
دلف حمزة إلى مكتب آيتن، ليأخذ منها ملف، وقبل أن يخرج قرر فتح موضوع رهف
هتف حمزة بتوجس :
-بس ردك على رهف مبررش موقفك !
ردت آيتن بلا مبالاة:
-عشان دي واحدة فاضية ومش هضيع من وقتي وشغلي عشان اصححلها تهيؤات في دماغها، هي واثقة وعارفة أن أنا مش كده!
سألها بنبرة ساخرة:
-وأنتِ على كده بتخليهم يوافقوا ازاي يا آيتن؟
رمشت عدة مرات لتسأله بشك:
-قصدك ايه؟
أخذ نفس عميق وهو يجيبها ببرود:
-الكلام بتاعها ده جابته منين واشمعنى أنتِ بالذات اللي قالت عنها كده .. عموماً حاولي تتجنبي الإشاعات ومتخليش حد يمسك عليكِ حاجة دي مجرد نصيحة بس ..يلا أنا همشي عشان رايح الشركة
قاطعته آيتن بصدمة غير مصدقة ما قاله:
-استنى يا حمزة كده معلش..!! أنا مبعملش حاجة غلط ومش أنا اللي اعمل كده
ثم تابعت بانفعال:
-قبل ما تحكم على حد أعرفه الأول، أتأكد قبل ما تصدق وتدخل سيناريو غلط في دماغك
حمزة بابتسامة صفراء:
-أنا محكمتش يا آيتن وبعدين ميخصنيش الكلام ده، أنتِ كويسة أو وحشة ده لنفسك
تمعنت في ملامحه لتهمس بثقة:
– ميخصكش أيوة.. اهو انت رديت على نفسك
لتضيف بتوجس:
-لكن أن نبرة صوتك وتلميحاتك معناها إنك متأكد من كلامها
ابتسم ببرود:
-أنا مقولتش إنّي متأكد..بس لو أنتِ شايفة كده تمام
آيتن باندفاع:
-مش لازم تقول…
ثم أردفت بخبث:
-وبعدين ليه متقولش إن أنا شاطرة في شغلي؟ مش أنت برضو وافقت عشان أنا شاطرة في شغلي؟ ولا عشان حاجة تانية
القت حديثها ببرود وحاولت الانشغال ببعض الأوراق:
-عموماً أنا خلصت كلامي.. ياريت تتفضل تخرج عشان مش فاضية دلوقتي
رمقها بنظرة حادة:
-مش أنا اللي يتقالي الجملة دي..اعدلي لسانك كده وأنتِ بتتكلمي معايا..
بادلته ابتسامة عريضة :
– لا هو معدول لوحده متقلقش
ليرمقها بغيظ وهو يغلق الباب خلفه بحدة
هو أخطأ بالفعل حين حكم عليها حتى لو بطريقة غير مباشرة، ولم يدرك أنه ارتكب أفدح أخطائه، زفرت بتعب بعد أن خرج حمزة وقررت مهاتفة صديقتها خديجة لتقص عليها كل ما حدث اليوم
__________________________________
في خلال ساعة كأنت خديجة في الفندق، توجهت نحو مكتب المدير “هاني” وخطيبها في نفس الوقت فاستوقفتها حلا
أتاها صوت رهف الناعم بتعمد:
-آنسة خديجة هو حضرتك داخلة فين ؟
رمقتها خديجة بنظرة سخرية:
-داخلة لهاني ..ايه ممنوع؟
رهف برسمية متعمدة:
-عندك ميعاد سابق؟
ردت خديجة بغيظ:
-لا..هو أنا هاخد ميعاد عشان أقابل خطيبي كمان
رهف بأسف مزيف:
– لازم يكون في ميعاد سابق لحضرتك ..أو أكلمه أشوف مواعيده أيه..Sorry يا فندم ده Rules “نظام”
صاحت خديجة بانفعال:
-أنتِ مجنونة ولا شكلك كده؟ميعاد إيه اللي أدخله فيه.. ده خطيبي !
رهف ببرود:
-دي مش مشكلتي ..دي Rules محطوطالي وأنا ماشية عليها
زفرت خديجة بنفاذ صبر لتجيبها بسخرية:
-لا وأنتِ ما شاء الله مجتهدة أوي في شغلك .. غوري من وشي كده عشان من ناقصاكي
ثم دلفت إلى مكتبه وخلفها رهف
ليجيبها هاني بابتسامة:
-ديچا حبيبتي .. إيه النور ده ؟
نظرت خلفها لتجدها دلفت معها؛ لتزفر بضيق:
-أنتِ داخلة ورايا ليه معلش؟
هاني بجدية:
-اطلعي يا رهف دلوقتي
اومات رهف بإيجاب:
-تحت أمرك يا مستر هاني
زفر خديجة قائلة بعصبية:
-البت المستفزة دي لو أتكلمت معايا تاني هجيبهالك من شعرها
-مين رهف؟
لتجيبه بنفاذ صبر:
-هو فيه مستفزة غيرها في الأوتيل !
هاني بإحراج:
-لا.. طب مالك إيه معكر مزاجك بس يا حبيبتي
-هي الزفتة دي..وأنت كمان
هاني بدهشة:
-الله! وأنا عملت أيه؟
أجابته بتحذير:
-قلت لك قبل كده يا هاني ..إن آيتن خط أحمر وأظن أنت عارف شخصية آيتن ودماغها
-طبعا هو أنا أقدر استغنى عنها
وجهت إليه نظرة نارية قبل أن تهتف بغضب:
-ولما هو كده..سمحت لواحدة زي اللي ما تتسمى اللي بره دي تتكلم عنها ليه
-أنا زعقتلها على فكرة يا ديچا وقفلت الحوار
صاحت بغضب:
-زعقت بس مجبتش حق آيتن
-وهي آيتن هتغلب؟
-برضو سيبت واحدة زيها تتكلم عنها وحش
هاني بنفاذ صبر لينهي تلك المشكلة :
-ديچا أنتِ عأيزة ايه بالظبط؟
-مشيها ما هي غلطت في آيتن !
-أيوة حبيبتي بس ده مش سبب قوي.. انا اديتها انذار.. وغير كده لو مشيتها أنتِ عارفة هحتاس على ما اجيب سكرتيرة تانية
صاحت خديجة بغيظ:
-وأنا مش طايقاها يا هاني..أنت مش شايف بتتدلع ازاي وهى بتكلمك؟
غمز لها قائلا بابتسامة:
-طب ما تتدلعي زيها يا حبيبتي
خديجة بتحذير:
-هاني ..اتلم..ها؟
هاني براءة:
-أنا ملموم أهو
__________________________________
قام هاني باستدعاء رهف ليضع حدود لتلك المشكلة امام خديجة كي تتطمئن وتهدأ
هتف هاني بنبرة جادة محذراً رهف:
-رهف ياريت تخليكي في شغلك وملكيش دعوة بحد
أضافت خديجة بسخرية:
-و مليكش دعوة بآيتن خالص
تجاهلت ردها و وجهت حديثها لهاني:
-أوكيه يا مستر هاني.. بعد إذنك
ومن ثم خرجت من المكتب لتقول خديجة بنبرة ساخطة:
-نفسي أفهم أيه اللي هي لابساه ده! هي شغالة في الساحل؟ ده أوتيل محترم
زفر هاني قائلا بهدوء:
– خلاص بقى سيبك منها..عملتلك اللي أنتِ عايزاه خلاص
ليضيف بنبرة ساخطة:
– وبعدين متتكلميش على اللبس … ده ايتن صاحبتك بتلبس براحتها برضو
تنحنحت قائلة بحرج مدافعة عن صديقتها كعادتها :
– لا ايتن لبسها محترم شوية عنها..
– اه آخد بالي
اتسعت حدقتيها بذهول :
– نعم؟! وأنت اخد بالك ازاي بقى !
رد بنبرة عابثة:
– لا متحاوليش أنا مش آخد بالي غير منك أنتِ الصراحة
__________________________________
كانت تبحث عن أقرب فرع لكارفور فأوقفت تاكسي للمرة الثانية لتسأله:
-لو سمحت هو أقرب فرع لكارفور من هنا فين؟
-مفيش فرع له هنا
همست منة بغيظ:
-ازاي أنا متأكدة إن فيه.. اللي قصاد فرع كنتاكي عارفه؟
-لا بس هوديكي الفرع اللي بره
اجابته بنفي:
-لا خلاص شكلك مش عارفه أنا هسأل تاني
ثم حدثت نفسها بغيظ:
-طبعا عايزين يروحوا اللي بعيد عشان ياخدوا فلوس زيادة
لاحظت وجود شاب بالقرب منها، ساندا ذراعه علي سيارته، ومن ثم اقتربت منه لتسأله :
-احم .. لو سمحت هو فرع كارفور القريب من هنا اروحه ازاي؟ اللي هو قصاده كنتاكي و للأسف وقفت كذا تاكسي محدش عارف فيهم وأنا متأكدة إن فيه فرع قريب وقصاده كنتاكي
أومأ الشاب بإيجاب:
-اه.. بصي أنتِ هتركبي تاكسي وتقوليله يلف من عند الدوران..
ابتسمت بلا مبالاة وتطلعت لعيناه العسلي وهو يستكمل لها شرح العنوان، قبل أن تهمس بهيام:
-لا أنا توهت منك.. طب ينفع تقول للتاكسي اللي أنا هوقفه
ابتسم قائلاً بجدية:
-طيب بصي أنا رايح البنك أصلاً .. تعالي هوقف تاكسي وأنا هوصفله تروحي ازاي
أجابته منة بصوت منخفض:
-بتبيع الأعضاء بالكيلو ولا بالحتة !
-نعم؟
________
وصلت آيتن إلى المطعم واتجهت لطاولة المرأة التي تنتظرها قائلة:
-عاملة ايه؟
ردت المرأة بحزن يبدو على ملامحها وهيئتها البسيطة، فصديقتها وئام هي من احضرتها لها :
_زى ما أنتِ شأيفة
آيتن بابتسامة واثقة :
_ متقلقيش .. أوعدك هتكوني أحسن من الأول بس احكيلي
-أنا متجوزة ومعايا تلاث أولاد أصغرهم طفل خمس شهور ..أتجوزته وكانت حياتي أنا وجوزي مثالية جدا لحد ما لقيته مستهتر ومبيحافظش على فلوسه وكنت على طول أتخانق معاه لأنه بيحوش مع أخوه بحجة أنه بيشغلهمله معاه، جه في مرة قالي انه عايز يشتري حتة أرض وسعرها عجبه وفي الفترة دي أخوه خسر في شغله و اتبقى 300 ألف جنيه من سفر 13 سنة شغل طبعا سكت ومرضتش أعاتبه ولا أتخانق عشان هو أكيد مش حمل خناق في الوقت ده ومش هيجيب نتيجة ..فكملت له الفلوس من ورثي من أبويا واستلفت من أهلي وسافر وهو مديون فضل خمس شهور من غير ما يبعتلي جنيه بقيت أشتغل في تربية الطيور وأبيع عشان أكل الولاد لحد ما ربنا فتحها عليا وخد فلوس شغلي لحسابه والمشروع وقفته وأول ما ربنا كرمه وفتحها عليه كان رد الجميل أنه عرف عليا واحدة بقت تسحب منه فلوس على طول وبقى بخيل عليا وعلى الولاد جدا.. لما عرفت اتجننت وبقى يكدب عليا ويقولي سيبتها ويرجع يكلمها تاني وعرفت اهله، سابها وبعد شهر رجعلها واكتشفت أنه باع الارض وجابلها شبكة ب 200 ألف جنيه عشان يتجوزها وأنا لما أتجوزني كان جايبلي شبكة ب 20 ألف وبيعتهاله أصلاً ساعة ما اتزنق في الفلوس ..بقيت اسأله أنت بتحبها يقولي لا بس مش قادر أعيش من غيرها، وكان بيصرف عليها هناك..أنا أعصابي تعبت وهي رجعت مصر معاه وقعدت في شقتها اللي في مصر وهي بتتعمد تطول في الموضوع عشان تسحب منه فلوس أكتر ولحد دلوقتي مفيش حاجة رسمي بينهم.. أنتِ عارفة لو اتطلقت دلوقتي هيضيع كل فلوسه على الست دي وأنا هحتاس بتلات عيال ومش هعرف أصرف عليهم ..أنا عايزة أتطلق طبعاً لأن مش هعيش مع واحد مقرف زيه..دي مش مجرد خيانة كلام … بس لازم أخد حقي منه.. لازم أعذبه وأخليه يدوق الجرح اللي سببهولي
آيتن بعتاب:
-أنت غلطتي من الأولاد إنك وقفتي جمبه على حساب نفسك وهما مبيطمرش فيهم ..وعلى فكرة الست دي مش هتتجوزه هي هتسحب منه فلوس بس وهدايا متسيبيش شقى عمرك يروح على الارض ..هي لما تستكفي هتقوله باي وهتدور على غيره وهو هيرجع متعلم الأدب
-طب حضرتك هتساعديني؟ أنا معايا حاجة معرفش هتقدر تفيدك ولا لأ
-معاكي أيه؟
ترقرت الدموع في عينيها لتهمس:
-لما أتخانق معايا آخر مرة بسببها لما بعاتبه وبقوله عايز تتجوزها ليه ..تخيلي راح فاتح تليفونه و وراني فيديو وهي بترقصله وبيقولي شوفي الفرق بينك وبينها وهي أحلى منك مع أنّي مش مقصرة معاه روحت أخدته عندي عشان أشوف المقارنات اللي فضل يقولي عليها لدرجة ثقتي اتهزت بسببه
قطبت حاجبيها بدهش عندما رآت الفيديو, فالمرأة التي أمامها أجمل حتى وإن كانت بسيطة:
-هو ده ذوقه؟ طيب بصي ..أنا عايزاكي تبعتيلي الفيديو ده ..وعنوان الست دي وأنا هتصرف معاها
لتسألها المرأة بفضول:
-طيب حضرتك هتعملي أيه ؟
-متقلقيش هتعرفي وقتها
– هي الأستاذة وئام قابلتني في مكتب محامي و قالتلي عنك..بس هي قالتلي ان حضرتك هتحليلي المشكلة
لتضيف المرأة بقلق:
– بس انا خايفة ان الست دي تعمل مشكلة
آيتن بثقة:
-لا متخافيش أنا هعرف أتصرف مع الأشكال دي كويس
__________________________________
اتصلت آيتن على “وئام” صديقتها هي و زوجها “امين” مهندس البرمجة، وطلبت مقابلتهم في مطعم ما..
ذهبت إلى المطعم فوجدت “امين” ينتظرها الاول على إحدى الطاولات فكانت صديقتها لم تصل بعد، لتجد على الطاولة خلفها
ضيق “امين” عينيه بتهديد وهو يوبخها بنزق:
– دايما انا اوصل في مواعيدي مظبوطة، الا أنتِ وصاحبتك !
– طب شوف حد غيرك يتكلم .. سيادة الباشمهندس اللي مبيردش على حد… وبنلاقيه بصعوبة !
– على أساس مش شغالين مع بعض مثلا !
– على أساس أنت فاضي ها !
– استني اتصل بالست هانم مراتي الحلوة “وئام” اشوفها اتأخرت ليه؟
أطلقت آيتن ضحكة ساخرة وهي ترسل رسالة إلى صديقتها التي تتأخر كعادتها، وعلى الجانب الآخر كان يتابعها عينان ضاقتا باحتقار وغضب..
يتبع….
******
مستنية رأيكم وتشجيعكم ????
وصلوا البارت لـ300 لايك وكومنت عشان انزلكم اللي بعده بسرعة ????الفصل التاسع
ردت منة ضاحكة:
-لا متاخدش في بالك..
– طب ايه ؟ تحبي توقفي أنتِ التاكسي
استوقفت سيارة أجرة بنفسها ..وركب هو في الكرسي الأمامي بجانب السائق ومنة بالخلف، أسندت رأسها للنافذة تتأمله من المرآة.. أفاقها الشاب من شرودها بعد عدة دقائق وهو يقول:
-وصلنا يا آنسة
ثم أعطي السائق أجرته ونزلت لتحاسبه، رفض تماماً أن يأخذ منها شيء بعد محاولات كثيرة، ليقول مغيراً الحوار :
-احفظي بقى المكان
أومأت بارتباك واضح:
-حاضر
ساد الصمت بينهم، نظر إليها لدقائق وكأنه يريد أن يقول شيئا لكنه متردد؛ ليجيبها برسمية:
-طيب .. عايزة حاجة ؟
نظرت له بحزن و رجاء مخفي وكأنها تود أن تتعرف عليه أو حتى تعرف اسمه ولكنها لم تستطع أن تفعل ذلك! فأجابته بخجل و رقة:
-لا .. ميرسي أوي..
لم يعطيها فرصة للمناقشة أو تتعرف عليه فاستأذن وانصرف
بعد ثوانٍ..لمحت فتاة بالقرب من كارفور لتسألها بفضول:
-لو سمحتي هو فين أقرب بنك هنا؟
-لا مفيش أي بنك قريب من هنا خالص
وتفاجأت بأن أقرب فرع بنك كان بالقرب من المكان الأول..!
ظلت تقف في منتصف الشارع غير مصدقة ما حدث .. شعور بالندم علي عدم استغلالها تلك الفرصة لتقول مبررة لنفسها:
-لا طبعا اللي عملته ده صح ..لو كنت حاولت أتعرف عليه كان ممكن يقول عليا مش محترمة وأقل في نظره ..يوووه ياريتني كنت ركبت التاكسي و روحت الفرع اللي بره وخلاص
__________________________________
كانت العينان التي تتابعها بالصدفة.. عينيّ “حمزة”، حاول الخروج من المكان بعد انتهاء مقابلة عمله، ولكنه اتجه نحو طاولة “آيتن” وهي تبتسم لذلك الشخص الغريب وتتحدث معه وكأنها تعرفه جيدا !
وقف أمامهم وقبل أن ترحب به، نطق بجملة سريعة:
– كنت عايزك في حاجة
ارتفع حاجباها بدهشة واعتراض ولم تتحرك، فهتف بصوت اعلى :
– اكيد مش هنتكلم قدامه يعني !
– لا نتكلم قدامه..في حاجة ؟
– بلاش عشان الاحراج بس
فسحبها من مرفقها بسرعة لتتحرك معه بعيدا عن الطاولة، ليقف امين وهو يتحرك خلفهم فنبهه حمزة بإشارة من يده :
– مش هطول عليك أصلا
جذبت يدها بقوة من يده وحركته المفاجأة فتملصت منه سريعاً، و وقفا أمام الطاولة الفارغة التي كان يجلس عليها حمزة
– ممكن افهم ايه الأسلوب اللي مش لاقياله وصف ده !
اتهمها قائلا بسرعة:
– انا برضو ! ولا أنتِ
ده انتِ اديتيني محاضرة في مكتبك و ازاي تتهمني .. وأنتِ عادي اهو مقضياها و بتخرجي وتضحكي ..
تألقت عيونها بذهول ، واستوعبت اتهاماته الباطلة، لترد عليه بغيظ :
– حضرتك بجح ماشاء الله !
قاطعها بحدة :
– أنا برضو ؟ ولا ده تبع شغلك برضو !
صاحت به باندفاع من تدخله الغريب:
– أنت مالك اصلا.. يخصك في ايه ؟؟
رد بتبرير موضحًا:
– بنت خالتي تبقى صاحبتك..
قاطعته بعنف :
– اديك قلت.. بنت خالتك !! يعني هي كبيرة وفاهمة كويس اوي تصاحب مين
أنت برضو يخصك في ايه فهمني؟؟
– ما انا ميرضينيش انها تصاحب حد نظام حياته غير نظامها..
-ليه وهي عيلة صغيرة ؟؟ بيبي هي متعرفش تفرق بين الصح والغلط
لتردف وهي تخبره من بين أسنانها:
-اللي انت قولته من شوية عني ده ما يخصكش.. نظام حياتي صح ولا غلط … ما تدخلش اصلا…يخصك في ايه فهمني !؟؟
– ازاي واحدة زيك تبقى كده ؟
– كده ازاي ؟
نظر إليها بتمعن و عدم تصديق :
– ملامحك بريئة جدا…شكلك ميقولش انك ممكن تعملي كده زي ما رهف قالت … بس اللي شوفته قدامي …
ردت بنبرة متهكمة:
– معاك دليل ؟؟
– نعم؟
– حكمت عليا كده وخلاص من كلام سمعته من رهف ؟ و شوفته قدامك..معاك دليل عليه؟
– شوفتك خارجة قدامي مع حد واضح جدا أن مفيش شغل بتتكلموا فيه..
قاطعته بغضب:
– مين أنت أصلا علشان تدخل وتحكم عليا بحاجة مش موجودة غير في خيالك.. أنا شغلي واضح جداً ومفيش حد قال عني نص كلمة غير الزفتة رهف .. و ده عشان هي آخرها كده .. تتكلم على اللي مش عارفة توصله ولا تبقى زيه
لتردف وهي تنهي الموضوع قائلة:
– عموما مش موضوعنا و زي ما قلت .. حياتي تخصني انا وبس … صح ولا غلط برضو ماتخصكش
– “آينا” … معلش اتأخرت عليكي
قاطعهم صوت وئام وهي تقترب منهم قائلة بتلك الجملة، لتردف بعدها وهي تنتبه إلى حمزة :
– ايه ده مستر حمزة … حضرتك هنا
رد بذهول :
– وئام
ألقت نظرة على زوجها من بعيد :
– ايه ده انتوا سايبين امين لوحده ؟ ولا انت متعرفتش عليه
– لا معلش مش لازم
قاطعته بسرعة:
– ازاي يعني حضرتك متتعرفش على جوزي و شغال في الاوتيل كمان معانا
اتسعت حدقتيه بذهول، ليفهم أنه أخطأ بالفعل :
– جوزك ؟؟؟؟ غريبة يعني اصل ايتن جت قلبك
بينما ايتن ارتسمت على ملامحها التسلية والمكر
ردت وئام بتبرير :
– أنا دائما متأخرة وكنت بخلص شوية حاجات … فـايتن وصلت قبلي… تعالى اعرفك عليه بقى
ذهب خلف وئام وايتن باتجاه طاولة امين، لينظر إلى وئام وهي تجلس بجانب زوجها و ايتن على الناحية الأخرى، ليندم على تسرعه و اندفاعه…فهو لم يقصد ابدا ما فعله … لا يعلم لم فعل ذلك أساساً.. بالنهاية هي لديها كل الحق
فهي لا تخصه ابدا..
قال بنبرة هادئة معتذرا لايتن و امين :
– معلش على سوء التفاهم ده
رد امين بحيرة:
– لا ابدا.. حضرتك بس مسلمتش ولا اتكلمت
همس باعتذار حقيقي :
– آسف بجد … انا لخبطتلكم اليوم
– متقولش كده يا مستر حمزة ده حضرتك منورنا…لازم تقعد معانا بقى
– لا انا لازم امشي عشان اروح البيت..
– لا حضرتك اقعد معانا منورنا طبعا
وقفت ايتن قائلة :
– أنا لازم امشي ..
اقترب منها قائلا برجاء :
– خليكي يا آيتن…انا مش عارف اقولك ايه بجد… انا آسف حقيقي … هنتكلم مرة تانية .. تمام
ليردف بصوت عال وهو يتركههم حتى لا يجعلها تترك أصدقائها بسببه :
– عن اذنكم .. وان شاء الله نتقابل في مرة تانية
– في ايه يا بنتي … هو حصل حاجة ؟
سألهم امين :
– هو ده بقى حمزة؟
– هو.. بس سيبكم منه … انا عايزاكم في مهمة جديدة… الست اللي وئام جابتهالي.. في حاجة لازم تساعدوني فيها عشان نخلص مشكلتها
– تمام معاكي
همست آيتن بتفكير بعد أن قصت عليهم سريعا ملخص ما قالته تلك المرأة:
-أنا هروحلها وههددها أنها تقول لجوزها ان جالها مرض الإيدز وتوريله شوية تحاليل مزورة طبعا انتوا هتساعدوني فيها، واخليها تقوله خلي بالك المرض مبيظهرش على طول وممكن يجيلك وهو طبعا هيخاف وهيسيبها وهيقعد فترة عند كذا دكتور شكل وإشاعات وتحاليل وهيقعد فترة مصدوم
سألتها وئام:
-طيب أفرضي البنت رفضت وقالتله
قالت آيتن بثقة:
-لا متخافيش أنا هعرف أتصرف كويس
– وانا هجيبلك التحاليل دي على طول .. هاتيلي بس بياناتها
– حاضر
_________
ذهبت آيتن لمقابلة المرأة بعد أن أخذت العنوان من العميلة و ساعدوها كلا من امين و وئام بالطلبات؛ لتنهي هذه المشكلة بنفسها
دلفت آيتن إلى داخل الشقة، بينما أبقت المرأة الباب مفتوحا واتجهت لتقف أمامها وهي تسألها :
-أيوة أنتِ مين؟
آيتن بسخرية:
– الراجل إللي أنتِ ناصبة عليه ومش هتتجوزيه لحد ما تخليه يفلس .. انا واحدة قريبة من عيلته
المرأة بإنكار:
-نعم؟ أنا معرفش أنتِ بتتكلمي على أيه
صاحت آيتن بعصبية :
-لا يا روح أمك أنتي عارفة .. هتستهبلي يا بت ولا أيه .. ولا أقولك شوفي الفيديو الحلو ده و أنتي تفتكري
فتحت آيتن هاتفها لتريها الفيديو التي تظهر فيه المرأة وهي تتراقص لزوج العميلة.. ابتلعت ريقها بصعوبة بينما تعالت دقات قلبها فربما قد أتت لتفضحها أو تساومها علي شيء !
صاحت بصدمة:
-يا نهار أسود .. جابر هو اللي بعتلك الفيديو ؟ هو حيوان للدرجة دي!
آيتن بنبرة ساخرة:
-شوفتي بقي ..عشان تأمني لراجل تاني
سألتها بارتباك:
-طيب أنتي عايزة مني أيه.. أنا خلاص هسيبه
لتجيبها آيتن بابتسامة ماكرة وهي تعطيها التحاليل:
-عايزاكي لما يجيلك تديله التحاليل دي وتقوليله إن جالك الإيدز وانه متوقع يجيله المرض ده برضو زيك
المرأة بدهشة غير مصدقة:
-لا أنتي بتهزري؟
أومأت بنفي:
-لا مبهزرش.. أنتي هتعملي كده
أومأت بأيجاب:
-خلاص ماشي هقوله حاضر.. حاجة تانية ؟
ابتسمت مكملة تفجير قنبلتها:
-آآه الشبكة اللي جابهالك ب 200 ألف جنيه
شحب وجهها وبهتت ملامحها وهي ترد بتلعثم:
-شبكة! شبكة إيه دي..جابر مجابليش حاجة
جذبتها من ملابسها بعنف وهي تهتف بغضب شديد:
-لا بقولك أيه ده أنا أنزلك الفيديو بتاعك ده على النت وأعمل إعلان ممول يخليه يلف مصر كلها في اقل من 24 ساعة فـتعالي ننهي الحوار ده بقى و لمي الدنيا و هاتيلنا الشبكة اللي جابهالك
شهقت بندم وهي تلطم على وجهها:
-كان يوم أسود يوم ما وقعت على الراجل ده
زفرت آيتن بنفاذ صبر :
– برافو عليكي.. خليه بقى ألوان و ننهي الحوار ده
تنهدت بمرارة:
-طيب ثواني هدخل أجبلك الحاجة
آيتن بتحذير:
-لا يا حبيبتي ..أنا داخلة معاكي ولو طلعوا أقل.. قسما بالله هخليكي تندمي عمرك كله..
المرأة بخوف:
-لا لا والله ..حاضر هجبلك كل الدهب اللي جابهولي
__________________________________
قصت آيتن لصديقتها خديجة ما حدث معها لمشكلة المرأة وما فعلته لها
خديجة بحزن:
-تقريباً كل الرجالة بقت كده إلا قليل أوي ..عشان كده إلافضل أنّ الست لو كان معاها مبلغ كويس أو أرض متديش حاجة لجوزها هو راجل ويقدر يتصرف ويصرف وهي تشيل فلوسها لوقت خيانته أو غدره عشان تقدر تعيش من غير ما تحتاج لأي حد
أومأت آيتن بأيجاب:
-حنيتنا الزيادة والمثالية بتاعتنا وإننا بقينا واحد ده أكبر غلط عشان مبيطمرش فيهم ولا عمره هيعترف بفضلها وجميلها ومساعدتها له والنتيجة يا أما هيغدر بيها أو هيخونها ومش هيهمه أي حاجة ولا هيهمه عياله ولا عشرة ولا سنين
ابتسمت خديجة بفخر:
-بس بجد برافو عليكي يا آيتن ضربتي عصفورين بحجر واحد ..خرجتي البت من حياته ورجعتي الشبكة الغالية اللي الست دي كأنت هتلهفها و أديتيها للعميلة بتاعتك..وكمان هتخلي الراجل يعيش فترة خأيف ان المرض يكون اتنقله
ثم تابعت بدهشة:
-بس بستغرب كل عميلة ليكي كأنت بتعشق جوزها وبعدين تفكر تعمل فيه كدا
آيتن بتبرير:
-الست مبتتخلاش عن جوزها أو حبيبها ولا بتقسى عليه إلا لو وصلها لمرحلة إلاهانة وقلة القيمة والضرب؛ مين هيفكر ينتقم من حد بيعشقه كده إلا لو اتأذي منه.. مفيش!
لتسألها خديجة بفضول:
-عندك حق .. طب هي بعد ما تعرفه الحقيقة هتسيبه ولا هتكمل معاه؟
ابتسمت آيتن بحزن:
-بصي الغدر للأسف بيدمر أي علاقة فـ أنتي الوحيدة اللي بتقدري تقيمي الموقف بأنك تكملي وتشوفي المركب بتغرق أو تنطي منها قبل فوات الاوان
– صحيح هتعملي ايه مع حمزة بعد الموقف السخيف اللي عمله
هتفت آيتن بغضب متذكرة:
-أنا بقى مش هسكت يا خديجة ومش هسيب المهمة دي وهخليه يندم على كل كلمة قالها
أومأت خديجة بإيجاب :
-وأنا واثقة أنّك هتقدري
___________________________________
لاحظت منة تغير ايتن معها وهروبها الدائم من الكلام معها حتي ردودها عليها أصبحت باردة ومختصرة، فشعرت ان هناك شيء ما حدث..فقررت أن تنتظرها بعد انتهاء الكورس
-ايتن…
تجاهلتها قائلة ببرود:
- معلش مخدتش بالي
زفرت منة بضيق :
-في ايه يا آيتن أنتِ متغيرة كده ليه مش فاهماكي.. هو أنا عملت حاجة ضايقتك ؟!
ردت بنبرة ساخرة :
-لا بس كده أحسن..
منة بنفاذ صبر:
- ممكن افهم في ايه لو سمحتي ؟ واضح جدا انك متغيرة أو في حاجة مزعلاكي مني.. حتى لما بسأل حمزة عنك قالي انك مش بتتكلمي معاه
– حمزة !.. غريبة مش ده اللي هو كان عايزه !
جحظت عيناها بدهشة:
– عايز ايه ؟ انا مش فاهمة حاجة
– متاخديش في بالك يا منة…بس هو شايف أن صداقتنا دي متنفعش … شايفني غيرك
– بصي انا مش هسيبك غير لما افهم حصل ايه.. حتى هو مش عايز يحكيلي بس شكله بوظ الدنيا صح ؟
صاحت ايتن بغضب:
– اللي حصل ان هو شك فيا و كان مصدق كلام رهف .. كنت خارجة انا و صاحبتي و جوزها وهي مكنتش لسه وصلت واتهمني و مكنش فاهم لسه انه جوز صاحبتي
– لا غلطان بجد…وحتى لو مش جوز صاحبتك هو ماله اصلا..دي حياتك وأنتِ بجد إنسانة محترمة..انا مشوفتش منك حاجة وحشة
– شكرا يا منة .. بس ده مش مبرر أنه يتهمني وفي الاخر يفهم أنه اتسرع و يعتذر على الموقف السخيف
شعرت بالندم على تسرع حمزة وتصديقه لكلام فارغ :
-متزعليش منه أصل اللي مر به في حياته خلاه يبقى كده.. مبيصدقش اي حد بسهولة
ردت بنبرة ساخطة:
-أيه اللي مر بيه يعني ؟
اجابتها بحزن :
- مواقف حصلتله حولته لشخص كده
ثم أردفت معتذرة:
-أنا آسفة يا آيتن عشان هو اتسرع و فهمك غلط.. والله هو مكنش كده
– عادي يا منة.. أنتِ ذنبك ايه
منة بندم:
-متزعليش منه بجد سوء فهم.. وانا هعرفه ازاي يقول كده
– لا متقوليلوش حاجة طبعا…خلاص الموضوع اتقفل وهو اتكسف لما عرف أنه جوز صاحبتي.. طمنيني عليكي اخبارك ايه؟
– عايزة أحكيلك اللي حصل معايا بقى وأنتي مش موجودة
ومن ثم سردت عليها أحداث ذلك اليوم مع هذا الشاب المجهول
منة بهيام:
-كان قمر بجد أيه الجمال ده! حاجة كده جامدة شبه أبطال الروايات والممثلين..أنا حسيته عايز يقول حاجة بس اتحرج أو يمكن بيتهيألي.. بس أنا مخنوقة هتجنن ..اللي أنا حسيته يومها غير أي مرة شوفت فيها حد وأعجبت بيه
آيتن بتبرير:
-أنتي بس حاسة الإحساس ده عشان أول مرة تشوفي راجل زيه راجل بجد من المواقف والمعاملة ومكنش هدفه يشقطك مثلاً .. أنتي عجبتك جدعنته معاكي وانه شهم
منة بحزن:
بصي يا تونا سيبك من شكله.. بس فعلا حسيته راجل بجد.. شوفت في عينيه رجولة مش موجودة دلوقتي ولا هتبقى موجودة..بس تفتكري هشوفه تاني؟
آيتن بتفكير :
– لو ليكي نصيب أنّك تشوفيه تاني أكيد هتشوفيه ..رب صدفة خير من ألف ميعاد
منة بابتسامة:
-مش صدفة ده قدر جميل من ربنا ..كان نفسي حتى أعرف اسمه بس ..ده البطل المجهول اللي كنت بدور عليه حتي لو مش هشوفه تاني بس مش قادرة أنسى الموقف ده ولا هقدر انساه بسهولة
آيتن باستغراب :
-طب ليه يا منة محاولتيش تعرفيه بطريقة غير مباشرة ؟
لمعت عيناها بحزن:
-مقدرتش لساني عجز عن الكلام.. وبعدين خوفت يفهمني غلط ويقول عليا مش محترمة.. أنا اكراش على ولاد اه لكن في الحقيقة ممكن اقلب بطة بلدي ومعرفش أعمل حاجة
__________________________________
شعرت أماني بالقلق فمنذ أسبوع لم تأتِ منة لديهم كالعادة.. قلقت عليها؛ لتسأل حمزة بشك:
-أومال منة فين يا حمزة بقالها اكتر من أسبوع مبتجيش عندنا يعني..غريبة أنت مزعلها؟
ضحك حمزة :
– هي منة بتزعل برضو ؟ ده أنا نفسي أشوفها مرة بتعيط
تنهدت أماني بقلق فشعرت أنّ هناك شيئا ما حدث معها :
-طب اتصل بيها كده شوفها مالها عشان فاتورتي خلصانة
هاتفها حمزة على الهاتف قائلا بمزاح:
-أيه يا منوش فينك؟ مجتيش يعني بقالك أسبوع
ليتابع قائلا بسعادة:
-مش جاية الأسبوع الجاي كمان؟! وطي صوت الزغاريط يا ماما لحد ما نتأكد من الخبر
ضحكت منة :
– خالتو برضو اللي هتزغرط؟
حمزة بجدية:
-لو بعرف كنت زغرط يا منوش
صاحت منة بإحراج:
-يا اخي هموت من كتر الحب ده والله مش كده
هتفت والدته بعتاب:
-حمزة اديهاني اطمن عليها بقى
ثم ناول الهاتف لوالدته:
-خدي ماما عايزاكي
__________________________________
في اليوم التالي
قرر حمزة أن يذهب ليطمئن على منة ويعرف ما حدث معها وخاصةً أن صوتها كان متغيراً
قهقه حمزة قائلا:
-طب وربنا يا منوش وحشتيني أوي
صاحت منة بتذمر:
-يا اسطى بطل كدب بقى
هتف حمزة بجدية:
-بجد وحشتيني..عايش زي القبيلة اللي من غير كلب
والدتها بابتسامة:
-هقوم أعملك حاجة تشربها يا حمزة
استغل الفرصة ليعرف ما حدث لمنة فقصت عليه كل شيء بخصوص الشاب الذي رآته بالصدفة
لمعت عيناه بغضب شديد قائلاً:
-أنت مجنونة؟ ازاي أصلاً تركبي تاكسي مع واحد غريب.. افرضي كان خطفك؟
همست منة بهيام:
-ياريت
صاح حمزة بعصبية:
– منة أنا مبهزرش ..افرضي كان متفق مع التاكسي
منة بتبرير:
-بطل تتفرج على أفلام أكشن كتير، وعموما أنا اللي وقفت التاكسي مش هو، وهو ركب قدام أصلاً
هتف بتحذير:
-برضو ميتكررش تاني اللي حصل ده..مفهوم!!
– عارف.. أنا أول ما شوفته حسيت اني هقوله قلبي ومفتاحه دول ملك أيديك ..أنت مش فاهم أنا اتغيرت بسببه يا حمزة.. تخيل بطلت اكراش على حد
قطب حاجبه بدهشة:
-لا بجد!
منة ببراءة:
-بجد ..أنا اتغيرت 360 درجة
حمزة بنبرة ساخطة:
– 360 درجة يعني متغيرتيش يا هبلة أنتي كده رجعتي لنفس النقطة .. 180 درجة يعني اتغيرتي
منة بغيظ:
– يا رخم
ضحك حمزة قائلا :
-بما إنّك كئيبة بقى وأنا مش متعود عليكي كده؛ فقررت أتنازل وأخرجك
منة بسعادة :
-موافقة بس بشرط تجيب آيتن معانا عشان نفسي أشوفها
رد بحدة:
– هي مش هتوافق
زمت شفتيها بضيق:
-حمزة والله آيتن بجد كويسة أنت ليه عملت التصرفات الرخمة دي معاها…
قاطعها قائلاً ببرود:
-عارف بس هي مش هتوافق صدقيني
جحظت عيناها بذهول :
-عارف!!! و لما انت عارف ليه اصلا تتصرف كده
– كان سوء تفاهم والله يا منة … انا مكنش قصدي .. مجرد بس اني خوفت تكون هي مش كويسة أو حاجة بس هي كانت محترمة جدا
منة بعتاب:
-شوفت يعني كلامي طلع صح أهو لما دافعت عنها قبل كده
حمزة بلا مبالاة:
-اه
ابتسمت منة قائلة بتلقائية:
-طب أيه أعتذر لها بقى
رد ببرود :
-آه ماشي..ما انا اعتذرتلها يا بنتي في المطعم وهي تجاهلتني…و كمان حاولت اكلمها تاني لقيتها بتتجاهلني بجد
زفرت منة بضيق:
-لا أعتذر لها بجد يا حمزة أنا عارفة انك عمرك ما هتعملها بس أنت فعلاً جرحتها وضايقتها
قاطعها بحزم:
-طيب يا منة بعدين
منة بعناد:
-عموما أنا مش هسامحك ولا هخرج معاك غير لما تعتذر لآيتن وكمان تعزمها تيجي معانا
زفر حمزة بنفاذ صبر:
– أعزميها أنتِ طيب
_________________________________
في الصباح
دلف عمر إلى غرفة اخته وفي يديه بعض الحلويات التي تحبها منة
ليقول عمر بابتسامة:
-منوش ..جبتلك چيللى كولا من اللي بتحبيه
غمزت منة بعيناها قائلة بشك:
-يا قلب منوش.. عامل مصيبة صح ؟
عمر ببراءة مزيفة:
-بصراحة اه..جالي استدعاء ولى أمر
شهقت منة بصدمة:
-يخرب عقلك ده بابا آخر مرة حلف أنّه مش هيروح تاني حتى لو اترفدت من المدرسة
زفر عمر بضيق مبرراً:
-ما هو المدير برضو حلف أنّه مش هيدخلني المدرسة إلا ومعايا بابا وفاضل يومين على امتحانات الميدترم وقالي لو بابا مجاش هيحرمني من الامتحانات .. أعمل أيه يا منة
قطبت حاجبيها بانزعاج:
-يخربيت سنينك يا عمر ..أنت أيه معجون بمأية عفاريت.. مش عارفة طالع شقي لمين كده؟ ده اختك ملاك
عمر بمكر:
-خلاص أنا لقيت الحل
__________________________________
كانت منة تتحدث معها عبر الهاتف وتحاول إقناعها لتأتي معهم هي وحمزة
منة بشك:
-أنتي لسة زعلانة من حمزة بقي ؟
فهي منذ آخر مقابلة بينهم لم تعيره أي اهتمام ولا تتحدث معه وعندما يجتمعوا سويا تتجاهله
آيتن بثبات:
-لا أبداً بس أنا مشغولة كتير الأيام دي في الشغل
-يا سلام! وبعد الشغل؟
-هروح لصاحبتي
-وبعد ده كده وراكي حاجة ؟
آيتن بنفي:
-لا مفيش
-طيب نتغدى بكرة مع بعض
-لا هتغدى في الأوتيل
همست منة بسخرية:
-بكرة الجمعة على فكرة
آيتن بتردد:
-ها ..اه ..ما انا يعني
قاطعتها بجدية :
-نتغدى مع بعض أنا وأنتي وحمزة عشان عايز يخرجني وأنا نفسي تيجي معانا عشان وحشتيني
آيتن ببرود:
-آآه طيب
منة بتبرير:
-طيب أنا عموماً مش عايزة اخرج معاه غير لما أنتي تيجي، هنعدي عليكي ناخدك ونروح مطعم حلو كده ونتغدى..تمام ..ها..
__________________________________
دلف عمر إلى الصالة، ليقاطع والده من قراءة الجريدة الصباحية وهو يقول بتوجس:
-بابا ..أنت فاضي؟
-عأيز أيه ؟
قطب حاجباه بتفكير وهمس باتزان:
-في استمارة لازم ولي الأمر يمضيها
والده بدهشة:
-أنا أول مرة اسمع كده؟
عمر ببراءة متصنعة:
-معرفش هما قالولي كده
هتف والده بتهديد :
-طيب هاجي معاك بس عارف لو طلعت عامل مصيبة!
هز عمر كتفيه باستنكار:
– معملتش حاجة
__________________________________
كان يجلس في الشرفة يتذكر أفعاله معها، هي لم يكن لها أي ذنب كي يتهمها..شعر أنّه تسرع بالفعل
دلفت إليه والدته وهي تناوله فنجان القهوة:
-مالك يا حبيبى سرحان في أيه؟
-مفيش يا ماما..
تمتمت والدته بضيق فشعرت أنه تذكر شيء عكر مزاجه:
-نفسي تنسى يا حمزة..انسى وعيش حياتك عادي..عايزاك ترجع حمزة بتاع زمان
هتف بنبرة ساخطة:
-زمان!!! والنبي يا ماما ما تكلميني عن زمان أنا كده أحسن بكتير
أماني بنبرة حانية:
-يا حبيبي ده نصيبنا وقدر ومكتوب يحصل كل ده وأنا واثقة ان ربنا هيعوضك عن كل اللي شوفته.. نفسي أشوفك مبسوط بجد ومتجوز وعيالك بيتنططوا قدامي كده..ربنا يهديك يا حبيبي…
لتردف بنبرة حزينة :
-كان نفسي كندة اختك تكون عايشة وسطنا…وحشتني اوي يا حمزة .. ملحقتش افرح بيها…راحت بدري اوي… كان زمانها دلوقتي قد منة
اغمض عيناه بوجع :
– وحشتنا كلنا يا ماما…كل ما بشوف منة بفتكرها..بفتكر انها كانت قدها.. وكل حاجة كنتي بتعمليها للاتنين زي بعض…
– اومال يا حبيبي كانوا اخوات بالرضاعة..
ربنا يرحمها يارب … انا يمكن قريبة من منة و بهزر معاها وبحبها كده عشان مبحبش ازعلها ابدا …ونفسي اشوفها مبسوطة…
– عقبال ما تفرحي بيها يا حبيبتي
– وافرح بك أنت كمان…
– أن شاء الله يا حبيبتي
_______________________________________
في مدرسة عمر وبالتحديد مكتب المدير
دلفا إلى المكتب ومعه عمر ليقول بابتسامة :
-ازيك يا استاذ فتحي؟.. فين إلاستمارة اللي همضيها لعمر؟
فتحي بسخرية :
-استمارة أيه؟ ابنك لاعب في جهاز كمبيوتر ومبوظه وأنت جاي عشان كده ..عشان حلفت ما هدخله المدرسة غير لما تيجي
زفر والده بغضب حارق:
-طيب شوف هيتصلح بكام؟
-لا مستر الحاسب الآلي عملوا خلاص
ليلتفت إلى ابنه المشاغب ويقول بتحذير:
-وأنت حسابك معايا في البيت
المدير بصرامة:
-روح على فصلك خلاص يا عمر.. وياريت تعقل شوية
__________________________________
في منزل خديجة
كانت تجلس معها بعد أن جاء لها “بسام” مدير أعمال صديقتها و الذي يعمل معها احيانا
بتقرير عن مراقبته للرجل زوج المرأة التي ساعدتها وهو يذهب إلى كل طبيب و مركز تحاليل وعلى ملامحه الانهيار والتعب
فعلمت انه يبكي و حزين .. خائف مما حدث للمرأة التي كان سيتزوجها .. خائف أن يحدث له عقاب مثلها.. خائف أن تتركه زوجته أن علمت ما سيحدث له
فهي تمثل أمامه انها لا تعلم شيء… حتى ايتن لم تسألها أن كانت ستتركه ام لا
هي انهت مهمتها .. و وصلت لهدفها، إنهاء او بقاء العلاقة بين اي عميلة لها .. أمر لا يخصها تماما
قالت خديجة بضيق :
-الخيانة عند اغلب الرجالة ملهاش علاقة ولا بالست اللي معاه و لا بمشاعرها ناحيته ولا اي حاجة
اومأت آيتن بغضب:
– هي قرف و عين فارغة و حد اتعود على الغلط و الحرام بالنسبة له مبقاش حرام
هتستني منه ايه؟
لفت برأسها للجانب الآخر، هتفت وقد خرج غضبها عن سيطرته :
-أنا بشوفه في صورة كل راجل بنتقم منه !
يتبع…..
…..
ايه رأيكم في البارت????????????
ايه رأيكم في الشخصيات طمنوني الرواية عجباكم ولا ايه ????
الفصل طويل اهو ????❤️تفاعلوا بقى عشان انزل الفصل اللي بعده بسرعة
وصلوه لـ 300 لايك وكومنت وهنزل بارت هديةالفصل العاشر
-أنا بشوفه في صورة كل راجل بنتقم منه.. وبشوفها في كل ست سلبية ضيعت حقها..
الغريب أنّ أبويا ده كان راجل محترم جداً وعمره ما قبل علينا حاجة لدرجة أنّه قدم استقالته من شغله الأولاني عشان مقدرش يتأقلم مع الأوضاع الزبالة والرشاوي والكل كان بيشهدله بـكده .. لحد الست اللي جت تشتري منه شقتنا اللي جمبنا وبنتها معاها كانت مطلقة ..عرفنا بعد كده إنهم ناس شمال وللأسف كانوا لفوا على أبويا لدرجة أنه كان عاوز يتجوز بنتها اللي هي أصلاً اتطلقت بفضيحة من بيت جوزها
تسللت دمعة من عينيها، مسحتها بسرعة لتقول بغضب حارق:
-تخيلي أمي من كتر طيبتها وسلبيتها عشان متهدش بيتها بعد ما يأست أنها تبعده عن الست دي ..قالتله طب لو عايز تتجوز بلاش دي بالذات عشان متجبش أخ أو اخت لعيالك تبقي دي امهم.. كان بيعذبنا حرفيا ضرب لا يمكن حد يتخيله وأنا كبنت كنت بتضرب أكتر من أخويا اللي مكنش بيجي جنبه اصلا، وكانت بتسخنه ويجيبها تتفرج على شكلي بعد ما اتضرب لدرجة في مرة عيني كانت هتتصفي وقعدت أسبوع بشوف بعين واحدة وهي كانت بترد بكل برود تقولي وايه يعني أبوكي بيربيكي! ما أبويا كان بيضربني
احتضنتها خديجة ورتبت على ظهرها، لتكمل آيتن بألم:
-كان بيضرب طفلة مكملتش غير سبع سنين يربيها عشان اتأخرت خمس دقايق بس عينيها تتقفل أسبوع ؟ يربي طفلة ماكنتش عارفة حاجة كل ذنبها أنها اتحطت في اختيار غلط بين أب وأم مش عارفين يستمروا مع بعض والأب بيطلع كل عقده في عياله..
بالرغم من مرور تلك السنوات إلا أنّ هذه الذكريات مازالت محفوظة؛ فـما فائدة النسيان ما دامت تـلك التفاصيـل محـفورة بعُمق داخـل عقـلها، حتى لو استطاعت أن تفقد ذاكرتها ستظل بوجـهها القبيح تـطاردها في مراحـل عمـرها، لا الحديث عنها يريـحك ولا النسيان يشفيك؛ فـأتركها وتخطاها
خديجة بشفقة غير مصدقة كل ما كأنت تعانيه آيتن من صغرها :
-معقولة! كل ده كان بيحصل معاكي يا آيتن
آيتن بحزن مؤلم ينهش قلبها :
-وأكتر من كده مليون مرة ..أنا حكيتلك أقل حاجة حصلت منه.. كفاية كدا يا خديجة عشان تعبانة وهروح
خديجة بتبرير:
-عشان كده بتحسي بمتعة فظيعة وانتصار لما تعلمي على كل راجل فيهم
-أيوة .. ده غير إن أنا حاسة اني بجيب حق أمي اللي هي معرفتش تجيبه زمان
فـأمها تعبت كثيراً في حياتها، حتى بعد انفصالها عن أبيها كأنت لا تملك شيئاً، لم يترك لهم أبيها أي شيء ذو قيمة، بل بالعكس طردها من الشقة وأعطاها مهلة لتبحث عن شقة أخرى إيجار، تركوا المحافظة القديمة التي كانا يسكنان بها وانتقلت هي وآيتن إلى محافظة الفيوم وبعد سنوات انتقلت إلى محافظة الإسكندرية، كانت أمها تعمل بمصنع للخياطة نظراً إلى عدم استكمال تعليمها، ورفضت تماماً أن تعمل آيتن ابنتها في فترة المدرسة، فعملت آيتن أثناء التحاقها بالجامعة وبعد تخرجها استكملت عملها حتى تعرفت على خديجة خلال آخر سنة لها بالجامعة وتوسطت لها عند هاني لتعمل بفندقه وبذكائها واجتهادها وصلت إلى منصب جيد
__________________________________
في مطعم يطل على البحر
كانت آيتن تتجنب النظر إليه مرتدية فستان باللون الاسود قصير، بينما منة ترتدي فستان واسع طويل شاردة…تدور بعينيها بحثاً عن ذلك المجهول الذي رآته سابقا، لا زالت صورته مرسومة على نافذة ذاكرتها .. إلا أنّ صياح حمزة بصوت عال أفاقها من شرودها
هتف حمزة بابتسامة :
-باشا مصر
سلم عليه الشاب صديقه:
-يا ميزو .. حبيبي إزيك
-إيه يا سيف مختفي كده ليه يا بني؟
-الشغل والله أنت عارف
التفت حمزة مشيراً إلى سيف، قائلا :
-طب اتفضل اقعد..أعرفكم يا جماعة..ده الرائد سيف عز الدين صاحبي.. و دي آيتن زميلتي في الشغل يعتبر و شاطرة جداً
اتسعت حدقتي منة البنية بصدمة، شعرت أنها في حلم..فـهو يقف امامها .. البطل المجهول يعرف حمزة، لكن متى وكيف؟! لتقطع حبل أفكارها وتعرفه بنفسها فهذه كانت فرصتها
-وأنا منة بنت خالة حمزة
سيف بابتسامة :
-أهلاً تشرفت بمعرفتكم
علقت نظرها عليه وهي تتفحص كل تفاصيله وطريقة حديثه مع حمزة
“سيف”: شاب في الثلاثون من عمره، يحمل ملامح جذابة وحادة، بشرته قمحي مع لون عينيه العسلي، شعره بنى فاتح،طويل، يمتلك جسداً قوياً رياضياً
قاطعتهم منة وهي تستأذن:
-طيب عن إذنكم يا جماعة
هتفت آيتن باستغراب:
-ايه رايحة فين يا منة؟
همست منة بخفوت بجانب أذنها:
-تعالي معايا يا آيتن
استأذنا معاً ودخلا إلى الحمام لتقص عليها منة كل شيء
شهقت آيتن باستغراب:
-يعني هو ده الشاب اللي أنتِ شوفتيه قبل كده و وصلك لكارفور وقعدتي فترة اتجننتي به؟
صاحت منة بسعادة :
-أيوة هو أنا مش مصدقة يا آيتن بجد.. معقولة الصدفة دي!
ازدادت دهشة آيتن لتهتف مبتسمة:
-ده بجد ؟ أنتي متأكدة أن هو؟
أومأت منة بإيجاب:
-أيوه والله هو، أنا مانستش شكله خالص من يومها..ملامحه فضلت محفورة في خيالي
آيتن بجدية:
-طب بصي أنا عايزاكي تكوني طبيعية كده وتقيلة عشان ممكن يأخد باله أنك مركزة معاه؛ لأن شكلك كان مُلفت
همست منة برجاء:
-حاضر بس المهم أنا عايزة منك طلب ضروري
رجعوا إلى الطاولة..ثم وجهت آيتن كلامها لحمزة قائلة بابتسامة رغما عنها:
-حمزة .. تعالى عايزاك في موضوع ضروري كده
رفع حاجبه باستغراب..فهي أتت معهم إلى المطعم بصعوبة بعد مكالمة منة لها..ولم تتحدث معه طوال الطريق وتتجاهله تماماً، ليسألها:
-في ايه؟
آيتن بسرعة:
-قوم..عايزاك خمس دقايق كده
حمزة بحرج :
-طب عن إذنك يا سيف مش هتأخر
-لا خد راحتك
ابتسمت منة بشرود قبل أن تلتفت إلى سيف قائلة برقة:
-ايه الصدفة الجميلة دي!
التفت سيف إليها قائلاً باستغراب:
-صدفة إيه؟
يبدو أنّه لا يحمل أي فكرة عنها أو كأنه لا يعرفها
همست بخيبة أمل :
-أنت مش فاكرني ولا إيه؟! أنا منة
كلامها بالنسبة له كأنه بلا معنى فهو لم يتذكرها بالفعل..ليجيبها بتوجس:
-لا مش واخد بالي معلش !
زفرت منة بضيق غير مصدقة :
-معقولة! اتقابلنا قبل كده الشهر اللى فات..مش فاكر كارفور؟ والتاكسي!
قاطعها محاولاً إعفاءها من الاستمرار:
-أنا آسف..بس شكلك متغير مفتكرتش بسرعة بس
منة بمرح:
-احلويت ؟ أنا عارفة..
سيف بتوجس:
-تقريباً كنتى لابسة نضارة نظر صح؟
– لا دي قُرب نظر، بلبسها احيانا كل فترة.. اصل مبشوفش بوضوح من بعيد
-عموما فرصة سعيدة يا آنسة منة
وضعت كفها أسفل ذقنها قائلة بهيام:
-أنا أسعد وحقيقي مبسوطة أني شوفتك تاني
قاطعهم صوت رنين هاتفه ليجيب سريعاً:
-أيوة يا عمتو .. حاضر يا حبيبتي ..
ثم التفت إلى منة قائلاً بجمود:
-طيب عن إذنك
تركها واستأذن من حمزة وخرج من المطعم، بينما آيتن وحمزة عادوا إليها مرة أخري لتقول منة بحيرة:
-هو سيف راح فين؟
-سلم عليا ومشي عشان عنده مشوار واتأخر
أردفت بحزن:
-يا خسارة
حمزة بقلق:
-في ايه يا منة مالك؟
منة بارتباك:
-أصل .. أصل ده سيف اللي كنت بحكيلك عنه
-سيف مين مش فاهم
-ده الولد اللي وصلني لكارفور بتاكسي و..
قاطعها متذكرا:
-اللي قعدتي فترة مكتئبة بسببه؟
قالت منة بسرعة:
-أيوه.. يلا بقي قولي يا حمزة ..متجوز؟ خاطب ؟عرفته إزاي ومنين وامتى؟ وبيحب ايه..
قاطعها بسخرية:
-ما تسألي على مقاس شراباته بالمرة؟
منة بتمني:
-لا ده لما أتجوزه
قهقه حمزة بضحكة عالية:
-تتجوزيه؟ لا أنسي.. سيف مالوش في الارتباط والكراش والحاجات دي..ده يوم ما يفكر يرتبط هيخطب على طول أو يتجوز
زفرت منة بضيق :
– Good Boy يعني ?
طب مين قالك إنّه مش مرتبط ما يمكن مرتبط ومش معرفكم
هز رأسه بتأكيد:
-لا أنا عارف دماغ سيف طبعا وهو مبيقتنعش بالارتباط غير الرسمي وبس
صاحت منة بمرح:
-ياربي بجد أنا من الفرحة أول ما شوفته أول حاجة جت في بالي أسعار غرف نوم خشب زان أصلي
حمزة بنبرة ساخرة:
-يخربيت سنينك يا منة .. هو ده اللي اتغيرت يا حمزة وعقلت!
قاطعته بجدية متصنعة:
-اتجننت تاني لما شوفته..
لتردف بتذكر:
-المهم بجد عايزة رأيكم في حاجة؟
آيتن باهتمام:
-خير؟
منة بتساؤل:
-اختار قاعة فرحي في قاعة شهرزاد ولا قاعة فرحتي
ضحك حمزة حتي ظهرت غمازتيه الجذابة:
-سبحان من صبرني عليكي والله
شعرت “منة” أنّ الحياة ابتسمت لها وصادفت الشخص الذي حلمت به ووجدته في خيالها طيلة عمرها لتشعر بأنها وجدت خاتم سليمان الذي سيحقق لها أمنيتها لتحقق ما تتمناه في صدفة جمعتها به للمرة الثانية فهي كانت يأست من رؤيته مرة أخرى، لكن أحبطها حديث حمزة عنه وإنّ ذلك الطريق مسدود صعب الوصول إليه
لتفيق من شرودها قائلة بتوسل:
-والنبي يا حمزة اديني الاكونت بتاعه بس أجيب قراره
هتف بغضب:
-أنتي هبلة تجيبي ايه؟ منة أهدي كده واتلمي
قالت منة بتوسل:
-اخص عليك يا ميزو.. ربنا ما يحطك في ضيقة يارب ويجعل حياتك كلها مضيئة
-منة فوكك مني عشان مش ناقصك ولا فاضي للتفاهات بتاعتك دي
__________________________________
في اليوم التالي
نظرت آيتن باستغراب لـرهف لأنها وجدت أن مكتبها قد تحول لكوافير خاصةً في وجود حمزة و رآتها تطالعه من بعيد..فمرة تضع أحمر الشفاه ومرة ثانية تكحل عينيها وتعدل من مظهرها ومرة أخرى تهندم شعرها،
فتقدمت نحوها واقتربت منها
قائلة بنبرة ساخطة:
-لا ده إحنا نفتحلك كوافير بقى
انتفض جسد رهف قليلا..
زفرت آيتن بضيق عندما لم تجد إجابة منها لتعيد كلامها بنرفزة :
-هو أنتي مش المفروض عندك تقرير بتكتبيه ؟
رهف ببرود:
-أيوه بكمله أهو
آيتن بتصيح :
-قصدك لسة هتعمليه!
رهف بغيظ وهي تهندم شعرها:
-المفروض أنا واجهة فبظبط شعري والميكب بتاعي
آيتن بسخرية:
-اه ما إحنا فتحناها كوافير محمد الصغير هنا .. فيه حاجة اسمها تويلت برضو تعملي فيه اللي أنتي عايزاه؟
تحولت ملامح رهف إلى الاحراج لتهمس بهدوء:
-خلاص يا آيتن بلاش فضايح ممكن عشان شكلي قدام زمايلي
همست آيتن بتحذير:
-شيلي الكوافير اللي أنتي فاتحاه ده وياريت تكملي شغلك
أومأت بايجاب:
-حاضر
__________________________________
في المساء
كانت تجلس على طاولة في الفندق مع أحد رجال الاعمال لشرح صفقة عمل بينهم، بينما لاحظت أن عيني الرجل مركزة عليها بإعجاب واضح ولم ينتبه إلى أي كلمة تقولها آيتن بخصوص العمل
زفرت آيتن بضيق:
-سعد بيه ممكن حضرتك تركز في الشغل أفضل ؟
رد الرجل بجرأة:
-مفيهاش حاجة لما أركز معاكي وبعدين نشوف الشغل
زفرت آيتن بنفاذ صبر.. قائلة بحدة:
-لا ده حضرتك زودتها أوي.. اسفة مضطرة الغي الميتنج
كان حمزة أيضا في الفندق مع إحدى النزلاء من الشركة التي يعمل بها، ويتابعها من قريب لكنها لم تراه، عندما لاحظ ملامحها تبدلت للضيق وانفعالها قرر أن يتدخل في تلك اللحظة وسمع آخر الحوار بينهم
حمزة بتحذير للرجل:
– لما حضرتك تقرر تتكلم في شغل.. يبقى تتكلم باحترامك و عينيك متروحش بعيد على حاجة متخصكش، وياريت تتعامل مع ايتن بكل احترام.. دي من أنضف واحسن البنات اللي ممكن تتعامل معاها
زفر الرجل بتهديد :
– أنت مين عشان تكلمني كده؟
هتف حمزة بحدة :
– حمزة العقاد ايه سيادتك مش فاكرني؟؟
كنت عملتلنا مشكلة كده في الشركة عندنا لو تفتكر بس احنا عديناها
تنحنح الرجل بحرج وهو يزفر بضيق ويشيح وجهه بعيدا، هتف حمزة بحدة لآيتن:
-تعالي عايزك دقيقة
نظرت إليه ايتن هامسة :
– ميرسي جدا على كلامك بس
لتردف بعناد:
-مفيش داعي زي ما أنت شايف أنا مش فاضية
لم يعطيها فرصة للرفض، جز على أسنانه بغضب وجذبها من يدها غير مهتم بهذا الرجل، أخذها بعيداً؛ لتفلت يدها بعنف من قبضته التي ألمتها قليلا
همست بغضب :
-إيه ده! أنت مجنون.. إزاي تشدني كدا .. وبعدين أنت مالك اصلا بشغلي أنا مش طفلة صغيرة، انا بعرف كويس اوي امتى انهي الشغل وامتى اكمل فيه.. واعتقد أن بعد كلامك ده خلاص هو اتكسف وهيبص في الارض
سألها بنبرة صارمة:
-أنتي إيه مقعدك مع الراجل ده؟
آيتن ببرود:
-نعم؟ ده بيزنس
ثم تابعت بحدة:
-أنت بتدخل في شغلي ليه؟ وبعدين مش أنا بمشي شغلي بطرق تانية زي ما بتقول
قاطعها بغيظ وهو متجاهل تلميحاتها:
– متغيريش الموضوع عشان سبق واعتذرت وأنتِ عارفة !
ليردف قائلاً بحذر :
-الراجل ده بلاش يا آيتن ..فضايحه مالية البلد
لوت شفتيها الصغيرة، قائلة بسخرية:
-ميخصنيش التاريخ بتاعه.. أنا يخصني اني أقفل الديل معاه وخلاص هي خلصت
زفر معيداً شعره للخلف بفوضوية:
-أنتي مش شايفة بيبصلك إزاي! وتلميحاته
ردت بسخرية:
-لا مش شايفة ..أنا مركزة في شغلي أكتر
صمت حمزة قليلا بحيرة، فقال بآمر:
-الميتنج ده ينتهي.. وماتقعديش معاه.. واضح؟
ردت بغيظ :
– أنا قاعدة معاه في مكان عام في الاوتيل
حمزة بصرامة:
-الاشكال دي أنا عارفها كويس.. وعموما أنا حذرتك وخلاص براحتك، عايزة تقعدي معاه اتفضلي
ردت من بين اسنانها:
-طيب
أوقفها مرة أخرى قبل ان يتجهوا ناحية الطاولة ليقول معتذراً:
-آسف على سوء ظني بيكي قبل كده..
أجابته ببرود:
– متشكرة جداً
زفر بضيق من إجابتها :
– فكرتك هتفرحي لما اقولك كده ؟
ردت بثقة:
-ميفرقش معايا أصلا.. اسفك ده لنفسك لأن قولتلك قبل كده أنا واثقة في نفسي وعارفة أنا ايه
كانت واقفة معه أمام حمام السباحة الخاص بالفندق في ذلك الوقت فكان خالي من بعض الناس في ذلك الوقت أو بالتحديد في المكان الذي تقف معه فيه
فتعثرت بكعبها وهى ترجع خطوتان للخلف، فكانت على حافة المسبح، لتشهق مفزوعة عند سقوطها في المسبح
قلق من صوت شهقتها وهو يلمحها تسقط لتتسع عيناه؛ ونزع سترته وهو يركض سريعا ويقفز خلفها وفي خلال لحظة واحدة كانت يداه تحيطها بجسده؛ لتمسك بعناقه، ركز في عيناها وهي تلتمس صدره بدون قصد، لتقول بصوتها الناعم الحاد:
-أنا بعرف أعوم على فكرة
همس بجانب اذنها بهدوء أربكها قليلا، ولكن سرعان ما أخفته:
-يعني كنت أسيبك تغرقي و أقف اتفرج !
هتفت بنبرة ساخطة:
-لا حنين أوي
أومأ مؤكداً:
-جداً يعني
و دون وعي منها شردت في عينيه الزيتونية لحظات، بينما هو يتأمل لون عيناها الخضراء الممزوجة بلون العسل الفاتح المختبئ بحدقتيها الواسعتين،
سحب نفسه من بين يديها ليجلس على حافة المسبح..
وهي ما زالت تحت تأثير تأمله، لم تستطع إنكار جاذبيته الواضحة.. ولكن !
قاطع شرودها قائلاً بسخرية :
-أنتِ هتفضلى متنحة مكانك؟ هتبردى كده !
تطلب الأمر بضعة ثوان لتستعيد فيها تجميع كلماتها، هامسة باستفزاز:
-أنا كنت دافية من شوية بس بردت دلوقتي
غمز لها قبل أن يردف بوقاحة :
-أرجعلك تاني؟
اتسعت حدقتاها باندهاش من وقاحاته، لتبرر باندفاع:
– قليل الأدب .. أنا قصدي كنت دافية قبل ما أنزل البيسين .. مقصدش لما كنت قريب مني
ابتسم لها قائلا بمكر وهي تنظر له بغيظ:
– على فكرة أنتِ كده ضاع منك الميتنج بتاع الشغل
لا نليق نحن بالحب يا سيدي، فأنت مكابر وأنا لا أنحني.
– نزار قباني
_________________________________
تفحصت الحساب الشخصي على الفيسبوك لحمزة إلى أن وجدت صفحة سيف في قائمة الأصدقاء وظلت طوال الليل تتفحص صفحته الشخصية جيداً حتى جمعت أكبر قدر من المعلومات
في اليوم التالي
كانت تتحدث مع آيتن في مكتبها قبل بدء الكورس
منة بجنان:
-أنا كنت بايتة في الاكونت بتاعه يا بنتي
آيتن بضحكة:
-ها وعرفتي حاجة عنه بقى؟!
منة بابتسامة وهي ممسكة الهاتف ومفتوح على صور سيف :
-عنده 30 سنة عنده طفل صغير مش عارفة اخوه ولا قريبه اسمه لؤي بيحبه أوي..شكله مش مرتبط زي ما حمزة قال.. بصي هو عموما لبسه شيك من صوره، شعره حلو..عنده ساعة لونها معجبنيش هبقي أخليه يغيرها لما نتجوز، بس مش مشكلة باقي الساعات بتاعته شيك و ألوانها حلوة ..أعتقد نوع الموبايل Iphone بس معرفش نوع كام ..بس أعتقد نوعه حلو وكمان نضاراته الشمس اللي بيلبسها ماركاتها حلوة.. لا باين إنّهم مرتاحين مادياً .. بس ثواني كده أركز في الاسانسير
ثم دققت نظرها مرة أخرى في الهاتف وأكملت حديثها:
-والاسانسير باين معقول برضو..والعمارة شكلها طويلة ..احسبي معايا كده كام شقة
ضحكت آيتن لتصححلها:
-لا كام دور مش كام شقة ..لو اعتبار أنّ هنحسب الدور الارضي والجراچ هنشيل اتنين، تلاتة، اربعة، 11
يعني معناه أنّ العمارة 11 دور
منة بمرح:
-بحب أوي العمارات اللي فيها اسانسير تحسيها شيك كده
ردت آيتن بذهول:
-يخرب عقلك يا منوش عرفتي كل ده
صاحت منة بتذمر:
-طب أعمل إيه بقى .. أنا هموت واشوفه تاني بجد
دققت آيتن النظر فى صورته لتقول بشك:
-بس تعرفي عندي إحساس إنّ أنا شوفته قبل كده بس فين مش عارفة..لكن شكله عدى عليا أنا متأكدة
منة بسرعة:
-فين بقى ها؟
آيتن بشرود:
-معرفش فين بس حاسة إنّ أنا شوفته
يتبع….
********
ايه رأيكم في البارت ????❤️الرواية عجباكم ولا لأ طمنوني ????????
ايه رأيكم في البطل التاني “سيف”
تفاعلوا و شجعوني يا حلوين عشان انزلكم بارت بسرعةالفصل الحادي عشر
في قاعة احتفالات كبيرة بالفندق، كانت تجلس بجانب خطيبها لحضور حفل زفاف أحد معارفه بالفندق خاصته
خديجة برقة وهي تأخذ رأي هاني في فتاة أمامهم من بعيد:
-ها إيه رأيك يا بيبى في الفستان اللي هتلبسه اخت العروسة
هاني بإعجاب:
-إيه الجمال ده!
خديجة بغرور:
-تحفة صح! من الاتيليه بتاعي ده أصلاً.. اشتريتهولها مخصوص
هاني بخبث:
-بيرڤكت يا قلبي.. كل حاجة فيها جميلة
خديجة بغضب حارق:
-نعم ؟ هي مين دي اللي كل حاجة فيها جميلة
غمز لها بضحكة:
-أنتِ يا روحي .. مش آخدة بالك إني بتكلم عليكِ ؟
احمرَّ وجهها بخجل :
– بكاش أوي و بتعرف تثبتني
اقترب منها ونظراته موجهة علي عيناها ممّا سبب لها ارتباك، قائلا بإعجاب :
-لا ده بجد .. أنتِ النهاردة قمر أوي
أخفضت رأسها بخجل، وهي تهمس بارتباك:
-ميرسي يا بيبي
قاطعهم صوت موظفة من طاقم التنظيم بالقاعة:
-هاني بيه ..ممكن ثانية
زفر هاني بهمس:
-إيه يا هادمة اللذات
ضحكت خديجة :
-في إيه ؟
– حضرتك منظم القاعة عايزك.. في مشكلة مع العروسة
استأذن من خديجة :
-طيب عن إذنك يا حبيبتي
قاطعته بقلق:
-لا أنا جاية معاك
دلفا إلى الغرفة التي تتواجد بها العروسة
قال منظم القاعة بغضب:
-حضرتك في خناقة بين بنت خالة العروسة و خطيبها و منكديين على العروسة و متوترة
– لازم يعني خناقة في يوم زي ده؟ ليه؟
– بيقولوا بسبب أن هي لبست فستان قصير وخطيبها اتفاجئ وقالها تغيره وهي رفضت و عمالين يتخانقوا جوه والعروسة بتحاول تهديهم مفيش فايدة وهو عايز يفركش الخطوبة لو كملت الفرح بالفستان ده وهي مصممة تكمل به
– خلاص مش لازم يحضروا بقى
– ما هو حضرتك بنت خالتها هي وخطيبها كانوا هيرقصوا في فقرة في النص التاني بعد البريك مع العرسان رقصة سلو جنب العروسة كذا Couple سوا وكده بوظوا الفقرة دي و طبعا بنات خالتها لو اختهم فركشت مش هيرقصوا عشان زعلانين عليها
تحول هدوءه إلى عصبية:
– ايه الاستهبال ده بجد دي عروسة المفروض يراعوا مشاعرها ليه بينكدوا على بعض في يوم زي ده !..
خديجة بضيق حارق:
– أنا هدخل للعروسة و احاول أهديها
تدخلت خديجة بينهم و حاولت هي و هاني تهدئتهم ولكن بلا فائدة و بدأت العروسة بالتوتر أكثر و عيناها تدمع لتنبههم خبيرة التجميل ان يخرجوا خارج الغرفة و يستكملوا شجارهم بالخارج، فانتهى الشجار على ترك الرجل لخطيبته و هي تناوله محبس الخطوبة خاصتها و حزن اخواتها عليها وشجارهم معها
قالت خبيرة التجميل بانزعاج:
-طب يا آنسة خديجة.. مستر هاني دلوقتي مفيش وقت لازم نلاقي حصل للمشكلة وبسرعة.. ياريت حد يساعد العروسة لأن بحاول أصلح الميكب على قد ما بقدر وهي متوترة
دلفت آيتن في هذه اللحظة لتقول بقلق :
-إيه يا جماعة صوتكم عالي ليه؟
– في مشكلة مع العروسة اللي فرحها النهاردة في القاعة
قصت عليها خديجة ما حدث سريعا، فتدخلت ايتن تحاول تهدئة العروسة هي و صديقتها ولكن بلا فائدة فهي حزينة على أقاربها، ولكن هم دائما يتشاجروا و يتركوا بعضهم عدة مرات و يعودوا إلى بعضهم مرة أخرى، ولكن في يوم مهم مثل هذا !
قالت شقيقة العروس بتساؤل إلى خديجة :
– آنسة خديجة .. حضرتك طبعا مخطوبة ينفع اطلب منك طلب
– اتفضلي يا قمر
– ممكن ترقصي في الفقرة دي مع خطيبك وكده نعوض الترتيب اللي كنا هنعمله ومش هتزعل اختي
– معنديش أي مشكلة
– بس كده محتاجين Couple كمان معانا..
قالت آيتن بسرعة :
– كنت هشوفلك امين و وئام بس للأسف روحوا بدري
– أنتِ تنفعي كمان
آيتن بابتسامة:
-أنا ؟ لا أنا ..مسؤولة الماركتينج بتاع الأوتيل
بإعجاب قالت:
-تمام بس حضرتك تنفعي
– أنا مش مخطوبة ولا متجوزة
– انا هخلي اخويا يرقص معاكي سلو..ده بعد اذنك طبعا
آيتن بنفي:
-لا طبعا أنا مش هينفع
– مفيش غيرك ممكن يساعدنا ومفيش وقت أصلاً
-أنا مرقصتش سلو قبل كده وكمان مش لابسة دريس سواريه
قالت العروس بترجي:
-لا أرجوكي مفيش حد هينقذني غيرك لأن اختي هترقص مع خطيبها و الآنسة خديجة وخطيبها .. وبعدين دي مرة بس
آيتن بعناد:
– بس انا مش هينفع.. ومش مستعدة كمان.. حتى مرقصتش قبل كده سلو
-آيتن.. معلش وافقي وبعدين اعتبريها تجربة.. ولو على الفستان انا هبعت اجيبلك قبل البريك فستان من الاتيليه عندي جديد.. وكده كده أنتِ مش بتحبي الميكب غير خفيف .. و مش هتحتاجي تظبطي غير حاجات بسيطة
بعد مرور ساعة ونص على انتهاء نصف الفرح وفي خلال فترة الراحة، كانت خديجة أحضرت فستان إلى ايتن.. فكانت ترتديه بإحدى الغرف التحضير
كان حمزة وبجانبه شقيق العروسة و هاني وخديجة سوياً
نظر هاني لهذا الشاب قائلا بفخر:
-يا بني أنت محظوظ و دي لحظة تاريخية أصلاً عشان آيتن هترقص معاك
خديجة بضحكة :
-فعلا دي أول مرة آيتن ترقص مع حد
الشاب لهاني:
– بعد اذنكم عشان معايا مكالمة
أومأ بايجاب:
-آه اتفضل
تطلعت فتاة مساعدة منظم القاعة بعمق إلى حمزة:
-أيوة بس في حاجة يا مستر هاني
-إيه تاني؟
الفتاة بمحاولة إقناعه :
-آيتن قصيرة وهي لابسة كعب طولها كده هيبقى متوسط، و اخو العروسة لما هيرقص معاها هيكون طولهم متساوي أو يمكن يبقى اقصر منها.. فـالاحسن يعني إنّها ترقص مع حد طويل وفيه فرق شاسع مش حاجة بسيطة أو اقصر منها
خديجة بفضول:
-حد زي مين طيب!
لتشير إلى ذاك الوسيم “حمزة”
-ده مثلا
حمزة بدهشة:
-أنا؟؟ لا مستحيل.. أنا وآيتن؟؟
الفتاة بمحاولة إقناعه :
-و ليه مستحيل .. حضرتك طويل جداً وشكلك هيبقى متناسق اوي معاها و لايقين سوا
ثم قاطعته وهي تنظر خلفها :
– خلاص انا هعتذر لاخو العروسة و حضرتك اللي هترقص معاها
حمزة بسرعة:
-لا مش هينفع حضرتك بتهزري أكيد
-لا عادي جداً..
__________________________________
كانت تحاول السيطرة علي المفاجأة التي صدمتها عندما رأته أمامها بدلاً من شقيق العروسة، بينما كانت ترتدي فستان باللون الاسود بقماش يلمع، الفستان بحمالات صغيرة ولكنه لا يظهر مفاتنها ويصب إلى أسفل ركبتيها بكثير ويضيق على جسدها، صحيح انها ترتدي احيانا الملابس القصيرة و تحب أن ترى نفسها بها ولكن تراعي احيانا بعض الملابس الملفتة بشدة لا ترتديها
فهي عكس اصدقائها يرتدون الملابس الطويلة والمتوسطة الاتساع أحياناً
تحرك ليقف بجانبها ليلقى عليها سحر ابتسامته، وهو يهمس لها قائلا بجمود :
– مساعدة تنظيم القاعة قالت لازم نرقص إحنا..خلينا نخلص الفقرة الرخمة دي
حدقت به بدهشة، فهمس بصوته الرجولي:
– عشان منبوظش الفرح يعني
أخذ يدها في يده الدافئة لتستريح في راحة يده ، وسحبها من يدها ليدخل حلبة الرقص بجانب العروسين و الثنائيين الآخرين ، واقترب منها بهدوء ، وأخذ يدها ووضعها على كتفه ليوجه نظره إلى عمق عينها الخضراء الجميلة ، وأمسك يده الأخرى بخصرها النحيل بتملك أذهلها.
رمقته آيتن بنظرات غيظ، لتقول بنبرة ساخرة:
-مفيش مشكلة طالما هتعرف ومش هتكسفنا؛ عشان شكلك هيبقي محرج أوي
همس بهدوء بجوار أذنها ، متحركًا على إيقاع بداية الأغنية ، قائلاً مستفزًا:
-طب خلى حد غيرك يقول الكلام ده..مش دي أول مرة لكِ برضو؟
أمسك حمزة بيدها وجذبها تجاهه بسرعة حتى اصطدمت بصدره القوي، و شهقت من القرب بينهما، بينما كان يحيط بخصرها بيده.. بدأوا بالرقص والتحرك عبر حلبة الرقص.. للاندماج مع بداية الأغنية “عيونه دار” كانت لتامر حسني وبداية الكوبليه الأول:
“حبيبي يا كل الحياه اوعدني انك تفضل معايا ما تغبش عني
خد قلبي مني خليك حاضني لحد النهايه
دا عيونه دار جنه ونار ضحكة نهار أجمل رموش
شدوني ليك وأنا دوبت فيك وازاي وليه ليه ما تسألوش
الله عليك وانت واقف بين ايديا
ضحكة عنيك بيها بنسى الدنيا ديا”
كان حمزة يحرك آيتن ليجعلها تتحرك حول نفسها، ثم أعادها مرة أخرى بين ذراعيه واصطدمت بصدره مرة أخرى ، بينما كانت تتحرك بخفة واحترافية ، وكلما تحركت كان شعرها الأسود الحريري الطويل يتحرك معها ..
فوجئ حمزة بقدرة آيتن على الرقص رغم أنها كانت المرة الأولى لها وكانت متمكنة معه.
فرفعت وجهها لتلتقي به ، فهو كان طويلاً جدًا بالنسبة لها ، رغم أنها كانت ترتدي الكعب العالي:
-ايه! فاجئتك؟
ليهمس بجانب أذنها قائلا بإعجاب:
-متوقعتش بصراحة
تغيرت حركتها مثل باقي الأزواج حولها بحيث كان ظهرها مواجهًا لصدره ، ورأسها بجوار قلبه ينبض بقوة مثل قلبها ، وصوت الأغنية تتصاعد؛ قاطع حمزة صمتهم قائلاً بصوت أجش في أذنها:
-ركزى في الكوبليه الجاي ده من الأغنية
ثم أدارها بحيث اقتربت منه وجهًا لوجه ؛ ليستكملوا المقطع الأخير من الأغنية:
“لو يوم يغيب يلقى حبيب يحلم معاه آه ويحس بيه
هفضل أنا أحلم هنا يجمعنا يوم وأحضن عنيك
الله عليك عليك وانت واقف بين ايديا
ضحكة عنيك بيها بنسى الدنيا ديا”
أدارها حمزة للمرة الأخيرة وأمالها إلى ظهرها ، ثم أعادها ببطء لتلتقي بوجهها بوجهه ، ليغرق في عينيها الخضراء الممزوجة بلون العسل قليلًا ، حتى ارتفع الخجل على خديها تلقائيا.
أبعدها عنه قليلا مواجها عيناها المرتبكة قائلا:
-لسة زعلانة منى؟
ابتسمت لتهمس برقة :
-أنا مش زعلانة خلاص
ارتسمت ابتسامة رضا علي شفتيه..
وهنا انتهت الموسيقي وبدأ الضيوف التصفيق بحماس لكل من شارك بالرقصة مع العروسين؛ لتتخلص آيتن من ارتباكها الغريب بينما كان حمزة في غاية السعادة التي لا يعلم مصدرها..
هل لأنها سامحته واراح ضميره؟! أم لأنه كان يراقصها!
__________________________________
اتسعت عينا هاني بعدم تصديق ليقول بدهشة:
-هو اللي شُفته ده بجد؟ آيتن رقصت مع حد؟
تجاهلت خديجة حديثه فهي كانت مشغولة بشيء آخر
اقتربت من آيتن وسحبتها لتمشي خلفها، وقفوا وحدهم بعيدا عن الحفلة
لتسألها خديجة بفضول:
-أخبار الانتقام إيه ؟
رمقتها آيتن بتردد:
-انتقام إيه؟
اتسعت حدقتيها بدهشة :
-آيتن ! انتقامك لشذى من حمزة عشان تجيبلها حقها منه ولا أنتِ نسيتي ؟
أجابتها آيتن بشرود لتنفي حديثها:
-لا طبعا منسيتش ..وبعدين مانا بدأت اهو من بدري في الشغل وبدأت امثل عليه
همست بسخرية:
-لا بس طلعتي ممثلة شاطرة برافو يا تونا.. نظراتكم لبعض كمان عجبتني..ماكنتش أعرف إنّك هتندمجي أوي كده؟
زفرت آيتن بضيق:
-ديچا أنا كده بوقعه عشان يحبني
ابتسمت خديجة بمكر قائلة بتحذير:
-آيتن خلي بالك من نفسك.. وخدي بالك بس لا يتقلب السحر على الساحر وأنتِ اللي تقعي مش هو
قطبت حاجبيها بدهشة لتجيبها بنبرة حادة:
-ايه يا ديچا أنتِ اللي بتنصحيني بكده؟أومال لو مش عارفاني يعني! أنتِ اكتر واحدة عارفة آيتن
همست بتمني:
-ماشي يا ست القوية لما نشوف اخرتها ايه
أومأت بغرور وثقة:
-اخرتها أنا اللي هكسب طبعا..ديچا روحي ركزي مع خطيبك
أومأت خديجة بهدوء و في قلبها شعور غريب حول هذه المهمة بالذات، رغم أنها تثق في قدرات آيتن
__________________________________
الثانية عشر صباحا، دلفت بخفة إلى الشقة .. ولجأت إلى غرفتها..
قاطعها صوت والدتها المفاجأ بغضب حارق وهى تلقى كلمات تهكمية :
-اهلا ! يا انسة آيتن ..غريبة جيتي بدري يعني مش عوايدك
شردت لتحاول اختلاق أعذار لوالدتها ..لتقول بإرهاق:
-ازيك يا ماما
فادية بنبرة ساخطة:
– الساعة عدت 12 وأنا مقعدة نفسي بالعافية استناكي ..ما كنتي تباتي بره أحسن
-طيب مادخلتيش تنامي ليه بس؟
فادية بغيظ:
-أنام؟! أنت هتفرسيني؟عايزاني أنام وأنتِ برة لحد دلوقتي عادي كده يعني! ده يبقى اسمه ايه بقى؟!
آيتن محاولة السيطرة علي نفسها:
– معلش يا ماما كان فيه فرح في الاوتيل بس وكان فيه مشكلة و لازم أحضره
فادية بسخرية:
– هو افراح و حفلات الفنادق بقت ضمن شغلك !
أخذت نفسا عميقا قائلة بهدوء:
-ماما يا حبيبتي احنا اتكلمنا في الحوار ده قبل كده 100 مرة وانا فهمتك نظام شغلي وأنت عارفاني كويس
همست والدتها بحنان :
-طيب يا حبيبتي أنا هحضرلك العشا
اقتربت منها لتقبلها من وجنتيها:
-ربنا يخليكي ليا يا احلى أم
__________________________________
في صباح اليوم التالي
كانت منة تقود سيارة والدها و هي شاردة فيما ستفعله بعد قليل فعقلها يقول إنّ هذا خطأ وجنون وقلبها يطمئنها إن حدث شيء خطأ فحمزة سيقوم بإصلاحه سريعا وهي لم تأذي أحداً بخطتها المجنونة.. هكذا كأنت تقول لنفسها؛ دق هاتفها في تلك اللحظة لتجيب
منة بتساؤل :
-ها أنتِ فين..؟ طيب خليكي مكانك أنا قربت أوصلك
أغلقت منة الهاتف لترتسم على شفتيها الممزوجتان بأحمر الشفاه الوردي ابتسامة جذابة حين تمنيها نجاح خطتها المجنونة، و ما هي إلا دقائق ثم أوقفت السيارة ناحية فتاة تبدو من هيئتها انها بسيطة بجلبابها الريفي و حجابها المنسدل على كتفها، فتحت منة باب المقعد الأمامي جلست بجانبها؛ لتسألها بتأكيد:
-ها يا دلال حفظتي هنعمل إيه ولا لا ؟
ارتبكت دلال؛ لتقول بتلعثم :
-ها … آه آه
منة بانفعال:
-ها إيه بس حفظتي كل اللي قولتهولك ولا أشوف حد غيرك يقوم بالمهمة دي
دلال بثبات يغلفه الخوف :
-آه يا ست منة حفظت كل حاجة خلاص
منة بتحذير :
-مش عايزة أي غلطة فاهمة
أومأت رأسها بإيجاب:
-فاهمة حاضر
أخرجت منة أموال من حقيبتها وأعطتهم لها
-خدي دول دلوقتي و بعد تنفيذ الخطة هتاخدي تاني
دلال بقلق :
-بس حضرتك يعني متأكدة أنّك هتعرفي تخرجينا .. أنا خايفة لنتحجز و منعرفش نخرج
منة بنفاذ صبر قائلة بتعب:
-يا بنتي أنتِ هبلة ! .. قولتلك 100 مرة ان الضابط اللي هناك صاحب ابن خالتي ولو حصل حاجة هيخرجنا
شهقت دلال بخوف:
-يلهوي يعني ممكن يحصل حاجة وماتعرفيش توصلي لابن خالتك عشان يكلمه
زفرت منة بعصبية :
– مين قال اني مش هعرف أوصله!
دلال بتلعثم:
-أصل يعني خمنت
زفرت منة بضيق :
-هتاخدي الفلوس و تنفذي اللي اتفقت معاكي عليه ولا لا ؟
-لالا هنفذ طبعا
قالت منة بمكر:
-تمام هقرب بقى من القسم
يتبع…..
**********
مستنية رأيكم وتشجيعكم ????????????
متنسوش لايك وكومنت على البارتالفصل الثاني عشر
أمام قسم الشرطة
كانا كلا من “منة و دلال” يتشاجران، حتى جاءهم ضابط من خلفهم؛ قائلا بصوت خشن صارم:
-بس يا بت أنتِ وهي اسكتوا في إيه لـكل ده يعني!
التفتت منة، بينما ظلت دلال مسمرة أمامها بخوف، لترد منة بعصبية :
-ايه ده أنت بتتدخل ليه حضرتك؟
هتف الضابط بحدة :
-اتلمي يا بت أنتِ و اتفضلوا من هنا
زغرت منة لدلال بغضب لكي تنطق، لتقول دلال بتوسل :
-إلحقني يا باشا البنت دي مفترية و كانت عايزة تتخانق معايا.. مش كفاية كسرت الشغل بتاعي اللي كان في الشنطة و بهدلت كل حاجتي يا باشا
قطبت منة حاجبيها بدهشة:
– اتفقت معاكي هديكي فلوس تعويض!
صاحت دلال بانفعال:
– لأ انت بتضحكي عليا ومش هتديني حاجة، حرام عليكي يا مفترية
زفر الضابط بضيق:
-شوفي تمن الحاجة كام و اديلها لما أنتو مبتعرفوش تسوقوا.. بتتنيلوا بتركبو عربيات ليه نفسي افهم؟
منة بسخرية :
-مش معايا كاش دلوقتي قولتلها تركب معايا و هنشوف أقرب ماركت أو ماكينة و اسحب منه رفضت واتهمتني أنّي نصّابة
دعاء مصطنعة البكاء :
-شوف يا باشا عايزة تنصب عليا ازاي
منة بغرور مصطنع عكس شخصيتها :
-انصب عليكي ايه يا بتاعة أنتِ، مش عارفة أنتِ بتكلمي مين!
الضابط بنفاذ صبر :
-ما خلاص بقى أنتِ و هي مش فاضيين لكم
منة باندفاع :
-ما تخليك في حالك حضرتك، أنت مالك أساساً بينا تتحشر ليه !
حملق بها بأنفاس لاهثة تكاد تحترق من الغضب ليقول بنرفزة:
_ اتحشر مين يا بت أنتِ.. أنا بقي هربيكي
منة بنبرة ساخطة :
-تربي مين مش لما تربي نفسك الأول
أشار الضابط بيده علي العسكري ليقول بحدة:
-يا سعيد .. هاتلي الاتنين دول جوه
نظرت دلال للضابط متوسلة، قائلة بصوت شبه باكي:
-الله.. وأنا مالى يا باشا والله ما عملت حاجة
بينما ابتسمت منة بمكر لنجاح اول بداية خطتها و هي دخولها القسم و استفزاز ضابط
أدخلهم العسكري مكتب الضابط الذي تشاجرت معه منة
صاح الضابط بحنق:
-كنتي بتقولي بقي إنّي عايز اتربى! أنا بقى هعلمك ازاي تفكري كويس قبل ما تردي بعد كده
تأففت منة وهى ترمقه بغيظ :
-أوكيه وريني
سألته دلال بخوف:
-طب وأنا يا باشا براءة كدا أروح؟ والله ما عملت حاجة
زفر الضابط بعصبية متجاهلها:
-بس يا بت اسكتي دلوقتي
صاحت دلال بتوسل:
-يا باشا أنا ذنبي ايه طب خليها بس تديني الفلوس وأنا هروح
هتفت منة بتأكيد :
-يا حبيبتي ما أنا قُلت لك مش معايا كاش تعالي نروح نسحب و أنتِ اللي عملتي كل ده
صاح الضابط بزهق :
-عايزة كام
دلال بهدوء:
-300 جنيه
ثم وجه حديثه لمنة:
-وأنت مش معاكي فلوس كاش ؟
– لأ
– عندك محفظة على رقمك صح ؟
– أيوة
بنفاذ صبر:
– تمام هخلي حد يسحبلك
استدعى شخص ما يعمل بالقسم، وطلب رقم ما على هاتفها وادخلت منة رقم حسابها السري لكي تسحب عدة نقود من خلاله حتى تأخذها دلال، و في خلال دقائق تصرف لحل مشكلة الفتاة وأعطاها الثلاثمائة جنيه ثم أعطى منة الباقي فهي سحبت بزيادة
سألته دلاا بفضول :
-كده أنا براءة صح يا باشا؟ أمشي أنا بقي
الضابط و هو يناولها بطاقتها الشخصية :
_ آه براءة .. خدي بطاقتك و روحي اشتري الحاجات اللي الاستاذة دي كسرتها
دلال بابتسامة:
-إلهي ربنا يكرمك و يسعدك يارب و ما يوقعك في ..
قاطعها بانزعاج:
-ما خلاص بقى روحي ولا تحبي تشرفي في الحجز شوية
هزت دلال رأسها بنفي:
-لا لا يا باشا متشكرة مع السلامة
خرجت دلال و هي تحمد ربها أنّ الخطة مرت بسلام
ثم وجه حديثه لمنة:
-أما أنتِ بقي هتتفضلي معانا شوية
همست منة معتذرة :
-لا ميرسي مش هينفع والله خليها مرة تانية
قطب حاجبيه بدهشة:
-نعم ؟
منة بتبرير :
-مش هقدر أتفضل شوية عندكم عشان خالتو مستنياني على الغدا دلوقتِ وكده هتأخر عليها
نظر الضابط لمنة قائلا بسخرية:
-لا أنتِ هتتفضلي معانا شوية احنا لسة هنفتح محضر عشان بعد كده تتعلمي تقلي أدبك تاني
فكرت منة قليلا:
-أوكيه هعمل مكالمة ممكن
الضابط بلا مبالاة:
-اتنيلي اعملي
أخرجت هاتفها و اتصلت على حمزة
منة بصوت شبه باكي مصطنع :
-الو .. أيوة يا حمزة شُفت اللي حصلي .. لالا أنا كويسة دي واحدة غبية لقيتها قدامي، فرملت فجأة الحاجات اللي معاها اتكسرت و مكنش معايا فلوس كاش أعوضها قُلتلها اركبي هسحبلك لقيتها بتردحلي وبتتخانق معايا في الشارع وكنا قريبين من قسم فـالضابط جه يشوف في إيه وأنا يعني اتنرفزت عليه وبعدين دخلنا وروحها بعد ما سحبت لها الفلوس و مرضيش يروحني أعمل إيه يا حمزة .. بس قول بسرعة قبل ما موبايلي يفصل شحن
جحظت عينا حمزة قائلا بعصبية :
-أنتِ غبية! أكيد قُلتي له كلام متخلف زيك أنتِ في قسم إيه ؟..
ليردف قائلا :
-آاه ده سيف هناك طيب اديني الظابط ده.. الو يا بنتي روحتي فين!
انقطعت المكالمة بتعمد فجأة ومنة تبتسم و تتمنى أن يأتي سيف
بعد عدة دقائق دلف سيف إلى مكتب الضابط، ابتسمت منة تلقائيا وقلبها يخفق بعنف وهي تنظر إليه افاقت من شرودها على صوته
حدجها سيف بنظرة عتاب وبعد تنهيدة طويلة:
-إيه اللي عملتيه ده يا انسة منة؟.. ياريت تعتذري لأيمن باشا
تنحنحت منة لتقول بعناد:
-أنا ما غلطتش
زفر سيف قائلاً بحذر:
-لا غلطتي وعيب أوي اللي حصل ده
-أنا ما غـ…
قاطعها سيف بهدوء محاولاً السيطرة علي غضبه، قائلا بحدة:
-منة
منة بهيام محدثة نفسها:
-يلهوي اسمي طلع حلو اوي منه
زفر سيف هواءاً حاراً كثور هائج عندما لم يجد منها رد:
-آنسة منة اعتذري عشان عندي شغل و عشان تروحي!
منة معتذرة :
_ طيب أنا آسفة علي كلمة بتتحشر اللي قُلتها، وعلى طريقتي في الكلام مش قصدى
الضابط بتحذير:
_ عشان خاطر سيف باشا بس غير كده والله كنتي هتباتي هنا النهاردة
أومأت منة برأسها بتفهم :
-أوكيه ميرسي
ثم التفتت إلى سيف وهي تبتسم له قائلة:
-حلو كده
ابتسم سيف وأخذها ليخرجوا من مكتب الضابط
وضع كفيه في جيب بنطاله وهو واقفاً بشموخ ليقول :
-يلا عشان تروحي بقي
منة بابتسامة :
-لا أنا لسه هشرب حاجة
سيف بتحذير :
-طيب بالهنا و الشفا و ياريت متعمليش مشاكل تاني
منة بضحكة يغلفها الخجل:
-حاضر
سيف بجدية:
-تمام عايزة حاجة
منة بضيق :
_إيه ده! أنت بتطردني كده ليه؟ مش هتعزمني على حاجة اشربها؟
رد سيف بحزم :
-أنا آسف بس عشان مش فاضي دلوقت .. أن شاء الله أشوفك بعدين
ردت منة بمشاكسة:
-لا بعدين إيه؟ مفيش بعدين في دلوقتي .. ومتقلقش أنا اللي عازماك على قهوة
قهقه بضحكة جميلة بينما شردت منة فيها، لتقول بابتسامة رقيقة:
-ها قولت إيه ؟
سيف بلهجة رسمية:
-مش هينفع
تحولت ملامحها للغضب .. و التفتت أمامها فاوقفها صوته وهو يقول بابتسامة :
-ربع ساعة بس مش اكتر عشان بجد عندي شغل
أومأت رأسها بابتسامة وقلبها يكاد ان يرقص من فرحتها بنجاح خطتها أخيراً
__________________________________
-ميرسي أوي بجد على القهوة..وعلى إنّك وافقت يعني تيجي معايا
ابتسمت “منة” قائلة تلك الجملة، بينما كانا يتحتسيان فنجانا قهوة في مقهى قريب من قسم الشرطة
سيف بملامح جامدة، وصوت نغمة هاتفه يرتفع :
-لا أبداً مفيش حاجة .. معلش ثواني كده
ليجيب على الهاتف:
-أيوة يا ماما ..حاضر يا حبيبتي هعدي عليه وأنا مروح آخده.. مش ناسي طبعا متقلقيش .. ماشي..مع السلامة
سألته منة بفضول :
-في حاجة ولا إيه ؟
أومأ برأسه بإيجاب:
-آه ماما بتفكرني عشان أروح لأخويا الصغير النادي؛ لأنّ عنده تدريب النهاردة وهو بيطمن لما أروح معاه
منة بتساؤل:
-تدريب إيه ؟
-سباحة
-ماشاء الله.. بيتدرب في نادى إيه بقي؟
-القمر
همست منة بتلقائية :
-والله أنت اللي قمر
أدهشته صراحتها، قائلاً بصرامة:
-لا أنا قصدي اسم النادي
شعرت منة بإحراج من اندفاعها وتلقائيتها فهي تتعامل مع أي شيء بقلبها، ابتسمت بخفة تدراي ارتباكها:
-اه عارفة
سيف مستئذناً:
-معلش أنا لازم أمشي.. عشان اتأخرت على شغلي
ثم حدثت منة نفسها بسعادة، بينما يطلب هو النادل لكي يحاسب على المشروبات:
-ياربي.. أخوه في نادي القمر وأنا اللي كنت غبية وبرفض أروح مع عمر أخويا!
__________________________________
جلست بجانب أخوها لتساعده في تصنيع ألعابه التي لا قيمة لها ودائما تتشاجر معه بسببهم؛ لكن الأمر الآن يختلف
لتقبله من وجنتيه:
-مارو حبيبي.. عايزة منك طلب
عمر باستغراب:
-خير!
ربتت علي شعره الذي تعشقه، فهو يصل إلى كتفيه:
-بص يا حبيبي.. أنت طبعا بتدرب في نادي القمر.. واعتقد عندك ميعاد تمرين النهاردة!
-اه .. ليه في حاجة؟
منة بأمر وتحذير:
-أيوة ..عايزاك تقول لماما إنّك عايزني أروح معاك بدالها وكده..بدل ما أقولها انك بتصنع “سلايم” وتشدك من شعرك الحلو ده
نهض مرغما عنه، قائلا بغيظ:
-طيب
__________________________________
كان يحاول إقناع والدته بالموافقة على ذهاب منة معه إلى النادي، لكنها شعرت بشيء غريب
ناريمان بلهجة حادة:
-و من امتى الست منة عايزة تروح معاك.. ده أنا اتحايلت عليها تروح بدالي وترفض .. خلاص احلو في عينيها النادي فجأة
دلفت منة المطبخ متدخلة في الحوار قائلة بتبرير:
-أبداً يا ماما حبيت أريحك.. غلطت كده يعني ؟
التفتت لها والدتها لتصيح بلهجة شك:
-يا قلب ماما..تريحيني؟ إيه السر بقي أنّك تروحي
زمت شفتيها بإصرار :
-سر؟ سر إيه بس يا ماما ..أنا كنت عايزة أغير جو عادي وقلت اروح مع عمر فيها إيه مش فاهمة
ناريمان باستسلام:
-خلاص روحي ..أما نشوف آخرتها
قبلتها من وجنتيها بحب:
-يخليكي ليا يا نبع الحنان يارب
__________________________________
كانت تجلس مع خديجة في مطعم بعد فترة عملهم
لتسألها خديجة بفضول:
-أخبار حمزة إيه؟
تنهدت آيتن بزفرة قوية:
– اهو بيرسم دور الراجل التقيل الغامض.. بس على مين! مبقاش ايتن إما وقعته
غمزت لها خديجة بضحكة:
-لا بس كانت حركة جامدة اللي عملتيها مع منظمة القاعة انها تخليه يبدل مع اخو العروسة وقت المشكلة
هتفت آيتن مؤكدة:
-ما هو مش عايز يتحرك وطبعا ماكنش ينفع أروح أقوله تعالى أرقص معايا .. فقررت أتفق مع البنت و كويس أن اخو العروسة كان طوله وسط، والحمد لله الخطة نجحت
حدجتها بعينين نص مغمضتين بتسلية:
– ياربي ! لو حمزة كان رفض يرقص معاكي
آيتن بغرور وتعالي:
-لا مكنش هيرفض.. حمزة كان عايز يثبت لنفسه أنه أول واحد يرقص معايا خصوصاً لما عرف كده
ضحكت خديجة قائلة بتنبيه:
-هاني لو اكتشف الحوار ده و أنه كان بموافقتك هيستغرب، ده فضل طول اليوم يقولي ازاي ده حصل ايتن وحمزة !
هزت أكتافها باستهتار:
-لا متخافيش أنا منبهة عليها متنطقش وهي اتصرفت بتلقائية واقناع .. وبعدين ده أنتِ اليوم ده كنتي بتحاولي تنكدي عليه ارحمي الراجل شوية
قهقهت قائلة بتبرير:
-بصراحة كنت بحاول أوقع هاني بالكلام يعني أشوفه بيلعب بديله ولا ماشي كويس فعلا
صمتت آيتن ثم نظرت لصديقتها شذرا وأدرفت بلهجة حادة :
-حرام عليكي الراجل ماشي كويس.. مش كفاية مأجلة فرحكم لحد دلوقتى
همست خديجة بمرارة :
-لما اخلص من قدرى الأول والمشاكل اللي ورايا وقتها أفكر في جواز وفرح
هزت رأسها بابتسامة ساخرة:
-أنتِ إللى عاملة في نفسك كده
__________________________________
“منة أنت بتدوري علي حاجة”
قالها عمر عندما لاحظ أن عيون منة تدور حول النادي كله كأنها تبحث عن شيء
أومأت منة بارتباك :
-ها ! لا بس فيه واحدة صاحبتي تقريبا بتيجي هنا
-طيب
وجدته أخيراً..كان جالساً علي إحدى الطاولات ومعه طفل صغير في مثل عمر اخيها، فابتسمت قائلة لعمر:
-ثواني، وراجعالك
زم شفتيه بغضب:
-هتسيبيني لوحدي؟
زفرت منة باستسلام :
-تعالى معايا طيب
اقتربوا من طاولة سيف لتهتف منة بدهشة مزيفة:
-ايه ده ! سيف إزيك؟
سيف بدهشة :
-إزيك يا منة.. بتعملى إيه هنا؟
-أنا بروح النادي دايما؛ عشان عمر أخويا بيتدرب هنا
صمت لثوان ثم أردف بذهول:
-غريبة يعني! مقولتيش إنّ اخوكي بيتدرب في نفس النادي؟
ردت منة بارتباك:
-لا ما أنا نسيت خالص
هز رأسه متفهما:
– إزيك يا عمر
عمر بابتسامة :
-الحمد لله تمام
أردفت منة مشيرة على الطفل الذي معه:
-ده أخوك؟
-آه “لؤي”
-ازيك يا لؤي..أنا منة
لؤي بابتسامة وهي يسلم عليها بسعادة :
– الحمدلله .. تمام .. أزيك أنتِ
– تمام الحمدلله
– أنتِ جميلة يا منة
– والله أنت اللي جميل خالص
ليهم بالانصراف بعد قليل :
– أنا هدخل يا سيف عشان الميعاد جه
-ماشي يا حبيبي أنا هستناك هنا
ثم التفت لعمر يسأله:
-وأنت يا عمر خلصت تمرينك ولا لسه هتدخل؟
أجابت منة بدلا عنه :
-لا عمر لسه شوية
-تمام.. تشربوا إيه؟
منة بنفي:
-لا ميرسي
قاطعها سيف بإصرار:
-لا طبعا مينفعش هطلب عصير فريش ؟ تمام
لينادي على النادل، ثم اقترب منهم ليطلب سيف آمرا منه بعض المشروبات:
– تمام ولو عايزين حاجة غيرهم شوفهم
أومأ بايجاب :
-تحت أمرك يا سيف باشا
ثم التفت مرة أخرى قبل أن ينصرف لعمله موجها حديثه لمنة:
-إيه ده! آنسة منة.. إزيك؟
ابتسمت منة بترحيب:
-أهلاً..إزيك أنت؟
قال النادل بعتاب:
-عاش من شافك أخيراً نورتينا ده حضرتك بقالك فترة كبيرة مبتجيش النادي
يتبع….
مستنية رأيكم وتشجيعكم ????
وصلوا البارت لـ300 لايك وكومنت عشان انزلكم اللي بعده بسرعة ????الفصل الثالث عشر
سحبت الهواء لصدرها ثم زفرته ببطء قائلة بارتباك:
-لا طبعا بحضر اوقات مع عمر بس أكيد أنت مش بتشوفني
هز النادل رأسه مؤكداً:
-لا ازاي أنا بشوف عمر على طول بس مع والدتك
شعرت منة باحمرار شديد في وجهها بعد كلمات النادل، قائلة بهجوم :
-ما تروح تشوف الطلبات ولا هتفضل ترغي
أحنى رأسه باحترام معتذراً:
-أنا آسف ..هجيبه حاضر
عضت على شفاهها لتجيب بإحراج:
-احم.. هو أكيد ماكنش بيشوفني عشان كده مش فاكر
أردف سيف كاتما ضحكته، قائلا بعدم اقتناع:
-آه.. أخدت بالي
بعد مرور وقت قصير، ومن ثم أحضر النادل المشروبات لهم، ذهب عمر شقيقها إلى موعد التمرين خاصته, لتستأذن هي بعدها وتتركه
وهي تسير وحدها تنتظر شقيقها، أوقفها شاب وسيم يكبرها بسنوات قليلة وهو يحاول لفت نظرها لشيء ما ليسير خلفها وهو يحاول محادثتها
صاحت منة به بحدة :
– أنت اهبل يابني!
– أنا آسف والله مش قصدي.. بس هو ممكن اتعرف عليكي… انا بس شوفتك و لفت نظري شكلك و ألواناتك..
عقدت ذراعيها قائلة بغضب :
– لا ده انت اهبل بجد … مبتعرفش والله
– طب ممكن
هتفت بتحذير بنبرة حادة :
– كلمة كمان وهفرج عليك إدارة النادي ويخلوك متدخلش هنا تاني
اعتذر الشاب وهو يختفي من أمامها :
– خلاص انا آسف بجد مش قصدي
تنهدت منة وهي تنظر أمامها قائلة بحسرة :
– احنا مابنتحبش ليه بجد ؟؟
و إيه الواد القمر ده !!!
_________________________________
في اليوم التالي
بعد انتهاء الكورس كانت تجلس مع آيتن في مكتبها وهي تقص عليها أحداث اليوم الماضي
منة بأسف:
-احيه يا تونة لما الجرسون جالنا عشان ياخد الطلبات وكسفني وهو بيقولى ماشفتكيش من زمان وسيف كان خلاص هيصدق وقربت أوقعه.. مقولكيش بقى كنت بقول يا أرض اتشقي وابلعيني
غرقت آيتن بالضحك حتى ادمعت عيناها:
-أنا اتكسفتلك سلف والله يا منة
ضحكت منة بمرارة وهي تمسك هاتفها:
-آه والله كسفني المتخلف ده..بس سيبك الواد سيف قمر بالميري يخربيته..حتي بصي صورته
ضحكت آيتن ساخرة:
-أنتِ أي حد يا منة بتكراشي عليه بتحسسيني أنّه حب العمر
منة محاولة إقناعها :
-ما أنا ماكنتش لسه حبيت وبقى عندي مشاعر ..
– مشاعر إيه يا بنتي؟ أنتِ تعرفيه أصلا؟
– يا بنتي قعدت معاه مرتين امبارح
– بصراحة مكنش ينفع تصرفاتك امبارح… ازاي اصلا تروحي القسم .. وتروحي النادي كمان..طب افرضي قال لحمزة هيزعل منك
– اصل أنا حاسة إنّ سيف هو حب عمري
أردفت آيتن مؤكدة:
-آه طبعا ده جه بعد 100 كراش !
ردت منة بثقة:
-لا معلش بقى طلعيلي واحد فيهم كان متكرر
ضحكت آيتن:
-يخرب عقلك يا منة
منة بحزم:
-طب نتكلم بجد بقى
– اتفضلي
تنهدت منة قائلة:
-أنا عايزة أوقع سيف ، معايا الاكونت بتاعه على الفيسبوك وخليته يضيفني عنده .. هشوفه يومين في الأسبوع وقت تدريب أخواتنا؛ المطلوب بقى أنّه يحبني وش كده معلش مش هقبل بأقل من كده
حدجتها آيتن بنظرة مستفزة:
-مش المفروض يعجب بيكي الأول !
منة باستنكار:
-لا إعجاب إيه ! أنا عايزاه يحبني خبط لزق كده
شهقت آيتن بدهشة:
-يا مجنونة هو فيه كده؟ لازم الأول يكون في مشاعر منه ناحيتك
صاحت منة بلهفة:
-لا طبعا أنا ميرضينيش اتعبه.. أنا هختارله كل حاجة حتى قاعة الفرع محدداها
– طب افرضي أن سيف ده طلع مش كويس.. او بتاع بنات و لعب
– لا خالص… بقولك مش بيرتبط بحد بيخطب على طول، هذا ذوقي يا بنتي انا كمان عمري ما ارتبطت بحد ولا حبيت.. ولما بيجي حد بصده..
__________________________________
في غرفة الاجتماعات بالفندق
مرَّ أكثر من ربع ساعة ولم تأتِ آيتن ليبدأ الاجتماع؛ هذه أول مرة منذ عملها تتأخر عن اجتماع وتتجاهل الردود
ليهتف هانى بصوت عال موجها حديثه لسكرتيرته التى تقف خلفه:
-رهف
أومأت رهف بإيجاب:
-أيوة يا مستر هاني
زمجر هانى:
-فين آيتن! بتعمل ايه كل ده؟ هي مش آخدة بالها إنّ الميتنج بدأ بقاله ربع ساعة!
-معرفش حضرتك..هروح اشوفها
تنهد بنفاذ صبر:
-انجزي
__________________________________
كانت تبحث عن الملف هي وحسناء فمنذ أكثر من أسبوع تعمل عليه وعندما انتهت منها أخبرت مديرها ليبدأ بتحديد اجتماع
هتفت آيتن بغضب:
-حسناء أنت إزاي تسيبي المكتب وتنزلي؟
حسناء بتبرير:
-أنا مطولتش حضرتك كنت في الريسبشن و دى مش أول مرة أسيب المكتب وأنزل
ضغطت علي أسنانها بقوة حتي شعرت أنّها ستتحطم:
-طب ازاي.. أنا هتجنن؛ ده أنا يدوب روحت التويلت ورجعت الاقي الفايل والفلاشة اختفوا ! اتسرقوا مثلاً ؟
رتبت على كتفها محاولة تهدئتها:
-لا هتتسرق إزاي بس أكيد هنا ولا هنا.. هندورتاني طيب
آيتن بنفاذ صبر:
-بقلك روحت الحمام ورجعت لقيتهم اختفوا
__________________________________
عندما دخلت إلى غرفة الاجتماعات كانت متأخرة عن موعدها نصف ساعة كاملة .. ارتبكت وهي تركض لتجلس على مقعدها المقابل لحمزة، وهي ترتدي فستان باللون الاسود قصير
هتف هاني بعتاب:
-في ايه يا آيتن! كل ده تأخير.. من امتي وأنا باعتلك
أومأت آيتن باعتذار:
-أنا آسفة يا فندم.. أصل..
-أصل إيه.. في إيه مالك انهاردة؟ اتفضلي يلا اشرحلينا الخطط والتقارير اللي هتناقشيها
شحب وجه آيتن وهي تجمع أعصابها:
-حضرتك أنا كنت في التويلت ورجعت ملقتش الفلاشة ولا الفايل اللي طبعت اللي عليهم كل الشغل
ضرب علي المكتب بقبضة شديدة :
-نعم؟ إزاي يعني مش لاقياهم.. إيه اتسرقوا؟
تمتمت بصوت خافت:
-معرفش يا فندم.. بس أكيد ده حصل
تنهد هاني بانزعاج:
-أنتِ بتهزري ولا إيه.. هو ايه اللي أكيد..دي عمرها ما حصلت عندنا..يمكن نسيتيهم هنا ولا هنا
هتفت آيتن مؤكدة:
-لا اختفوا أو اتسرقوامعرفش إزاي!
وقف حمزة بطوله الفارع بشموخ قائلاً بهدوء:
-طب خلاص هاتي النسخة بتاعتهم أطبعيها.. أكيد عاملة Back up
تنهدت آيتن بندم:
-للأسف مش عاملة Back up للفايل ده
أجابها حمزة بكل عجرفة:
-إزاي يعني متعمليش؟ وارد جداً إنّ الفلاشة تضيع أو حتي تتفرمت وقتها كل شغلك يضيع؟ إزاي حضرتك متاخديش بالك من النقطة دي وتعملي احتياطاتك
شهقت آيتن باعتراض موجهة حديثها لهاني بعتاب:
-ما هو حضرتك يا مستر هاني لو كنت مركب كاميرات في المكتب بتاعي أو في الركن اللي قدام مكتبي ماكنش ده حصل وكنت قدرت أعرف حصل إيه!
فأطلق غضبه من عباراتها:
-كاميرات إيه في مكتبك ! ..روحي دوري عليهم يا آيتن وتعالي كملي الميتنج
-حسناء بتدور يا مستر هاني
أومأ هانى معتذراً للجميع:
-طيب اتفضلي خلينا نكمل على ما نشوف المصيبة.. أنا آسف يا جماعة بس أكيد مش هتتكرر تاني وهتتحل
جلس حمزة قائلا بصرامة :
-إحنا طبعا متفقين من البداية إن إحنا هنشتغل مع بعض سنة ولو في خلال السنة دي الأهداف اللي متحققة قلت العقد اللي بينا هيتفركش وهنشوف أوتيل تاني نتعاقد معاه
أطرقت آيتن رأسها :
-أيوة ده اتفاقنا .. إيه اللي اتغير مش فاهمة!
حمزة بابتسامة تهكمية:
-لكن مندورش على شركات سياحة وسفريات ونعرفهم بمستوى الخدمات الهايلة والراقية اللي بيقدمها الفندق عشان يرضي راحة العميل وخصوصا الشركات اللي بتكون محظوظة بعملاء كتير سواء شغل أو علاقات اجتماعية كبيرة
تجاهلت آيتن ابتسامته المتهكمة، لتقول بتبرير:
-على أساس شركتكم بس اللي فيها علاقات كبيرة
أومأ هانى بانزعاج، ثم زغر لآيتن بغضب:
-يا جماعة إحنا مش جايين نتخانق.. إحنا مع بعض وبنشتغل سوا والميتنج ده لازم نفكر فيه كويس عشان في النهاية ده راجع لينا
رفعت وجهها بابتسامة ثقة:
-الأوتيل بتاعنا برضو مش قليل يا مستر حمزة .. وعندنا علاقات كويسة
أومأ حمزة باحترام.. لم يخلو من التهكم:
-بس جت فترة العلاقات وقعت شوية منكم
آيتن بغيظ:
-ده أنت متابع بقي ؟
أردف بسخرية :
-أكيد طبعا مش بشوف شغلي كويس ولا إيه
صمتت مبتلعة الأسهم التي ترغب أن ترشقه به.. ليس خوفا منه ولكن لأنّ؛ موقفها حاليا لا يسمح لها أن تتحداه
أردف آمراً بجدية:
-المهم أنا شايف مصلحتنا واحدة و اهم حاجة عندنا رضا النزيل..عشان كده عايز خطة كاملة للتعامل مع فترات الإجازة والمواسم بكل فروع الفندق وخطة لانشغال أكبر قدر ممكن للغرف على مدار السنة..وكمان يكون فيه خدمة مميزة للعملاء بتوعنا
همست آيتن لزميلتها “وئام” التي بجانبها :
-هو ماله مركز في كل حاجة كده ليه؟
وقف حمزة مرة أخرى، واضعاً يده في جيب بنطاله رافعاً رأسه بترفع قائلا بتهكم ساخر :
-آيتن.. هو أنا قلت إيه من شوية ؟
ألقت عليه نظراتها الحارقة لتجيبه باستفزاز:
-بتتكلم عن وضع الفندق والشركة
قطب حمزة حاجبيه:
-لا قبلها .. على أساس أنّكِ ذكية وبتركزي أوي في شغلك زي ما بيقولوا !
يتبع….
___________________________
ايه رأيكم في البارت ????????
مستنية تفاعلكم عليهالفصل الرابع عشر
أغمضت عيناها محاولة تذكر ما قاله حمزة
ثم رمقها حمزة بنظرة نارية:
-طبعاً حضرتك ضيعتي ورق الشغل لا وكمان مش مركزة في كلامي
قاطعه هاني موجهاً حديثه لآيتن آمرا:
-روحي يا آيتن علي مكتبك دوري علي الورق
ولأول مرة منذ عملها بالفندق يحدث مناقشات حادة مع مديرها، ممكن أن يحدث اختلافات ولكن لأول مرة يحرجها أمام أحد وبالأخص حمزة، شعرت آيتن أنّها تقف عاجزة، لا تعرف ماذا تفعل؟
زفرت آيتن الهواء بصوت شبه باكي:
-مستر هاني أنا ..
قاطعها بانفعال:
-اتفضلي يا آيتن مش هعيد كلامي!
نظرت إلى حمزة فرمقها بنفس النظرة المستفزة التي ألقتها عليه من قبل و زاد عليها ابتسامة ساخرة
__________
كان يجلس علي مقعده بالشركة بهيبته المعتادة وهو يفكر فيما حدث اليوم محاولا إيجاد حل، وفجأة قاطع شروده صوت خديجة ليجدها أمامه:
قائلة برقة وحب:
-هاي بيبي..وحشتني
تأفف بحنق شديد ليرد بصوته الرجولي الخشن:
-خديجة.. أبعدي عني دلوقتى عشان أنا مش طايق نفسي ودماغي هتتفرتك
خديجة بنبرة حانية:
-ليه يا حبيبي سلامتك
زفر بضيق وغضب:
-عشان اليوم اتقفل خلاص..ومحدش خايف علي مصلحة الفندق ولا حد شايف شغله، وأكيد أنتِ جاية عشان صاحبتك وتدافعى عنها كالعادة
ثم تابع بصلابة:
-لا وكله كوم.. وآيتن كوم .. أنا اتصدمت من اللي حصل..وأنتِ عارفة ان آيتن بالذات واثق فيها قد ايه ورغم كده خيبت ظني قدام الكل
خديجة بتوضيح:
-طب ليه حسبتها كده يا حبيبي..الفايل ده اتسرق بالفلاشة
نظر لها بذهول،قائلاً بعصبية:
-هو إيه ده اللي اتسرقوا ؟..أنت هتسمعي كلامها أنتِ كمان واحنا من امتي بيتسرق من عندنا حاجة..لا والهانم كمان جاية تقولى ركب كاميرات في مكتبي عشان يبان إللي يتسرق
هزّت رأسها مؤكدة:
-عندها حق يا هانى
صاح بغضب:
•خديجة بقولك إيه! أنا عفاريت الدنيا كلها بتتنطط قدامي ..هتيجي أنتِ كمان تدافعي عنها وتقولي كلامها صح وعندها حق مش ناقص
أرادت الاعتراض مرة أخرى إلا أنّه لم يسمح لها بذلك، فأنهت الحوار بضيق وهى تهم بالانصراف:
-لا يا حبيبي مقصدش..عموما خلاص انا هسيبك دلوقتي
لم يسمح لها بالمغادرة فأوقفها سريعا لتتحول نبرته إلى نبرة هادئة:
– استني بس … شوفتي بنتكلم في الشغل ونسيت أرحب بكِ
– ولا يهمك انا عارفة ضغط الشغل ..وانا كمان عندي شغل ولازم امشي…هكلمك لما تفضى كده
__________________________________
ربتت والدة منة بحنية على ظهر عمر وهي ترتب له حقيبة الظهر خاصته
-عايزاك تركز كده يا عمر فى التمرين
همس بحب واحترام:
-حاضر يا ماما..بس ممكن أطلب منك طلب
أومأت بايجاب:
-طبعاً يا حبيبي
عمر رغماً عنه، قائلاً ببراءة:
-ممكن منة تيجي معايا
التفتت لمنة، قائلة بشك :
-هي اللي قالتلك صح؟
لكزته منة ليجيبها عمر:
-لا أنا عايزها تيجي عشان خاطري يا ماما هاتيها معايا
استجابت لأمرها بكل هدوء وجلست أمامها، قائلة باحترام:
-خلاص يا عمر عشان ماما كده هتفتكر إنّ أنا اللي قلت لك تزن عليها..وأنت عارف أنا بسمع كلام ماما ومقدرش اكسرلها كلمة
نظرت لها بشك غير مصدقة:
-بجد.. طيب أنا مش موافقة تروحي معاه روحتي مرة وخلاص
تنهدت بضيق وهي تصيح:
-ليه يا ماما..حرام عليكي ليه كده ده ظلم بقى !
أومأت برأسها بتوجس :
-يعني معناه إنّك أنتِ إللى عايزة تروحي أهو !
زفرت منة بارتباك:
-ها..يا ماما مفيهاش حاجة أنا بحب أروح معاه
كزت علي أسنانها بغيظ:
-ماشي يا منة.. يعني فعلا مفيش حاجة هناك
هزت رأسها بنفي:
-لا مفيش هيكون في إيه؟
همس عمر بتذمر ساخر:
-يعني هيكون في كراش هناك مثلا !
__________________________________
دلفت رهف إلى مكتب آيتن لتعطيها تقرير
فسألتها آيتن بتهكم:
-أنتِ اللى دخلتي مكتبي وأخدتي الملف صح؟
رهف باستنكار:
-ملف إيه! ودخلت مكتبك إزاي يعني.. أنتِ بتخرفي
أردفت بغضب حارق وهى تجذبها من ياقة بلوزتها بضيق:
-لا مبخرفش أنا متأكدة إنّك عملتي الحركة الواطية دي.. ومش هسيبك إلا لما تطلعيهم
أفلتت رهف نفسها منها، قائلة بتهديد:
-بس بقي اسكتي بدل والله لأروح أقدم فيكي شكوة عند موظف الـ hr ويتصرف معاكي
تدخلت حسناء سكرتيرة ايتن لتفصلهم عن بعض، وهى تحاول تهدئة آيتن:
-خلاص يا ميس آيتن.. اهدي كده.. هي هتعمل بيهم إيه..روحي علي مكتبك يا رهف
__________________________________
في النادي
-سيف باشا .. فيه واحدة ست كبيرة بتشتغل في النادي هنا، مستنياك من بدري.. عايزة تقابل حضرتك
هتف بها النادل لسيف الجالس مع منة على نفس الطاولة
أومأ سيف بإيجاب:
-خليها تيجي طبعاً
اقتربت السيدة منهم، قائلةً بتوسل:
-بالله عليك يا سيف باشا تساعدني
أجلسها سيف على المقعد الذي بجانبه، قائلاً باحترام:
-مالك بس يا ست الكل
بصوت شبه باكي همست:
-ابني..كان خارج مع صحابه وهما كانوا بيشربوا يعني ومعاهم حشيش بس والله يابني إنّ ابني ده مالوش في السكة خالص هو كان خارج معاهم والظابط قالي هيتحول للنيابة ومرضيش يخرجوا واحنا غلابة والله يابني وفضلت اعيط وكنت هبوس ايده عشان يخرجوا مرضيش
هتف سيف بوعد صادق:
-ابنك هيبات في حضنك الليلة دي
-بجد يابني
اجابها بثقة:
-اطمني والله هيرجعلك .. بس أنا هروح القسم أتكلم معاه كده أقوله حاجة وارجعهولك
تطلعت إليه بابتسامة واسعة وتبدلت ملامحها للفرح،قائلة بامتنان:
-روح يابني ربنا يسعد قلبك ويحفظك لاهلك ويحفظك في كل خطوة قادر يا كريم يارب
-ربنا يخليكي يا ست الكل..قوليلي اسمه بس وفي قسم ايه وأنا هخليه يرجعلك
كانت تتابع الحوار بصمت، مندهشة ممّا فعله سيف، لم يتكبر على تلك السيدة البسيطة إطلاقا وجعلها تطمئن برجوع ابنها لديها، بل ووعدها بصدق
وسيف رجل يوفي بوعده
هتفت منة بذهول بعد ذهاب تلك السيدة:
-هو لسة فيه ضباط كويسين كده؟
أومأ سيف مؤكداً:
-في كل مكان فيه الكويس وفي الوحش، وأنا مش أحسن واحد.. فيه أحسن مني بكتير
_________________________________
في المساء ..
وجدته جالساً بمفرده فى الشرفة، اقتربت منه قائلة برقة:
-ميزو.. أنت عارف غالي عندي قد إيه
تطلع إليها بشك، قائلا بتوجس:
-عايزة إيه؟
ضحكت منة بشقاوة طفولية:
-بموت فيك والله.. فاهمني علي طول
تأفف بحنق:
-ها..أنجزي !
-عايزة اخرج معاك بكرة
– لا
أردفت بتوسل:
-عشان خاطري يا ميزو
زفر بعصبية:
-قولت لا طبعا أنتِ اتجننتي؟ انا رايح اقابل سيف
تابعت مكملة تفجير قنبلتها:
-بس كده هي دي المشكلة عشان سيف يعني !
طب على فكرة بقى أنا عزمت آيتن أصلاً وجاية معايا خلاص ملكش حجة بقى
صاح بانفعال:
-أنتِ مجنونة؟ تعزميها ليه أصلاً!
منة بتبرير:
-عشان أنت كنت هترفض
تنهد حمزة بضيق:
-إذا كان أنتِ مش جاية تعزميها ليه؟
ردت بغيظ:
-أنا قررت وهي جاية خلاص
خرج غالقاً الباب خلفه بقوة فى وجهه، فهو يكره أن تضعه منة أمام الأمر الواقع ويكره تدخلات والدته وهي تخبرها بتلك الأوامر
_________________________________
-سيف أنت خارج؟
نظر إلى والدته التى تناديه قبل خروجه من المنزل في صباح يوم اجازته:
-آه يا ست الكل..عايزة حاجة مني؟
والدته بعتاب:
-مش ناوى تفرحني بيك يا حبيبي
أجابها مدعيا التفكير:
-إنْ شاء الله
تحولت ملامحها إلى حزن مختلط بالقلق:
-امتي بس يا سيف؟ أنت خلاص بقي عندك 29 سنة وضابط قد الدنيا وكل الناس بتحلف بأخلاقك..وشقتك جاهزة يعني مفيش سبب يخليك تتأخر كده..نفسي أفرح بيك قبل ما العمر يجري
قاطعها سيف بحنق :
-ماما قولتلك قبل كده سيبيها بظروفها.. محدش عارف نصيبه فين!
أجابته بتبرير:
-ما أنا اختارتلك كذا حد وأنت مش موافق
بملامح متجمدة، قائلاً بصرامة:
– بقعد اوقات ومش برتاح او مش بنتفق وبعدين انا ماليش اوي في الطريقة دي
اقتربت منه مربتة علي شعره:
-أومال ليك في آيه يا سيف.. معظم الناس بتتجوز بالطريقة دي
التفت ليهم بالانصراف:
-عايزة حاجة يا ماما ؟أنا رايح مع لؤي
__________________________________
فى اتيليه خديجة..
تقدمت إليها أختها تقف بجانبها، قائلة بخجل:
-ديچا كنت عايزة منك يعني فلوس عشان ادفع مصاريف مدارس العيال
نظرت إليها بتمعن، قائلة بدهشة:
-هو أنا مش لسة مدياكي فلوس من أسبوع!
أختها بتبرير:
-دول جبتلهم لبس بيهم ما أنتِ عارفة.. جوزي ظروفه زفت الايام دي ومرتبه علي قده ويدوب بيكفي مصاريف البيت
ضحكت بسخرية:
-اللي أنا بساعد فيه مش كده ؟
هتفت ببرود:
-يا ديچا أنتِ خطيبك مستواه المادي كويس ومش هيخليكي محتاجة حاجة وأنتِ ماشاء الله عليكي شاطرة وعندك اتيليه حلو..لكن حظنا احنا اللي كده
زفرت بنفاذ صبر وهى تعطيها بعض الأموال:
-خدي يا بثينة الفلوس.. وياريت تخلي جوزك يشوف شغلانة تانية ويتحرك.. أنا بعمل كده عشان عيالك الغلابة بس اللي صعبانين عليا
بثينة بامتنان:
-ربنا يخليكي لينا يا ديچا وميحرمنيش منك أبداً
__________________________________
في مطعم يطل على البحر..
كانوا يجلسون منتظرين سيف، بينما كانت منة تطلع على إحدى صوره الجديدة
صاحت منة بشقاوة:
-يخربيت طوله احبسوهولي والنبي لما يجي
صاح حمزة بعصبية:
-منة مش هيبقي في البيت وهنا كمان ارحميني
هتفت منة بثقة:
-لا معلش بقى سيف غير
حمزة بنبرة ساخطة:
– ايه الجديد ما أنتِ كل فترة تيجي تقوليلي نفس الجملة دي، اهدي بقى
زمت شفتيها بضيق:
-أنت من أعداء النجاح على فكرة
ضحكت آيتن، قائلة بوقار:
-منوش حبيبتي اتقلي عليه شوية مش كده
أجابتها منة بهيام وحب:
-اتقل إيه بس ده عليه صورة بالميري بتدمرني
ضحكت آيتن:
-أنا كرهت الميري بسببك
حمزة بنفاذ صبر:
-يادي الميري..أنا جنبي مستشفي اسمها الميري هولعلك في أمها
ليردف بنفاذ صبر :
-لولا أني عارف أنه مجرد كلام وبتعجبي بس من بعيد وخلاص ولما حد بيحاول يكلمك بتصديه، كان هيبقى ليا تصرف تاني معاكي
قاطعته آيتن بسرعة:
-خلاص بقى سيف دخل أهو
اقترب منهم سيف، وأشار حمزة للنادل ثم أخذ طلباتهم، سأله حمزة قبل أن ينصرف:
-لو سمحت مفيش كيدز اريا هنا؟
ضحك سيف، قائلاً باستغراب:
-احنا مش معانا أطفال يا حمزة بتهزر
التفت حمزة لمنة،وهو يومئ برأسه مؤكداً:
-لا معانا..أومال منة تبقي إيه
ردت منة بغيظ من بين أسنانها:
-هاهاها دمك خفيف أوي يعني
لاحظ سيف.. إن حمزة اندمج مع أغاني تامر حسني، سأله بفضول:
-أنت لسة بتحب تسمع تامر حسني يا حمزة ! انا بحبه بس مش بسمعله كتير بصراحة
منة بتلقائية:
-ده مهرجانات حمو بيكا ومجدي شطة برقبتهم
هتف سيف بسخرية:
-بيكا ايه وشطة إيه وفلفل إيه.. إيه القرف ده!
حدقت بعينيها غير مصدقة:
-أنت مبتحبش المهرجانات؟
سيف باشمئزاز:
-مستحيل أسمعهم أصلاً أنا مش عارف مستوي الناس بقى عامل كده إزاي
همست لنفسها قائلة:
– ايه التهزيق ده بقى !
لتردف منة بإحراج:
-لعلمك بقي أستاذ حمو بيكا بيفرفشني جداً
سألها بسخرية :
-أومال عبدالحليم حافظ وأم كلثوم وعمرو دياب إيه؟
منة بذهول:
-هو أنت بتسمع قديم بس وعمرو دياب!
تدخل حمزة قائلا:
-سيف بيعشق اغاني عمرو دياب أوي و الأغاني القديمة
ردت بخجل:
-هناك فرق شاسع !
ثم تابعت بتبرير:
-بس على فكرة عادى.. أنا مثلا بحب اسمع انجلش وقديم أحياناً بس بعشق وائل جسار بحب كل أغانيه..يعني كل واحد وله ذوقه برضو
__________________________________
في اليوم التالي وبالتحديد في الفندق
اسوقفته رهف امام الريسيبشن، لتسأله بدلال وصوت ناعم:
-حضرتك مروح خلاص يا مستر حمزة؟
حمزة باستغراب:
-إيه اللي مقعدك لغاية دلوقتي أصلاً .. المفروض كنتي تروحي من بدري..عشان معندكيش شغل زيادة زينا
ردت بمكر:
-أعمل إيه بقي كان عندي شغل كتير ولسه مخلصة حالا..وهاخد تاكسي
حمزة بابتسامة :
-طيب ما تيجي أوصلك في سكتي
شهقت بمفاجأة غير مصدقة، لتجيبه برقة :
-بجد..قصدي يعني مش هتعب حضرتك معايا؟
حمزة بجدية:
-لا خالص
_________________________________
شعرت بالغيظ عندما رأته يتحدث مع رهف بضحك وتجاهل كلامها عندما طلبت منه أن ينتظرها لتتحدث معه في أمر هام
نادت عليه بصوت عال، ليسمح لرهف أن تسبقه أمام سيارته خارج الفندق ليعود إلى آيتن
قائلاً باستنكار:
-نعم
آيتن بعتاب:
-أنا قولتلك عايزة اتكلم معاك في حاجة و قولتلي لما تخلص شغل
نظر لها بتمعن، قائلاً ببرود :
-أنتِ ناديتيني عشان كده؟ اعتقد كنا مع بعض امبارح مكلمتينيش في حاجة !
شعرت بغليان يشعل كيانها :
-لا حضرتك..
رد عليها بصلابة:
-طيب قولى حابة تتكلمي في إيه عشان مش فاضي زي ما أنتِ شايفة هوصل رهف
صمتت لثوان؛ تنهدت بهدوء رادفة:
-كنت عايزة أقولك يعني إنّ فعلا الفلاشة والفايل اتسرقوا وفعلا أنا اشتغلت عليه وتعبت و رغم كده..
قاطعها بملامح متجمدة:
-أنا عارف الحوار ده..لو لقيتيهم أبقي قوليلي عشان نرجع نكمل الميتنج ده تاني
كزت علي أسنانها غيظا:
-طيب..
قاطعها منصرفا:
-آسف مضطر أمشي عشان رهف مستنياني.. بعد إذنك
__________________________________
في الكافيه الذي تجلس به مع معظم عملائها من السيدات والفتيات
كانت تستمع إلى امرأة منهن بكل صمت وهي تتابع معها:
– أنا متجوزة من قريب ومخلفة منه طفل صغير، حياتنا مش وردي طول الوقت، بنتخانق اوقات لكن المرة دي مختلفة تماما .. الحكاية كلها اني اتخانقت انا وجوزي خناقة عادية زي اي اتنين ونمنا وصحينا عادي اكلت ابني وغيرتله روقت شقتي وفرشتها وطلعت الاكل اللي هجهزه على الغدا عشان هو بيرجع على المغرب لقيته جاي بيقولي مامتك عزمانا على الغدا يلا البسي قولتله هنروح دلوقتي؟ لسه بدري انت بترجع من شغلك بالليل .. قالي هي قالتلي كدا لبست ولبست ابني ودخلت الحاجة التلاجة تاني، بدور على مفتاحي ملقتوش قالي تلاقيه هنا ولا هنا يلا عشان منتأخرش وكدا كدا مروحين مع بعض هبقى اديكي مفتاحي، نزلت وطلعنا عند ماما وبتكلم في التليفون لقيته بيقول هينزل يجيب حاجة، نزل ماما بتقولي في ايه قولتلها انتي عزمانا على الغدا قالتلي لا ده جوزك كلمني قالي احنا جايين نتغدا عندك
– كان بيكذب عليكي !
اومأت بضيق وهي تستكمل بحزن :
– كلمته كذا مرة مبيردش و بيكنسل عليا، واتصل بماما يقولها بنتك عندك شوفي لو هنتطلق تجيبوا المأذون بكرة
– ماما زعقتله وقفلت المكالمة معاه وكلمت ابن خالتي، عشان يعني معنديش اخ ولد، وكلمه قاله هجيلك بعد الفطار وقاله اصلها بتزعق لابننا وانا الدنيا ملخبطة معايا قاله وهي زعقتلك انت؟ وبعدين تزعقله تقوم تضحك عليها وعلى خالتي وتنزلها غصب عنها و تاخد مفتاحها ابنك ده مش محتاج مصاريف ؟
رد عليه قاله هي عايزة فلوس يعني؟
– طب ملاحظتيش عليه وجود طرف بينكم تالت !
– ابن خالتي سأله انت لو شايفلك سكة تانية قول، بكرة تعالى لأمها وخالها شوف هيعملوا ايه.. كلموا تاني يوم بيسأله ناوي على ايه انت ترضى لحد من اخواتك كدا وامك ترضى حد يخدعها، والبيه يرد بكل برود انا هكلم طنط
– وقالها ايه ؟
– ولا اتصل اصلا.. وابن خالتي حاول يكلمه تاني قالوا شوف هنتطلق امتى عشان مش فاضي !
و انا طبعا لا معايا هدوم لا ليا ولا للولد ولا حاجتي معايا حتى ولا فاهمة ليه اتطلق اصلا !؟ ومش معقول عشان زعقت لابني مفيش كده اصلا.. ما معظم الستات بتزعق لولادها
– أنتِ باقية على الشخص ده ؟
عايزاه ولا لأ؟
هزت كتفيها بلا مبالاة:
– مش عارفة..دي مش اول مرة يصمم كده.. ده كل فترة عايزني امشي من البيت أساساً..بس المرة دي ببجاحة و غدر !
المرة دي سرق مفتاحي !
هتفت آيتن بعد مدة قصيرة من التفكير :
– أنتِ غلطانة عشان نزلتي من غير مفتاحك بصراحة..بس ملحوقة…هتتحل
مشكلتك دي تتحل بطريقتين .. والمرة دي هنستخدم طريق قانوني مع القانون اللي انا بستخدمه الخاص بيا، صاحبتي محامية وهي هتساعدك
بس الفكرة كلها أن لازم اعرف أنتِ باقية على الشخص ده أساساً ولا لا ؟ عشان اعرف اقف لحد فين في انتقامي منه
لو عايزة تعذبيه شوية وترجعيله تمام
ناوية تسيبيه اصلا .. يبقى هنستخدم حل اقوى ووقتها هخليه في الحالتين يجي لحد عندك بيعيط عليكي أنتِ وابنكم
يتبع …
كل سنة وانتوا طيبين يا حبايبي ????❤️ وعيد سعيد عليكم يارب وعلى حبايبكم
متنسوش تتفاعلوا مع البارت ولو وصلتوه لـ 350 لايك وكومنت هنزلكم بارت هدية بكرةالفصل الخامس عشر
دلفت إلى المنزل بلامبالاة غير مهتمة لمشاجرات والدتها عن تأخيرها؛ فقاطعتها قبل أن تدخل غرفتها، قائلة بابتسامة :
-ثواني وهسخنلك الأكل..عملتلك حاجة بتحبيها أوي
هزت رأسها بنفى:
-لا شبعانة يا ماما
ربتت علي شعرها، لتقول بنبرة حانية:
-مالك يا تونة..حصل معاكي إيه ضايقك كده
تطلعت إليها بدهشة، قائلة باستغراب:
-أنتِ عرفتى منين أن أنا مضايقة وأنا محاولتش ابينلك أصلاً
ابتسمت لتقول بثقة:
-عشان دخلتي عادي وكأنه مش فارق معاكي أعاتبك علي تأخيرك مش بهدوء كده زي كل مرة..وعشان عارفة أنّك بتحبي الأكلة دي ورفضتي حتي تعرفي هي إيه، ومش شبعانة زي ما قلتي
هي تعلم حجم الوجع والإرهاق التى تشعر به ابنتها.. بالرغم من أنها لم تحكي لها شيئا كما تحكي لغيرها، علمت إن امتناعها عن أكلتها المفضلة ليس شبعا كما تدعي، ونبرة صوتها تعني أنّ يومها كان سيئاً..
ثم أردفت بهدوء:
-أنا عارفة ان مش وقته بس أنتِ مش بتفضي وبنسي أقولك.. واحدة جارتنا في العمارة اللي قدامنا جايبالك عريس..مهندس ومحترم وابن ناس..هو عارفك أصلاً وسألها عليكي عشان مش عارف يوصلك
تطلعت إليها بابتسامة هادئة وهتفت بهدوء:
-بصي يا ماما..حوار الارتباط ده فرهدة.. لا سني ولا لياقتي يسمحوا بكده، أول ما بلاقي حد بيلمح بتحول مش فاهمة ليه وبكرهه فيا
ضحكت والدتها:
– سنك ده ايه؟ انت عندك 24 سنة لسه صغيرة
لتضيف وهي تسألها بفضول :
-طب مش نفسك كده تجربي وتحبي، تدي نفسك فرصة زي كل البنات
هتفت بحنق لطيف:
-أنا مخبيش عليكي عايزة أجرب الاحساس بتاع تصبح على خير يا روحي وخلي بالك من نفسك وأنت نايم عشان السرير من غير فرامل والجو ده بس لما بيجي لحد عندي بترعب
همست فادية بحنان:
-لأن مجاش لسة اللي يخطف عقلك وقلبك ويوم ما يجي مش هتفكري في سبب يبعدك عنه
لم تقابل الشخص الذي يستحق أن تتخلي عن كل تفكيرها وتحررها لأجله..فهي لا تكره في حياتها سوا تذكيرها بالزواج وأن مصير أي بنت هو الزواج فقط..تعبت من كثرة ما حاولت إقناع والدتها أن طموحاتها أكبر بكثير من مجرد أن تكون تحت رحمة رجل يتغير فيما بعد لتصطدم به
قالت آيتن بشرود:
-بصراحة مشوفتش حد يستاهل إنّي أضحي بحريتي وتفكيري وارتبط بيه
أردفت بثقة:
-لما النصيب يجي هتلاقي نفسك اتكفيتي على وشك كدا ومهما عملتي نصيبك هيصيبك
تعترف أنها أنانية معها، هي تفكر في نفسها أحياناً وأحياناً تخشي أن تحقق لها أمنيتها؛ كي تطمئن عليها، كل ما تريده أمها حياة آمنة هادئة لآيتن، تظن أنها غير قادرة علي تحقيق كل شيء وحدها؛ فممكن أن تستسلم في منتصف الطريق!
احتضنتها أمها قائلة بتمني:
-أنا كل اللي بتمناه من ربنا أن أطمئن عليكي قبل ما أموت.. بس اطمئن عليكي مع راجل سند بجد راجل أكون واثقة أنّي سلملته الأمانة اللي معايا..مش عايزة أكرر غلطة زمان فيكي
اشتدت ذراعيها حول جسد أمها، وشعرت براحة عارمة غرقت جسدها، قائلة بخوف:
-ماما بالله عليكي ما تجيبي سيرة الموت بعد الشر عليكي
-شر إيه يا حبيبتي بس..ده اللي هيحصل محدش فينا متبت فيها
انتفضت من حضنها، لتربت الاخرى علي شعرها؛ كي تهدئها، ثم هتفت بضيق:
-بخاف أوي من التفكير في الحاجة دي..أنا معنديش أغلى منك يا ماما..أنا بتنفس بوجودك..وجودك جنبي ودعواتك ليا هي الأمان..حضنك ليا وقت تعبي.. خوفك عليا وخناقنا لما بتحسسيني إن أنا لسة طفلة وبتخافي عليها مع أنّي كبرت
__________________________________
جلست بجانبه في السيارة، نظرت لعينيه بتمعن، ليبتسم لها بضحكة صغيرة، قائلة بإعجاب :
– تعرف أن ضحكتك حلوة أوي
-عجبتك؟
تعالت ضحكاتها بدلال:
-أوي وخصوصا يعني غمازاتك
اقتربت منه بدلال؛ لتمرر أصابعها على وجنته لتتجه إلى ذقنه التي تضيف عليه جاذبية، لتتفاجئ به يبعد يدها عنه، سألها بجدية:
-هوصلك فين بقي؟
تنحنحت بحرج، ثم عضت شفتيها بمكر:
-أنت ساكن فين؟
– في سموحة
حركت رأسها بنفي، قائلة برقة مصطنعة:
-لا لا بعيدة أوي.. أنا شقتي هنا في لوران قريبة..
– لا أكيد مش هنروح شقتي يعني، أنا كان قصدك اوصلك بس
رمقته بغيظ فهي توقعت أنه سيأخذها معه شقته للأمان أكثر، سألها بفضول:
-هو أنتِ عايشة لوحدك؟
أومأت بإيجاب :
-أيوة..بابا مسافر أصلاً وهيرجع الشهر الجاي..
هز رأسه بتفهم، ليتجه نحو العنوان التي وصفته له
عندما وصلوا إلى العمارة، نبهته رهف بما سيقوله للأمن ودلف بعدها بدقائق إلى المصعد الكهربائي ليجدها تنتظره أمام المصعد ليصعدا سوياً
اقتربت منه بدلال، و اتسعت ابتسامتها، ثم مدت يدها لترتفع على ياقة سترته، سحب يديها الاثنين بحدة؛ ليدفعها عنه بشدة قائلا بهدوء:
– اهدي شوية
زفرت بضيق:
– في ايه ؟ هو أنت جاي معايا ليه بقى ؟
فاقتربت منه هي هذه المرة و بادرت بتقبيله، فتجاهلها مرة أخرى مبعداً رأسه وابتعد عنها، قائلا بجدية:
-آيتن!
تأففت بضيق:
– يوووه مالها دي كمان !
نظر إليها بعمق، قائلاً بصرامة:
-عاوز أعرف الفلاشة فين؟
شعرت بارتباك، لترد باستنكار:
-فلاشة إيه
أردف بسخرية :
-وحياة أمك أنتِ بتستهبلي..الفلاشة إللي سرقتيها هي والفايل طلعيهم من معاكي
أجابته بغضب حارق:
-فلاشة إيه دي اللى أسرقها.. أنت مجنون!
ثم توجهت نحو ازرار المصعد لتحاول ايقافه، قائلة بعصبية :
-بقولك إيه انا هسيبك وانزل انت بقى..أنا مش فاضية
اقترب منها، ليدفعها بشدة نحو الخلف وهو يرفع المصعد إلى أعلى دور في البناية؛ قائلا بتهديد:
-لو ماعرفتينش الحقيقة يومك مش هيعدي، وهعملك فضيحة في العمارة كلها ومش بس كده..هروح لهاني وأعرفه كل حاجة أنّك خليتيني أجيلك البيت
جفلت برعب من صوته، لتجيبه بتوتر ممزوج بالخوف:
-أنت عايز مني إيه؟
صرخ بها بقوة شديدة :
-عايز أعرف فين الفلاشة! وليه عملتي كده في آيتن؟
انهمرت دموعها رغما عنها، قائلة بغيظ:
– عشان هي من اول ما اشتغلت ودايما واقفة لنا في كل حاجة، مش انا بس..اي بنت تشوفها بتتكلم مع نزيل ولا عميل كلام بره الشغل تقول إنها بتدلع ومش شايفة شغلها وعلى طول بتنتقد شغلي وتفضل تتكلم عن الاحترام
حمزة بتفكير:
-عشان كده بتحوري بكلام محصلش عنها؟
أردفت بصوت مرتفع ممزوج ببكائها؛ قائلة بحقد:
-ياريته جاب نتيجة..كله بيحبها ووقفوا معاها..هي محترمة ولا نضيفة على نفسها.. مش لازم تبوظ شغل حد بقى
حمزة باقناع:
-هي مش بتبوظ شغلك هي بس فاهمة أن ده بيضر شغل الفندق، وان ممكن حد يفهمك غلط
ليضيف بنبرة ساخرة :
– الرجالة للأسف مش بيتجوزوا بالطريقة دي، ده لو كنتي ناوية على جواز يعني !
في ذلك الوقت توقف المصعد أمام الدور الخاص بشقتها لتخرج هي قبله ومن ثم ضحكت بسخرية، قائلة بغيظ:
-أنت هتنصحني زيها.. خلاص خلصت المحاضرة بتاعتك ؟ اتفضل بقى
نظر لها بغضب، تحول من ثباته إلى حدة ثم أمسكها من ذراعها بعنف قائلا بشراسة:
-أنتِ مبتفهميش ليه ؟ الفلاشة والملف يطلعوا عشان لو كلامي ماتنفذش هتشوفي مني وش مش هيعجبك خالص
انتفضت برعب؛ هامسة بتوسل و تألم:
-آه.. طيب..سيبني هدخل أجيبهم من شقتي
_________________________________
كان يتحدث مع آيتن عبر الهاتف ليخبرها بموعد الاجتماع المعجل، قائلا برسمية:
-أنا كلمتك عشان أبلغك بالميتنج وطبعا عشان النهاردة إجازة ومش هينفع استني يومين الإجازة دول فقررت نروح Private Room “غرفة خاصة” يعني عشان نعرف نتكلم ونأخد راحتنا في الميتنج..تمام على الساعة 10 كده.. باي
نظر خلفه ليرى منة أمامه، شهقت بصدمة غير مصدقة آخر كلمات قالها :
-برايڤت روم يا حمزة..أحيه ! ماكنتش أعرف إنّك خلبوص أوي كده
هتف بانزعاج:
-بس بقى يا منة اسكتي
ثم هدرت صوتها بقوة كأنها تتعمد منادية خالتها بطريقة غير مباشرة:
-حاضر سرك في ميكرفون
أردف بغيظ، وهو يرمقها بحنق:
-سر إيه يخربيت سنينك..صفي نيتك دي
رمقته بنظرة ساخرة:
-طب ما كنت تأخدها في أوضة في أوتيل اشيك..وبعدين مين دي أصلاً!
تدخلت والدته في تلك اللحظة، لترد بقلق وهى تنظر له بنظرات متفحصة:
-في إيه يا حمزة!
كز علي أسنانه بغضب:
-مفيش يا ماما منة بتحب تهزر أنتِ عارفة بقي منة وشقاوتها
أردفت والدته بعتاب:
-برايفت روم إيه اللي تأخدها فيها
حمزة بنفاذ صبر:
-يا ماما أنتِ فاهمة غلط والله.. ده اجتماع مع أصحاب الشغل والله وعشان اليومين دول إجازة حجزت برايفت روم في مطعم عشان نعرف نأخذ راحتنا في الكلام ومحدش يزعجنا مش أكثر
__________________________________
اتصلت على العميلة خاصتها لتخبرها توقعاتها كما توقعت بالضبط فزوجها كان يعرف امرأة غيرها ولكن لا تعرف اذا كان الأمور بينهم وصلت إلى اتفاق زواج ام لا، فاتفقت مع وئام صديقتها سريعا وهي تخبرها ما تفعله:
– وئام حاولي تعملي المحضرين اللي قولتلك عليهم دول بأسرع وقت وانا اتفقت معاها هتعملك توكيل
– مفيش مشكلة يا تونة، بس معرفتيش هي ناوية تكمل معاه ولا لا
– لا هي مترددة شوية، بس هي لما تلاقيه ندمان وهيبوس ايديها كده عشان توافق ميطلقهاش وقتها هي هتحس أن في ايديها كل حاجة، و سواء كملت أو لا طبعا دي حاجة تخصها، انتي عارفة مش شغلنا ده
– عندك حق
لم تستطع الانتظار اكثر من ذلك تود أن تعرف ما سبب الاجتماع المعجل وفي مكان مخصوص!
بينما هو واقف بعيدا عن الطاولة المجهزة لهم..ساندا يداه علي النافذة، منتظر مديره الذي تأخر
اقتربت منه آيتن، تحدق فيه لثوان؛ لتسأله بفضول:
-غريبة يعني الميتنج البدري ده يا حمزة!
التفتت لها، وهو يمط جسده العضلي؛ ليسألها مغيرا مجري سؤالها:
-مفيش صباح الخير!
أردفت بسخرية ، متجاهلة إجابته :
-صحيح قولي..إيه اخبار سهرتك امبارح؟ شوفتك كنت خارج مبسوط مع رهف
أجابها بتوجس:
-ااه.. دي غيرة ولا إيه؟
قاطعته هاتفة بغضب طفولي:
-نعم! غيرة إيه.. الفكرة بس إن استغربتك خارج مع رهف و مفيش بينكم كلام أصلاً
ضحك برسمية:
-أيوة فين المشكلة يعني عشان تستغربي!
سألته بجراءة:
-روحت معاها البيت صح؟
أدهشته صراحتها، و قرر أن يجيب الصراحة بوقاحة غير مباشرة؛ ربما يتخلص من أسئلتها:
-أنتِ حابة تعرفي التفاصيل بقى؟
ابتسمت بخفة لتداري ارتباكها:
-لا ميخصنيش التفاصيل..بس أنا
حدجها بعينين نصف مغمضتين بتسلية متزايدة بالغرور :
-هفترض إن أنا روحت معاها البيت..أنتِ هيخصك في ايه؟
هزت اكتافها باستهتار:
-عندك حق أنا ميهمنيش.. انت حر في حياتك
تطلع إليها بعمق، متأملا عيناها بنظرات أربكتها قليلا، ليضحك قائلا باستخفاف:
-متحبسيش جواكي طيب..قولي إنّك بتغيري عادي
تنهدت بعمق متجاهلة كلماته، لتجيبه بغيظ من بين أسنانها:
-انت بتحلم.. بعد إذنك راجعة للترابيزة
_________________________________
بدأ الاجتماع، اندهش هاني حين رأى الملف مرة أخرى، فأقنعه حمزة أنه وقع بالغلط مختلطا مع ملفات أخرى مع شخص في الفندق، بينما هى لم تصدقه..فقررت أن تسأله بعد انتهاء الاجتماع
حمزة بجدية للمدير المالي للفندق:
-خطة الإيردات.. حضرتك طبعا شرحتهالي هتم ازاي
-اه متقلقش حضرتك
ثم وجه حديثه لمديره الجالس بجانب آيتن:
-آيتن عاملة خطة لأسعار الغرف هايلة وفي نفس الوقت مش هتأثر علي الميزانية، وعايزين كمان نأخذ بالنا من جداول المنافسة..إيه رأيك يا مستر يا يزيد؟
بينما يزيد”مدير شركة السياحة” لم ينتبه بالأساس لحمزة، كان مسلط تركيزه علي آيتن، لينبهه حمزة بصوت عال مرة أخرى
يزيد باحراج:
-ها.. بتكلمني أنا يا حمزة!
تأفف حمزة بغيظ:
-أيوة بقول لحضرتك علي خطة أسعار الغرف
أجابه ببرود:
-مش أنت شايف أنها تمام؟ خلاص
فأرسل لها حمزة رسالة على الواتساب:
“آيتن تعالي مكاني”
فتحت هاتفها لترى رسالته، فقررت أن ترد له ما فعله بها منذ قليل:
“لا أنا مرتاحة هنا”
وقف منسحبا من الكرسي، ثم اقترب منها، لينحني هامسا بجانب اذنها بجدية:
-و أنا مش مرتاح هنا
شعرت بالحرج.. فتحركت من كرسيها وجلست مكان حمزة مقابله، ليجلس هو أيضا مكانها ويجلس علي كرسيها
شعر يزيد بالضيق من تبديل أماكنهم، بينما هاني والمدير المالي شعروا بالاستغراب فقطع حمزة شكهم، قائلا باقناع:
-عشان مستر يزيد بس يركز معايا ويسمعني كويس
يزيد بصوت خافت لحمزة:
– فكرني اخصملك الايام اللي بتيجي متأخر فيها بعد كده
ضحك حمزة:
-الله! غلطت أنا عشان بخليك تركز في شغلك
أجابه باقناع:
-واثق فيك متقلقش
بعد انتهاء الاجتماع، استوقفته آيتن قائلة بفضول:
-حمزة أنت جبت الورق والفلاشة منين؟
رد برسمية دون أن يلتفت لها:
-مش مهم منين..المهم إن جبتهم
كان أن يخرج من المطعم، فوقفت أمامه قائلة بغيظ:
-لا مهم ده شغلي أكثر من اسبوعين عليهم وسهر وتعبت يعني من حقي أعرف مين اللي سرقهم
لم تتلق ردا منه، فهتفت آيتن بشك:
-رهف.. مش كده؟
أشاح بوجهه بعيداً عنها
لتردف بثقة:
-أكيد هي يا حمزة أنا متأكدة
حمزة بنفاذ صبر:
-تمام يا آيتن هي
لتسأله بنبرة تهكمية:
-وجبت الحاجات إزاي بقي..طبعا روحت معاها الشقة عشان تعرف تجيبهم مش كده؟
شعر بالغضب من اتهامتها، قائلا بصرامة:
-مروحناش شقتها ولا حاجة..كل اللي حصل اني طلبت منها الحاجة وهي ادتهاني وخلاص وصلتها البيت
-بجد؟
أومأ رأسه بإيجاب
لكنها لم تقتنع، لتهتف بنبرة مؤكدة:
-بس أنا شايفاك وأنا مروحة انك رايح على طريق بيتها
تطلع إليها باستغراب:
-كنتي مراقبانا يعني؟
آيتن بتبرير:
-لا وأنا في الطريق عادي
أجابها بحدة:
-طيب يا آيتن.. روحت معاها بس فعلا يعني محصلش حاجة ولا حتى دخلت شقتها ، الكلام كله كان قدام شقتها.. واتكلمت معاها وطلبت الورق والفلاشة، جابتهوملي.. بس ده اللي حصل
آيتن بتوجس:
-فعلاً!
رد عليها باندفاع :
-لا أنا مبستغلش حد مقابل حاجة أنا عايز أوصلها
ابتسمت آيتن برضا، غير متوقعة ما فعله لأجلها:
-عموما شكراً على أنّك ساعدتني
رفع حمزة حاجبه، قائلا بسخرية:
-لا بجد! لسة فاكرة؟
ابتسمت لتردف بامتنان:
-حقيقي مش عارفة اقولك إيه..أنتّ عملت معايا موقف مش هنساه
ثم تبدلت ملامحها بنظرة حادة عندما تذكرت..
يتبع….
تفاعل يا حلوين ???? لو وصلتوا البارت لـ 300 لايك وكومنت هنزل فصل جديد هدية ????




